রোমীয় 2
2
থাওরা ফোরামা থতেংচা তাঃরা
1তয়কমুসুরা ইদে আখ্রা লুঃউরোগু আপ্রই পিইগি, য়জংছুগি ঙা য়াংসুউগো প্রফুচাগা, নাকমা কুঃদৈং আলিং প্রাফুচা যামালি? যাখা নাং আখ্রা লুঃউরোগু আপ্রই তাংরি, য়াংখা নাং কুঃদৈং আপ্রইস্যাং ছুরো তাং মাপ্রা লঃ? নাং আখ্রা লুঃউরোগু আপ্রই তাংরি, অর দিঃমা ক্রিগি নাং কুঃদৈং য়াং অলুককো লুকতি। 2ঙারোলি সিইরি যাসুরো দিঃ পুয়েং অলুককো লুকতি, থাওরা ফোরা য়াংসুউরোগু থঃ তেংরি তাঃরানা তাঃরা চৈতি। 3যা অলুক কিজু নাং আখ্রা লুঃউরোগু আপ্রই তাংরি, য়াং পুয়েং তেথেং অলুক যাখা নাং কুঃদৈংলি লুকতি, য়াংখা নাং থাওরা ফোরা পিইচা ডেংগা রুওয়েফু ম্হেতি লঃ? 4নাংগা থাওরা ফোরামা হিকচা অখ্য সাঃনা, সিঃখেং তাঃরানা কংগং সিঃখেংচাগো তুখুমুহু তুওয়কলিরি। নাং মিই্ লাঃখাব্যা, থাওরা ফোরা ঈ দিঃ অখ্য ওয়াসানা আঃদিপি ফ্রইতিগা-নাক্কু আপ্রই চিই্কু প্রেং য়ুউখাফুচা ফ্রইতি। 5য়িগিলি নাক চিইচা কংগং কেগেং; নাংগা আপ্রইইকা চিই মাপ্রেংখ্যাং। য়াংচা কিজু থাওরা ফোরা যাখা নাংরো আঃপমা মেং ফ্রফু, য়াংরাক কিজু নাং নাকমা ডেং রাঃফু অাপ্রইকু খেংরো থাঃরি। য়াং রাকমারা থাওরা ফোরা ঈ থতেংচা তাঃরাগো ম্রাংরামি। 6য়াংসুউ তয়ক মুক্যুয়েংগো কুঃ অলুকতৈং য়াংসুউরোগু আক্যুও পিইফু। 7যাসুরো সিঃখেংরো আকং অলুক লুকরো থাওরা ফোরাগা খিম্যুয়েংফুচা, ম্যাকন্হা রাকচানা আম্রি হিকরি বাওয়াগো রাঃখ্যাংরি, থাওরা ফোরাগা য়াংসুউরোগুরা আম্রিহিজ বাওয়াগো পিইরি। 8য়জংছুগি যাসুরো কুঃদৈং চিইদুওয়ক লুক্কেতি অর আম্হেংগো মুসোংব্রি মেমেংগো সোংগেতি, য়াংসুউরোগু থাওরা ফোরা কংগং আগ্রিকি ডেং পিইফু। 9যাসুরো আপ্রই লুকরো নিংগেতি, য়াংসুউরো তয়ক মুক্যুয়েং দুঃখাওয়ানা ফিই ছংফু- পাথামা যিহুদীরোমা, য়াং নক যিহুদীমুহু লুঃউরোমা। 10ছুগি যাসুরো আকং অলুক লুকতি য়াংসুউরো খিম্যুয়েংফুচা, ম্যাকন্হা রাঃফুচানা আখেংসাগো রাঃমি- পাথামা যিহুদীরো, য়াং নক যিহুদীমুহু লুঃউরো। 11দিঃ অলুকমা ক্রিলৈকি, থাওরা ফোরা ঈ চিইদানাচা আলুংসো কিজু তিজিতৈংব্যা।
