রোমীয় 11
11
ইস্রায়েল জেঃম্যুও কিজু থাওরা ফোরা ঈ মিত্তা
1য়জংছুগি ঙা মিংচাগা, থাওরা ফোরা কোঃ লুঃউরোগু লাক মাখেংলি লঃ? তাখালি মুহু। ঙা কুঃদৈং তয়ক ইস্রায়েল লুঃউম্যুও, অব্রাহাম্মা আচৈংমা বিদ্যামীন আচৈং লুঃউ। 2থাওরা ফোরা য়াংসুউ যা লুঃউরোগু আয়াং কাবাং রুইকক য়ুলিরি, য়াংসুউরোগু লাক মাখেং মাপ্যাংলি। রিঃসি এলিয় আক্রংলিলাগো সেংস্যাংস কেইং চাউ, যা প্রলিরি নাংরো মিসিকগে লঃ? য়াংসুউচা ইস্রায়েরোগু য়ুউরো থাওরা ফোরা বামা ছেংগ্যাংফাক লুকলিইরি। 3“ফোরা, দিঃ লুঃউরোচা কুঃবাং রিসিইরোগু সেঃ বলৈতি অর কুঃবাং ক্যংগো ফ্রোবলৈতি। ঙারা তয়ক হিলৈতিব্যা। অর ঙাগোলি য়াংসুউরো সেঃ বৈফু ক্রেংগেলিরি।” 4ছুগি থাওরা ফোরা এলিয়গো যা আফ্রি পিইলিইরিলি? থাওরা ফোরা প্রলিরি, “খঃনথং লুঃউগো ঙা ঙাবামা থলৈতি, যাসুরো বাল্ নেঃকু মুরুসিইগে।” 5থাওরা ফোরাচা য়াংচাঞ্যং তেথেং ইস্রায়েরোগা কংগং ছাংখ্রাংলো তুফু লুঃউরোগু রুইকক থাঃলিরি। 6থাওরা ফোরারা ওয়াসানা ফ্রইরো আহ্রাং থাঃলিরি, য়িগিলি প্রফুছুগি য়াংচাচা তুখুউলি অলুক কিজু মুহু। য়জংরা ছুগি, ওয়াসানাচা অর ওয়াসানা মিহিকম্যুব্যা।
7য়জংছুগি ম্রাংরিচাগা, ইস্রায়েরো যা রাঃফু কিজু ক্রেংগেলিরি, য়াংসুউরো য়াংচাগো মাঃরাগেলি। ছুগি থাওরা ফোরা যাসুরোগু রুই থাঃলিরি, য়াংসুউরোরা য়াংচাগো রাঃগেলিরি অর আখ্রা লুঃউরো চিইচা ক্যকঞ্যং কেগেং ফ্রঃ লাঃখারি। 8সেংস্যাংস কেইং চাউমা রুইরো হিকরি, “থাওরা ফোরাচা য়াংসুউরো চিইকো কংগং মঃমই প্যাংলিরি, য়াংসুউরো আগুতয়ং ম্যাকচিইগা ম্রাংরোলি, মাম্রাংঞ্যংব্যা অর নাঃগা ক্রাগিলি মাক্রাঞ্যংব্যা।” 9দায়ুদ মাংলি প্রলিরি,
য়াংসুউরো আঃচা যাগা রাঃরিলি,
য়াংচাচা কৈং অর কুওয়েংঞ্যং ফ্রলি;
য়াংচারোচা, য়াংসুউরোমা খুরোক তঃচা আক্রংরা ফ্রলিফি,
অর য়াংসুউরো যা রাঃথতিলি, য়াংচা রালিফি।
10য়াংসুউরো ম্যাকচি আকেইংরা ফ্রলিফি
যাফুলিছুগি ম্যাকচি মাম্রাংরাঅং,
অর খ্যাংখামুছু য়াংসুউরো ক্যকছঃমা তুংনারা কেলিফি।
11য়জংছুগি যিহুদীরোচা খুঃরোক তঃরো, তাসাক পেলুং কিজু লেংখারি লঃ? তাখালি মুহু, প্রফুছুগি য়াংসুউরো আপ্রই কিজুরা যিহুদীমুহুরো ক্যুওয়েম্রকফু আঃলি রাঃগেরি, যাফুলিছুগি যিহুদিরোমালি চিই নুঃগেঞ্যং। 12য়জংছুগি ম্রাংচাগা, যিহুদীরো আপ্রই কিজু, কাবা লুঃউরোমা আম্রে ফ্রইকেরি, হকতি, য়াংসুউরো প্যাকরি কিজুরা যিহুদীমুহু লুঃউরোমা আম্রে ফ্রক্কেরি। য়াংচা কিজু যিহুদিরো আঃপমা যাখা থাওরা ফোরা ঈ আব্রিচুং ছুউকচা ক্যাফুলি, য়াংখা য়াংসুউনা আতু যিহুদিমুহুরো কিজু অরলি মন্হক তয়ং ছুক লেফুলি প্রফুমারা!
