রোমীয় 1
1
ক্রুছুবারি
1ঙা খ্রীট্ যীশু ক্যুয়েং পৌল রোম ম্রুমা খ্রীট্গো ক্যুংসা লুঃউরোবাদুঃ দিঃ চাঃ রুঅক্কু রুইরি। য়াংসুউ তেমেংদ ফ্রইফু কিজু থাওরা ফোরাচা ঙাগো খঃলিইরি অর য়াংসুউ পিইচা আকং সাদাংগো হঃ প্রাফু কিজু ঙাগো রুইকক য়ুলিরি।
2থাওরা ফোরাচা য়াংসুউ রিসিইরো আতুওয়ংগা নিংরো সেংস্যাংস কেইং চাউমা হ্রিইগাকাবাং দিঃ আকং সাদাংমা কিং কৈংলিরি। 3-4য়াং আকং সাদাংচা ফ্রইতি য়াংসুউ সাঃদ আক্রংলিলা। য়াং সাঃদচা যীশু খ্রীট্, ঙারোমা আস্যাং। আচৈংগা নিংরো প্রফুছুগি য়াংসুউ হিকলিরি মাং দায়ূদ আচৈং অর য়াংসুউ সেংস্যাংস ওয়িঞেং ফাক্কাগা য়াংসুউ মহা তেংখুংগ্রিনা আসিইগা আহ্রাং ফ্রইরো থাওরা ফোরামা সাঃ-ঈ ছুরো তাং প্রালিইরি। 5য়াংসুউ আতুওয়ংগা নিংরো, য়াংসুউ নাঃমি কিজু ঙারো আখ্য ওয়াসানা তেমেংদ তাওয়েংগো রাঃলিরি। যাফুলিছুগি হিকচা আলুং জে ম্যুওগা লুঃউরো ক্যুংরো থাওরা ফোরা-ঈ তাঃরাগো চংস্যকঞ্যং। 6য়াং লুঃউরো আতুওয়ংমা কুঃরোলি হিকরি। যীশু খ্রীট্মা তিবি ফ্রইফু কিজু থাওরা ফোরা কুঃদৈং কুবাংরোগু খঃলিইরি।
7রোম ম্রুমা যা লুঃউরোগু থাওরা ফোরা ওয়াসানা হিকরিলি অর য়াংসুউ কুঃদৈং তিবি ফ্রইফু কিজু খঃলিইরি, য়াংসুউরো আলুংসোবামা প্রফুছুগি কুবাংরোবাদুঃ ঙা দিঃ চাঃ রুঅক্কু রুইরি। ঙারোমা ফাখাং থাওরা ফোরানা আস্যাং যীশু খ্রীট কুবাংরোগু মিত্তানা ঈখিয়েং থাঃবাজি।
পৌলচা রোমদুঃ লাঃখ্যাংরি
8পাথামা চাঃরু ঙা যীশু খ্রীট্ আতুওয়ংগা নিংরো কুবাংরো আলুংসো কিজু ঙা থাওরা ফোরাগো কিজু তাংবারি, আক্রংগা কুবাংরো ক্যুংগেচা চাঃগাচা কাবালুং ক্যঞা লাঃখাব্যা। 9থাওরা ফোরা সাঃ-ঈ আক্রংলিলা আকং সাদাংগো হঃ প্রারো ঙামা হিকচা চিই নুনুংনা ঙা থাওরা ফোরাগো রুসিইরি। ঙা মঃনপ্রেং ছুউক তংরিলি, য়াল্হকপ্রেং নাংরো চাঃগাগো তুওয়ক ক্যারি, ঙা লিংরিরাছুগি থাওরা ফোরা সাকসি হিকরি। 10ঙা ছুউক তংচা ফ্রইতিগা, থাওরা ফোরা চিইদানানা ঙা তখক মিগিলি, কুবাংরোবাদুঃ লাঃনৈঅং। 11কুবাংরো চিইদানাগো তাং পিইফু কিজু, তুখুমাসা ওয়িইঞেং ল্হুফুচা কুবাংরো ঙা আতুওয়ংগা রাঃগেঞ্যং, য়াংচাকিজু ঙা কুবাংরোনা আতুয়িই খেংখ্যাংরি। 12দিঃ চাঃগা আদিপি ফ্রইতিগা, ঙারো আলুংসো তয়ক্কা তয়ক আক্যুং রাঃরো চিই আঃ ক্রিগেঞ্যং।