12মোশি আক্যাং আওয়ে প্রাংগা হিকখা যাসুরো আপ্রই লুক্কেতি, য়াংসুউরোচা আক্যাং ওয়ে মিহিংব্রি প্যাকরো প্যক লাঃফু। ছুগি যাসুরো আক্যাং ওয়েমা নিংরো আপ্রই লুকতি, য়াংসুউরো তাঃরাচা আক্যাং ওয়ে আতুওয়ংগা নিংরো তাঃরা চঃফু। 13যাসুরো সাসাক আক্যাং ওয়েকো নাথংরি, য়াংসুউরোচা থাওরা ফোরাবামা আপ্রই মিহিকলুঃ মুহুক, য়িগিলি যাসুরো আক্যাং ওয়েকো সোংগেতি, য়াংসুউরোরা থাওরা ফোরাবামা আপ্রই মিহিকছুরো লাক খেংফু। 14যিহুদীমুহু লুঃউরোচা মোশি আক্যাং ওয়েকো মাঃরাগেলি, য়িগিলি য়াংসুউরো যাখা কুদৈংগা নিংরো আক্যাং ওয়ে অলৈই অলুক লুকতি, য়াংখা আক্যাং ওয়ে মাঃরাব্রি মিগিলি য়াংসুউরো কুঃদৈং কুঃরোবামা আক্যাং ওয়ে ফ্রইকেতি। 15য়জংছুগি ম্রাংরিচাগা, আক্যাং ওয়ে অলৈই যা লুকফু সাংরি য়াংচা য়াংসুউরো চিইনুন্হুংমা রুইরো হিকরি। য়াংসুউরোমা চিইদানালি য়াংচাঞ্যং তেথেং সাকসি পিইরি। য়াংসুউরো চেংজাযা আখা আখা য়াংসুউরোগু আপ্রই স্যাং প্যাংরি। অর আখা আখা য়াংসুউরো ব্রাক্কালি নিংরি। 16থাওরা ফোরা যানি যীশু খ্রীট্ আতুওয়ংগা নিংরো লুঃউরোমা স্যুও থাঃরো হিকচা আলুংচাগো তাঃরা চৈফু, য়াং রাকমারা য়াংচারোগু ম্রাংরাফু। ঙা যা আকং সাদাংগো হঃ প্রারিলি, য়াংচা পুয়েং থুউ তাঃরাচা ফ্রইফু।
আক্যাং ওয়ে অর যিহুদীরো
17নাং কুঃদৈং যিহুদী খেংরি মুলঃ? নাং মোশি আক্যাং ওয়েকো ক্যুংরি মুলঃ অর নাং কুঃদৈং থাওরা ফোরা ঈ রুসিইসাছুরো ভঃরি প্যাংরি। 18থাওরা ফোরা যা লুঃরিলি, নাং য়াংচাগো সিকরি অর যা কংরিলি য়াংচাগো লাক খেং য়ুরি, আক্রংগা আক্যাং ওয়েগারা নাং য়াং সুয়েংসাং রাঃচা। 19নাং তুওয়কতিচাগা, নাং আকেইংরোগু লেং প্রারি। নাং চেংজারো ক্রিলা, যাসুউরো মঃমমা হিকরি, য়াংসুউরোবামা নাংচা লালাংঞ্যংব্যা। 20নাং তুওয়কচাগা, যাসুরো মুতুওয়ক মাছাংখ্রাং, নাং য়াংসুউরো মকংগো সাং পিইরি অর যাসুরো আক্যাং ওয়ে আক্রংলিলা সুয়েংসাংচাগো মাঃরাগেলি, য়াংসুউরোগু নাং সুয়েংসাং পিইরি। আক্যাং ওয়েমা পৈঞানা আম্হেংচা হিকরি কিজুরা নাকমা দিঃ চেংজাখ্রাংরো হিকচা। 