যিহুদিমুহু লুঃউরো ক্যুওয়েম্রক খ্রাং
13যিহুদিমুহুকরো, ঙা নাংরোগু প্ররি, যিহুদিমুহুক লুঃউরোবামা তেমেংদ ফ্রইরো, ঙা ঙামা অলুককো কংগং ম্যাকন্হা পিইরি। 14য়জং প্যাংরো ঙা ঙামা জে লুঃউম্যুরো চিইকু নুওতাংরো, লৈগায়ককু মিগিলি খ্যুওয়েনৈঅং। 15থাওরা ফোরাচা যিহুদিরোগু লাক মাখেংলিরো, কাবামা আখ্রা লুঃউরোনা থাওরা ফোরা পংক্যাগি, য়াংখা থাওরা ফোরা, যাখা যিহুদিরোগু লাক খেংগি, য়াংখা য়াংসুউরো যা ফ্রফুলি? য়াংখা য়াংসুউরো আঃসিই বাওয়াগো রাখ্রাংনা মুতুউব্যা লঃ?
16ভংমু ময়দ্যাগা, লুকচা পাথামা ভংমুকচা সেংস্যাংজ ফ্রইতি ছুগি, য়াংদে হিকচা ময়দ্যাচা সেস্যাংজ। জলপাই আপাং আরাংরা সেংস্যাংজ ছুগি, য়াংসুউমা আখাক আলাক আলুংচালি সেংস্যাংজ। 17ছুগি য়াং জলপাই আপাংমা লৈংখাক খ্যুও বৈরো, য়াং আরামা নাকঞ্যং তেথেং তঃ জলপাই আপাং আখাককো ছাকলৈকি অর নাং আম্হেং চাংজ জলপাই আপাংগা আঃরি খেংগি, 18য়াংখা খ্যুও বলৈচা আখাক থাক কুঃগো আগ্রি মেম্হেকি। ম্হেকি, চিইমা ম্হেফুচাগা, নাং আম্রকো তাঃরো মাঃথা, আম্ররা নাককো তাঃরো থাঃচা।
19য়জংছুগি নাং প্রনৈরি, “ঙাগো ছাকফু কিজুরা আখাক আলাককো খ্যুও বলৈতি।” 20কংরি, য়িগিলি, য়াংসুউরোগু খ্যুও বলৈচাগা, য়াংসুউরোমা আক্যুং মিহিককিজু অর নাং য়াংদেমা ছাকরো হিকরি নাক আক্যুং কিজু। য়াংদেমা বরি মাপ্রাব্রি, আস্যাংগো রুসিইতারানা ক্রকচা কংরি, 21আক্রংগা থাওরা ফোরা যাখা আম্হেং আখাকরোগু মাঃথালি, য়াংখা নাককোলি মাঃথামু। 22য়জংকিজু থাওরা ফোরাচা মন্হক তয়ং আকং অর ক্রকফু কংরি, য়াংচাগো তখকরা চেংজারো ক্রি। যাসুরো ক্যাখাব্যা, য়াংসুউরো কিজু থাওরা ফোরাচা কংগং কেগেং, য়িগিলি নাককো থাওরা ফোরাচা ওয়াসানা হিকরি, নাংরা থাওরা ফোরা ওয়াসানামা নিংরিছুগি। য়াংচা মুহুকি নাককোলি মাঃথামুব্যা। 23অর য়াংসুউরোরা মক্যুং আঃরাগা প্রেংগি য়াংখারা য়াংসুউরোগু কুঃদৈং আপাংমা প্রেংরো ছাকফু আক্রংগা দিঃ ছাকফু অলুককো থাওরা ফোরারা নৈরিব্যা। 24প্রফুছুগি নাংচা তঃমা জলপাই আপাংমা আখাক হিকলিরি অর য়াং আপাংগা নাককো, খ্যুও য়ুউরো, ওয়িয়েংমা জলপাই আপাংমা মেতেংঞ্যং প্যাংরো ছাক লিরি। য়জংছুগি যাসুরো য়াং আপাংমা আম্হেং আখাক আলাক হিকলিরি, য়াংসুউরোগু কংগং আল্হাপা প্যাংরো য়াংসুউরোগু কুঃদৈং আপাংমা প্রেংরো ছাকফু।