13ঞিং আকুরো, ঙা লাখ্যাংচাগোগা সিকগেতি, আপ্রেইং আপ্রেইং ঙা কুবাংরোদুঃ লাঃফু চিই ম্হেকিলি, জে জে আছিঃ ক্যারো মাঃলানৈং ফ্রইতি। আখ্রা আঃরামা যিহুদীমুহু লুঃউরোবামা তাঃরা হঃ প্রারো মন্হক তয়ং আক্যুও রাঃরিলি, য়াংচা পুয়েং কুবাংরো বামালি, তেঃকে তুবুয়ি আক্যুও রাঃমি ম্হেরো, কুবাংরোবাদুঃ লাঃফু ম্হেলিরি। 14অহং-অসঃ, চাঃ তেঃসা মেতেঃসা, আলুংসোউ বামা ঙা কিজু হিকরি। 15য়াংচাকিজু কুবাংরোমা যাসুরো রোম্মা হিকরি, কুবাংরোবামালি যীশু খ্রীট্ আক্রংলিলা আকং সাদাংগো ঙা হঃ প্রাখ্যাংরি।
আকং সাদাং গুং
16যীশু খ্রীট্ আক্রংলিলাগো য়ুউরো যা আকং সাদাং য়াংচাগো য়ুউরো ঙামা তেঃকেলি আহ্রাক মিহিক। আক্রংগা দিঃ আকং সাদাংচা ফ্রইতি থাওরা ফোরা ঈ তেংখুংদ আঃ, য়াং গুংধ আঃনা য়াংসুউ ক্যুংসারোগু আপ্রইইকা খ্যুওয়েতাংরি- পাথামাগা যিহুদীরোগু, য়াংনক যিহুদীমুহু লুঃউরোগু। 17থাওরা ফোরা যাপুয়েং লুঃউরোগু আপ্রইস্যাং মুহুছুরো লাকখেংচা চাঃগাচা দিঃ আকং সাদাংমা তাং প্রালিইরি। পাথামা কাবাং আছুং তৈঅং ক্যুংসু লুঃউরোগু সাসাক আপ্রইস্যাং মুহুছুরো লাক খেংলিরি। সেস্যাংস কেইং চাউমা রুইরো হিকরি, “যাসুউগো আপ্রইস্যাং মুহুছুরো লাকখেং য়ুরি, য়াংসুউ ক্যুংচাগা নিংরোরা তিম্রিজ বাওয়াগো রাঃফু।”
লুঃউরোচা আপ্রইস্যাং
18থাওরা ফোরা আম্হেং চিইদানাগো, লুঃউরো মাঃতারানা ফুংরো থাঃগেতি। অর য়াংচা কিজু থাওরা ফোরাগো রুসিইতারা নইংরিব্যা অর হিকচা আলুং আপ্রই কিজু সাগ্রাফুংগা লুঃউ আঃপমা থাওরা ফোরা ঈ মকং চিইদানাগু ম্রাংরারি। 19থাওরা ফোরা ঈ আক্রংলিলাগো যা ল্হকপাং সিকফু রাঃরিলি, য়াংচা লুঃউরো দিইথা দেংমা সিকরি। আক্রংগা থাওরা ফোরা য়াংসুউরোবামা দিইথা দেংমা প্রালিইরি। 20থাওরা ফোরা ঈ যা গুংদরোগু ম্যাকচিইনা মাম্রাংরা, প্রফুছুগি থাওরা ফোরা ঈ তিম্রিজ গুংদনা য়াংসুউ সাগ্রা ঈ আক্যাং কাবা তিরিকাবাং কংগং আহ্লা প্যাংরো আম্রাং রাঃলিরি। য়াংসুউ তিম্রিরিকাবাং লুঃউরো, য়াংচাগো আহ্লাপা সিকরি। য়াংনক অর লুঃউরোমা তুখুউলি আপ্রই তাংজারা মিহিকব্যা। 21লুঃউরো য়াংসুউ আক্রংলিলাগো সিব্রিনকলি থাওরা ফোরা ছুরো, য়াংসুউগো খিঃম্যুয়েং মুপ্রুকেলি অর কিজুলি মাতাংগেলি। য়াংসুউরো চেংজাখ্রাংচা আম্রি মিহিক ফ্র লাঃখাব্যা। অর য়াংসুউরোমা পৈঞামিহিক চিইদানাচা মঃমই ফ্র লাঃখাব্যা। 22ছুগি য়াংসুউরো কুঃদৈং পৈঞাহিক খেংগিলি, য়িগিলি আম্হেংচা ফ্রইতি য়াংসুউরো আহ্নেং ফ্রই লাঃখাব্যা। 23তিম্রিজনা গুংধ প্রিজুংরি থাওরা ফোরা ঈ ওয়িপাসাগো থাঃরো, য়াংসুউরোমা আম্রি মিহিক লুঃউ, ঙাক, সুদুওয়া অর রাংনা লাঃচা সুদুওয়ারো পুংগো রুসিই প্রুক্কেতি।