21ম্হেংরি, নাং যাখা আখ্রা লুঃউরোগু সুয়েংসাং পিইরি, য়াংখা কুঃদৈংগোলি যাফু সুয়েংসাং মিপিইলি? নাং হঃ প্রাচাগা, “মুখুগি,” য়িগি নাং কুঃদৈং মুখু লঃ? 22নাং হঃ প্রাচাগা, “কামিসুগো মুলুককি,” য়িগি নাং কুঃদৈং কামিসুগো মুলুক লঃ? নাংগা আলাকনা লুকচা পুংগো মুংরি, য়িগি নাং কুঃদৈং য়াং পুং হিকচা ক্যংমা লাঃরো মুখু লঃ? 23আক্যাং ওয়েকু য়ুউরো নাং ভঃরি প্যাংরি, য়িগি নাং কুঃদৈং আক্যাং ওয়েকু মুসোংব্রি থাওরা ফোরাগো ম্যাকন্হা মিপি মুলঃ? 24সেংস্যাংস কেইং চাউমা দিঃ চাঃগাচা রুইরো হিকরি, “নাংরো কিজুরা যিহুদীমুহুক লুঃউরোচা থাওরা ফোরাগো মুংগেতি।”
25নাংরা আক্যাং ওয়েকু সোংরিছুগি, নাকমা স্যুও ফিয়া আরিইগো ফ্রেচা আদিপিচা ম্হেংরি। য়িগি আক্যাং ওয়েকুরা মুসোংছুগি নাকমা স্যুও ফিয়া আরিইগো ফ্রেকিলি, থাওরা ফোরাবামা নাং স্যুও ফিয়া আরিইগো মেফ্রেচা লুঃউঞ্যংব্যা। 26য়াংচা কিজু তয়ক স্যুও ফিয়া আরিইগো ফ্রেচা লুঃউরা আক্যাং ওয়েকো সুংরিরাছুগি, থাওরা ফোরাচা য়াংসুউগো স্যুও ফিয়া আরিইগো ফ্রেচাঞ্যং লুঃউছুরো মকৈংব্যা লঃ? 27নাকমাগা রুইরো হিকচা আক্যাং ওয়েচা হিকরি অর নাকমা স্যুও ফিয়া আরিইগোলি ফ্রেরো হিকরি। য়িগিলি নাংরা আক্যাং ওয়েকো মুসুংছুগিরা, যাসু স্যুও ফিয়া আরিইগো মিহ্লিসি য়িগিলি আক্যাং ওয়েকো সুংরি, য়াংসুউচা আক্যাং ওয়েকো মুসুংছুরো নাক্কু আপ্রই মাখ্যাব্যা লঃয়ি? 28যাসুগো প্রাংগা যিহুদী ম্রাংরিলি, য়াংসুউ আম্হেং যিহুদীমুহু ফ্রনৈরি। কাইংথা প্রাংগা স্যুও ফিয়া আরিইগো হ্লিগিলি, আম্হেং আম্হেং স্যুও ফিয়া আরিইগো হ্লিরিব্যা মুহু। 29য়িগিলি চিইনুন্হুংমা যাসু যিহুদী, য়াংসুউরা আচৈ যিহুদী। স্যুও ফিয়া আরিইগো ফ্রেচা আম্হেং অলুককা চিইনুন্হুংমারা ফ্রইতি। য়াংচা ফ্রইতি চিইনুন্হুং অলুক ফ্রইনৈরি, য়াংচা চাউমা হিকচা আক্যাং ওয়েঞ্যং মুহু। দিঃ পুয়েং লুঃউচা আখ্রা লুঃউবাগা ম্যান্হা মাঃরা, য়িগিলি থাওরা ফোরাবাগা ম্যাকন্হা রাঃরি।
Currently Selected:
রোমীয় 2: BBSRMZ
Highlight
Share
Compare
Copy
Want to have your highlights saved across all your devices? Sign up or sign in
