রোমীয় 12
12
থাওরা ফোরা কিজু হ্রাংরো নিংচা
1য়জংছুগি ঞিং আকুরো, থাওরা ফোরা ঈ দিঃ আখ্য ওয়াসানারো কিজু, ঙা নাংরোগু কংগং চিই খ্যারো আতংবেং থাঃচাগা, নাংরো নাংরোমা কেইংথাগো, সেংস্যাংসনা থাওরা ফোরাবামা আসুং ক্যালৈঅং প্যাংরো থাওরা ফোরাগো পিইলৈকে। য়াংচারা নাংরোমা থঃতেংরি রুসিইতারা ফ্রফু। 2দিঃমা, আছু্উং কাবা আলৈই, নাংরো কুঃদৈং য়াংদে মঃনকেকি, প্রফুছুগিগা থাওরা ফোরাবামা নাংরো চিইকো, আঃস প্যাংরো তাংগে। যাফুলিছুগি নাংরো থাওরা ফোরা ঈ ছেংদাগো সিকঅং। থাওরা ফোরা ঈ ছেংদাচা আকং, তুখুউলি আম্মা মিহিক অর য়জংছুগিরা থাওরা ফোরা চিই প্যরি।
3ঙা থাওরা ফোরাগা প্রফুমিহিক য়জংজে ছুউক রাঃরি, য়াংচাগা নিংরো ঙা নাংরো তয়ক মক্যয়েংগু প্ররি, কুঃগো কুঃ মনক তয়ং আগ্রি ম্হেফু সাংরি য়াকথাকপাং অর আম্যা আগ্রিই মেম্হেকেকি। প্রফুছুগি মনক তয়ং আসুং ওয়ংরিলি, য়হ্লকরা চিইমা ম্হে থাঃফি। থাওরা ফোরা যাসুগো মনক তয়ং চিই ক্যুং আঃ পিইলিরিলি, য়াংচা থাক আম্যা তয়কলি মেম্হেকি। 4ঙারো আলুংসুউ কাইংথামা, জে জে অাঙ্গা হিকরি, য়িগিলি হিকচা আলুং আঙ্গাচা তেজেতৈং অলুক মলুক; 5য়াংচাঞ্যং তেথেং ঙারো লুঃউ আম্যা মিগিলি, খ্রীট্না পংলো, কাইংথা তেগেংথা ফ্রইরি। ঙারোমা আলুংসুউ তয়কনা তয়ক আছুয়ি আছাক হিকরি। 6থাওরা ফোরা ঈ ছুউক আতৈং ঙারো আখ্রা আখ্রা ছুউক রাঃগেরি। য়াং ল্হুচারা রিসিই প্যাংরো থাওরা ফোরা তাঃরাগো হঃপ্রাফু ক্ষেমতা ফ্রকিরা ছুগি, আক্যুং আলৈই য়াংসুউ থাওরা ফোরা ঈ তাঃরাগো হঃবেচি। 7অর য়াংচারা রুসিইফু ক্ষেমতা ফ্রকিরা, য়াংসুউ রুসিইবেচি। যাসুউ সুয়েংসাংফু ক্ষেমতা রাঃরি, য়াংসুউ সুয়েংসাংবেচি; 8যাসু লুঃউগো চিই আঃতুফু ক্ষেমতা রাঃরি, য়াংসুউ চিই আঃতুবেচি, যাসু লুঃউগো ল্হুফু ক্ষেমতা রাঃরি; য়াংসুউ চিই পব্রংনা পিইবেচি, যাসু গংখ্যুক ফ্রফু ক্ষেমতা রাঃরি, য়াংসুউ চিইকা নিংরো অলুক লুক; যাসুউ আখ্রা লুঃউগো কিজুপ্রুফু ক্ষেমতা রাঃরি, য়াংসুউ চিই আপ্যনা লুকপেচিই।
খ্রীট্গো আক্যুং হিকসারো বাওয়া
9আখ্য ওয়াসানামা ক্রং সুদ মিহিকরাঅং। যাচা মকংলি, য়াংচাগো মুংগে; যাচা আকংলি য়াংচাগো, তাদাং তিরো থাঃগে। 10তয়ককো তয়ক ঞিংনা আকুগোঞ্যং চিই আথিগা খ্যকে। কুঃগোথাক লুঃউ আম্যা ম্যাকন্হা পিই। 11থাওরা ফোরাগো য়ুউরো খ্যাংখামুছু নাংরো চিইমা রুসিইতারা হিকঅং। নাংরো চিই নুনুংচা রুসিইতারানা আব্রিচুং হিকবেচি। নাংরো আস্যাং অলুকমা ছাকছুয়িরো নিংগে। 12নাংরোমা হ্রিইদুঃ যা চিইমা ম্হেরো হিকরি, য়াংচা কিজু প্যগে। দুঃওখা-সুখাওয়াগো সিঃখেংগে। আরুয়ি আতুওয়ক মিহিক ছুঃউক তংগে। 13থাওরা ফোরা ঈ লুঃউরো দুঃখুওয়া ক্যাগি কিজু প্রুক্কে। আগেংদুরোগু রুসিইফুচাগো চিইমা থাঃগে।
14যাসুরো নাংরোগু ঞ্যচিইলুক্তি, য়াংসুউরোগু আকংগো পিইরো মকং ফ্রঅং চিইমা মতুওয়ককেকি। 15যাসুরো প্যগেতি, য়াংসুউরোনা আতু প্যগে, যাসুরো ঙুরি, য়াংসুউরোনা আতু ঙুগে। 16নাংরো তয়ককু তয়ক চিই চিইদানাচা তেজেতৈং ফ্রঅং। আগ্রি লুঃউঞ্যং চিইকু মাপ্রাব্রি, যাসুরো আগ্রি লুঃউ মুহুক য়াংসুউরোনা পংগে। কুঃগোকুঃ পুয়েংঞাস্যাং মুতুওয়ককি।
17লুঃউ মকং প্যাংরিলুঃ, কুঃলি মকং মাপ্যাংগি। আলুংসো ম্যাকচিমা যাচা আকংলি, য়াং আক্রংলিলাগো য়ুউরো চিই খ্যাগে। 18নাংরোগা নিংরো মনক তয়ং নৈরিলি, আলুংসো লুঃউনা আখেংসা প্যারো নিংগে। 19আখ্য ঞিং আকুরো, নাংরো কুঃদৈং লাক মাছাককি, প্রফুছুগি থাওরা ফোরাগো লাক ছাকফু পিই। সেংস্যাংস কেইংমা আস্যাং প্ররি, “মকং মাসাংগো ডেং পিইফু তাওয়েংচা ঙামারা হিকরিব্যা, যাসু যা রাঃফু থঃতেংরিলি, য়াংসুউগো ঙা য়াংচা পিইফু।” 20কেইং চাউ আতৈং, “নাং রেংসুউ ওয়েং ম্যুয়েকি, য়াংসুউগো চাঃফু পিই। য়াংসুউ রিঃসক ম্যুয়েকি, রিই পিই। দিঃ পুয়েং লুক্কি নাং য়াংসুউ আগংমা মুসুয়িই মিং পুংরো থাঃরিন্হাক তুয়িইরি।” 21মকং অলুকমা কুঃগো মুস্যুইংজিগি, প্রফুছুগি আকং লুকরোরা মকংগো চঃছৈইংলিই।
Currently Selected:
রোমীয় 12: BBSRMZ
Highlight
Share
Compare
Copy
Want to have your highlights saved across all your devices? Sign up or sign in