24য়াংচা কিজু থাওরা ফোরাচা লুঃউরোগু, য়াংসুউরোমা চিইদানামা যা পুয়েং তুওয়কতিলি য়াং পুয়েং মকংদিরি অলুককো লুকচিইরিব্যা। য়াং আক্রংনা য়াংসুউরো তয়কনা তয়ক মকংদিরি অলুককো লুকরো কুঃদৈং কেইংথাগো ম্যাকন্হা মিপিইগে। 25থাওরা ফোরা ঈ আম্হেংগো থাঃরো য়াংসুউরো আলিংগো লাক খেংগেতি। থাওরা ফোরাগো থাঃরো, য়াংসুউরো কুঃদৈং লুকচা ওয়েংগো রুসিইগেতি, য়িগিলি তাসাকপেলুং খিম্যুয়েংফুচা থাওরা ফোরা ঈ রাঃথৈতি। আমেন।
26লুঃউরো দিঃ অলুকরোগু লুকতি ল্হু, থাওরা ফোরাচা সিরিঃ আহ্রাক প্রিজুংরি আলাকমা য়াংসুউরোগু রুওয়েলৈতিব্যা। মাঃমারো তয়ং য়ক্ক্যানা যা পুয়েং সাং থঃতেংরিলি য়াংচাগো পিরো আখ্রা মিঃমারোনা মাসাংরি থঃতেং মকং অলুককো লুক্কেতি। 27য়ক্ক্যারোলি য়াংসুউরোঞ্যং তেথেং মিঃমারোনা সাং থঃতেংরিগো পিরো য়ক্ক্যারোনা কামা ফ্রইকেতি। য়ক্ক্যা য়ক্যানা সিরিঃ আহ্রাক অলুক লুক্কেতি। য়াংচা কিজু য়াংসুউরো তয়ক মুক্যুয়েং, কুঃদৈং অলুকমা আপ্রই ডেংগো কুঃখ্যাং কুঃ রাঃগেতি।
28দিঃ পুয়েং লুঃউরো থাওরা ফোরাগো রোসিইফু মিক্রি কিজু, সাগ্রাংমাংলি আপ্রই প্রিজুংরি আলাকমা য়াংসুউরোগু রুওয়েলৈতিব্যা। অর য়াংচাকিজু লুঃউরো মাসাংরি অলুককো লুক্কেতি। 29হিকচা আলুং মাসাংরি অলুক, মকংচা, লঃফা, অকক্যাচা, মুংচা, সেঃখ্রাং, অঃবু-অাঃসে, লিংচানা আখ্রা লুঃউরোগু মকং প্যাংফু চিইদানাচা য়াংসুউরোমা প্রিজুংব্যা। য়াংসুউরো আখ্রা লুঃউ আক্রংলিলাগো য়ুউরো আছুয়িঞি প্যাংগেতি, 30আখ্রা লুঃউগো মুংগেতি অর থাওরা ফোরাগোলি মুংগেতি। য়াংসুউরো মেংডাং, ভরিনা অক মাখেংচাজে। মকং অলুক লুকফু কিজু য়াংসুউরো অসঃ অসঃ আখ্রেং থুঃউত্তি। য়াংসুউরো মিখাং ফাখাং চাঃগাগো মুকৈং, 31অকং মকং পৈঞা য়াংসুউরোমা মিহিক অর য়াংসুউরো মক্যুং থঃতি লুঃউ। ইংসারো কিজুলি য়াংসুউরোমা আখ্য ওয়াসানা মিহিক অর য়াংসুউরো চিইদানামা আখ্য মিত্তা মিহিক। 32থাওরা ফোরা ঈ দিঃ তাঃরাদ চাঃগাগো য়াংসুউরো কংগং আহ্লা সিকচাগা, দিঃ পুয়েং অলুকরোগু যাসুরো লুকতি, য়াংসুউরোগু সেঃ বৈফু ডেং হিকরি। দিঃ চাঃগাগো য়াংসুউরো সাসাক সিকরো দিঃ পুয়েং অলুকরোগু লুক্কেতি য়াংচা মুহু, প্রফু্ছুগি যাসুউরো লুক্কেতি, য়াংসুউরোগুলি আঃ পিইগেতি।
Currently Selected:
রোমীয় 1: BBSRMZ
Highlight
Share
Compare
Copy
Want to have your highlights saved across all your devices? Sign up or sign in