আলুংসুউ আঃপমা থাওরা ফোরা ঈ ওয়াসানা
25ঞিং আকুরো, নাংরো কুঃগোকুঃ পুয়েংঞাস্যাং মাথাংগেকি, য়াংচা কিজু ঙা তুখু ওয়েংথিমা থাঃচা আম্হেং তুখুকগো আসি পিইরো থাক্যাংরি। য়াং আম্হেংচা ফ্রত্তি, যিহুদীমুহুক লুঃউরো গেনেং আব্রিচুং মফ্রসাগ্রা ইস্রায়েল লুঃউরোমা চিইচা কেগেং ফ্রইরো হিকফু। 26অর দিঃ পুয়েং প্যাংরো হিকচা আলুং ইস্রায়েল লুঃউম্যুচা ক্যুওয়েম্রককো রাঃফু। সেংস্যাংস কেইং চাউমা রুইরো হিকরি,
সিয়োংগা ক্যুওয়েম্রক পিইসুচা লাঃফু; য়াংসুউচা যাকোব আচৈং লুঃউরোগা, ঙাগো মুরুসিচাগো পিঃবলৈফু। 27ঙা যাখা য়াংসুউরো আপ্রইকো পিঃবলৈফু য়াংখা য়াংচারা ফ্রইফু, য়াংসুউরো আতুওয়ক ঙাগা ছুউক।
28আকং সাদাংগা নাংরো আকং তারা কিজু, য়াংসুউরো আগু থাওরা ফোরাবামা রেংসুউ। য়িগিলি থাওরা ফোরা রুইকক য়ুউচাগা আচৈংরো কিজু য়াংসুউরো থাওরা ফোরামা আখ্য লুঃউ। 29থাওরা ফোরা যা ল্হুরিলি অর যাসুগো খঃরিলি, য়াং আক্রংলিলাগো য়ুউরো থাওরা ফোরা চিইচা তাখালি মিহ্লি। 30প্রফুছুগি নাংরো তারাক থাওরা ফোরাবামা চাঃগা মুকৈং হিকলিরি য়িগিলি যিহুদিরো চাঃগা মুকৈং কিজু আগু থাওরা ফোরা ঈ আখ্যকো রাঃরি, 31য়াংচাঞ্যং তেথেং নাংরো আখ্য রাঃরিলো, য়াংসুউরোলি আগু চাঃগা মুকৈং ফ্রইরি, যাফুলিছুগি য়াংসুউরোলি আগু আখ্য রাঃনৈংরি। 32থাওরা ফোরাচা আলুংসুউ আখ্য প্রানৈঅং, য়াংচা কিজু থাওরা ফোরাচা আলুংসুউ চাঃগা মুকৈং প্যাংরো খ্যয়েং থাঃরি।
33থাওরা ফোরামা ওয়াচাচা কুংরিলো মিহিক। থাওরা ফোরামা পৈঞা- পিদিইচা কংগং আনাক! য়াংসুউ তাঃরা অর আলুং অলুককো মানালিনৈং। 34যাসুউ আস্যাং ফোরা চিইদানাগো সিকনৈংরিলি? অর যাসুউ থাওরা ফোরাগু আক্রেং পিইরিলি? 35থাওরা ফোরাগো ছেংগ্যাংফাক লুকরো যাসুউ আতং হিকরিলি, য়াংসুউ আতংগো লাক খেংরাফুঞ্যং? 36আলুংচাগা য়াংসুউগা লাঃচা অর য়াংসুউগা নিংরোরা লাঃচা। হিকচা আলুংচা য়াংসুউ কিজু, তাসাকপেলুং খিম্যুয়েংগে। আমেন।
Currently Selected:
রোমীয় 11: BBSRMZ
Highlight
Share
Compare
Copy
Want to have your highlights saved across all your devices? Sign up or sign in
