Santiago 3

Je̱'e̱ awak

1“Mu̶gu'uktu̶jk, ka'p nigoo nimay mjanchniwindzu̶n'ajtku̶xy je̱'e̱ Dios y'ayuuk, miich mnejwu̶u̶ygyu̶xypy ko u̶u̶ch mu̶dyiibu̶ yaj'u̶xpu̶jku̶mbu̶ñ ajku̶xy u̶u̶ch ni'igyu̶ mu̶k yajtu̶ydyuunu̶mu̶p ajku̶xy. 2Nigu̶xyu̶ mu̶j nduundu̶gooyu̶m ajku̶xy. Pu̶nu̶ jii pu̶n ka'p nidu'uñdyu̶ tyuundu̶góy neby kyapxy myu̶dya'agyu̶ñ, tu̶ je̱'e̱ du'umbu̶ ja'ay y'oybyu̶dzu̶u̶m wya'atzpu̶dzu̶u̶mnu̶, y jyajtypy neby je̱'e̱ ñi'kx kyopt nandu'un ku̶xyu̶ ane̱'e̱mu̶chu̶ñ. 3Ko je̱'e̱ kuwaay awonu̶'k nbu̶daaku̶m ajku̶xy ma je̱'e̱ kuwaay awaku̶ñ neby du'un xymyu̶madoowu̶mu̶chu̶ñ ajku̶xy, mu̶'it du'un ku̶xyu̶ n'ane̱'e̱mu̶m ajku̶xy neby naty ndzojku̶mu̶ñ ajku̶xy. 4Y ok'yajkoptu̶gu̶u̶ygyu̶x je̱'e̱ barco nandu'un: oy je̱'e̱ jya'amu̶jjátyu̶ch, y mu̶k je̱'e̱ poj tyijmíñ tyijxu̶byii y je̱'e̱ barco yaj'yo'oybyu̶du̶jk yaj'yo'oygyu̶xypy je̱'e̱ barco maa timychojkku̶xy ñúkxku̶xu̶chu̶ñ mu̶u̶d je̱'e̱ pi'k mutzkpu̶ pujxk mu̶dyiibu̶ xu̶u̶'ajtpu̶ñ timón. 5Nandu'un jyaty mu̶u̶d je̱'e̱ awak. Janch mutzk je̱' ma je̱'e̱ ni'kx koptu̶ñ, peru̶ janch mu̶j y'u̶u̶du̶góy kyapxtu̶goy. ¡Je̱'e̱ jíndu̶bu̶ ju̶u̶n ño'kypy yajwindu̶gooby je̱'e̱ mu̶jpu̶ tun kopt! 6Je̱'e̱ awak du'un je̱' neby je̱'e̱ ju̶u̶nu̶ñ. Je̱'e̱ ju̶bu̶kpu̶ je̱' je̱'e̱ mu̶dyiibu̶ tu̶ yajpu̶da'agy ma je̱'e̱ nni'kx ngopt ajtu̶m ajku̶xyu̶ñ, je̱'e̱ mu̶dyiibu̶ je̱'e̱ ja'ay ku̶xyu̶ yajwindu̶gooydyaaybyu̶ñ. Je̱'e̱ jiiby ka'a'oydyaaktuuby yajka'ab neby je̱'e̱ njugy'ajtu̶ñ jiiby wiinu̶u̶xu̶u̶ kyugu̶xu̶u̶yu̶mu̶chu̶ñ ajku̶xy. 7Je̱'e̱ naaxwiiñjya'ay myu̶u̶d je̱'e̱ mu̶k'ajt neby je̱'e̱ no'on ju̶yujk awa'anbu̶ ku̶xyu̶ mu̶mada'agu̶chu̶ñ, je̱'e̱ joon muuxy, je̱'e̱ tza'añdy ju̶yujk y je̱'e̱ no'on ju̶yujk mu̶dyiibu̶ nu̶u̶jooty mejyjyooty tzu̶naaygyu̶xpu̶ñ, y tu̶ mu̶madaakku̶xy; 8peru̶ ka'p je̱'e̱ y'awak ni pu̶n ni tu'ug mu̶mada'agyñu̶. Je̱'e̱ ju̶bu̶kpu̶ je̱' je̱'e̱ mu̶dyiibu̶ ka'p yajmu̶mada'agyu̶ñ, y je̱' je̱'e̱ ju̶bu̶kpu̶ mu̶u̶d mu̶dyiibu̶ yajtu̶gooybyu̶ñ du'un je̱' neby je̱'e̱ tzooy mu̶dyiibu̶ yaj'o'kp yajtu̶gooybyu̶ñ. 9Mu̶u̶d je̱'e̱ awak je̱'e̱ nDios Teedy n'u̶u̶baat ngapxpaattu̶m ajku̶xy, y nan mu̶u̶d je̱'e̱ awak je̱'e̱ ja'ay ni'oj niyaaxu̶u̶yu̶m ajku̶xy, je̱'e̱ mu̶dyiibu̶ je̱'e̱ Dios tu̶ yajkojyu̶ñ, je̱'e̱ mu̶dyiibu̶ du'un ku̶xu̶'kku̶xpu̶ñ neby je̱'e̱ Dios kyu̶xu̶'u̶gyu̶ñ. 10Ma je̱'e̱ awaku̶ñ jiiby je̱'e̱ oygyapxy oymyu̶dya'agy pyu̶dzu̶my, y nan jiiby je̱'e̱ ju̶bu̶kkapxy ju̶bu̶kmu̶dya'agy pyu̶dzu̶my. Mu̶gu'uktu̶jk, ka'p du'un jya'apadyii nja'ay'ajtu̶mu̶ch ajku̶xy. 11Ma je̱'e̱ tu'ugpu̶ nu̶u̶góptu̶ñ ka'p je̱'e̱ nu̶u̶ ta'ambu̶ jiiby pyu̶dzu̶my cham je̱'e̱ oyñu̶u̶ naty jiiby nandu'un pyu̶dzu̶u̶mbu̶. 12Du'un neby je̱'e̱ aceituna ka'p mu̶baad tyu̶m'aty ma je̱'e̱ higueeru̶ kepyu̶ñ ni je̱'e̱ higueeru̶ ka'p mu̶baad tyu̶m'aty ma je̱'e̱ uva'aadzu̶ñ. Nan ka'p mu̶baad mu̶gu'uktu̶jk, je̱'e̱ oyñu̶u̶ pyu̶dzu̶my ma je̱'e̱ taamtzpu̶ nu̶u̶góptu̶ñ.

Je̱'e̱ jaanchpyu̶ wij'ajt ke̱j'ajtu̶ñ

13Pu̶nu̶ jii ma miich ajku̶xy pu̶n nije̱' wijy kejy ñayjyu̶wu̶'u̶yii, wan yajni'igu̶xu̶'u̶gy ko oy yajxón jya'ay'áty, mu̶u̶d je̱'e̱ yuung'ajt naaxypy'ajtu̶ñ mu̶dyiibu̶ je̱'e̱ wij'ajt ke̱j'ajtu̶ñ mooyu̶bu̶ñ. 14Peru̶ pu̶nu̶ mnayye̱jku̶gu̶xp miich ko je̱'e̱ ka'a'oy'ixu̶u̶ mjoot mwinma'añ ta'am xyajju̶wu̶u̶ygyu̶xu̶ch, y mduungu̶xy tii du'umbu̶ neby je̱'e̱ mmu̶gu'ugtu̶jk du'un jyootma'tku̶xu̶chu̶ñ, ka'p du'un mu̶baad mnaygyu'umaayu̶gu̶xy ko du'un mja'ay'ajtku̶xy y je̱'e̱ tu̶y'ajt du'un mmu̶duundu̶gooygyu̶xypy. 15Je̱' ko ka'p adaa du'umbu̶ wij'ajt ke̱j'ajtu̶ñ jye̱'e̱ju̶ch je̱'e̱ mu̶dyiibu̶ jiiby tzomb ma je̱'e̱ Diosu̶ñ, je̱'e̱ wij'ajt ke̱j'ajtu̶ñ je̱' je̱'e̱ mu̶dyiibu̶ yajpaatp ma adayaaba naaxwiiñu̶ñ, je̱'e̱ naaxwiiñjya'ay jye̱' y je̱'e̱ mu̶jku'u. 16Ma je̱'e̱ ka'a'oy'ixu̶u̶ y je̱'e̱ naymyu̶jootma'adu̶u̶ yajpaadyu̶ñ, nan ma je̱'e̱ tzip ma'ad nandu'un yajpaadyu̶ñ y ku̶xyu̶ je̱'e̱ ju̶bu̶kpu̶ axu̶u̶gpu̶. 17Peru̶ je̱'e̱ mu̶dyiibu̶ je̱'e̱ wij'ajt ke̱j'ajtu̶ñ mu̶dajtku̶xpu̶ñ, je̱'e̱ mu̶dyiibu̶ tzomb ma je̱'e̱ Diosu̶ñ, tu̶y tu'uda'agy je̱'e̱ chu̶naay jyugy'ajtku̶xy. Y nan ka'p chipja'ayu̶ch ajku̶xy, oyjya'ay ajku̶xy y yuung naaxypy jya'ay'ajtku̶xy. Nan pa'a''ayoobu̶ja'ay ajku̶xy, y y'agu̶tzojkku̶xypy wanpú̶nu̶ch y tu'uda'agy jya'ay'ajtku̶xy, y tyuungu̶xypy je̱'e̱ oybyu̶. 18Pu̶n je̱'e̱ oy'ajt yajkoptu̶gu̶u̶ygyu̶xpu̶ñ y ka'p chípu̶ch mya'adu̶ch y oy je̱'e̱ jya'ay'ajtku̶xy neby je̱'e̱ oy'ajt du'un paatku̶xu̶chu̶ñ.

Currently Selected:

Santiago 3: MIXE

Highlight

Copy

Compare