रोमी 3
3
1ओःन्डु इःङे लाःना ताः यहुदी काःल्दीङ ची खे काःल्बा ले? ची खतना पेःसुनारा चीङ तामला खे ओःङ्गुबा ले? 2तेःन्दामरा लाःकासुना यहुदी ओःङ्गासुना माःङ्बुरा खालेइ याःबु तामक्या एः। थाम्जेर भन्दा तोःङ्ला नी कोन्ज्योइ यहुदीक्याला राःङगीइ लेःङ्गो क्याप च्योल्सी। 3खुङक्या नाःङ्ला लाःलेइ लाःलेइ वीश्वासयोग्य माःकाःल लाःना ची काःल्बा ले? खुङक्या वीश्वासयोग्य म्याः लाःसुनारा ची कोन्ज्योङ वीश्वासयोग्य मेःयुङ्बा ले? 4ओःन्डुबा इःङ्रा मीःङे, थाम्जेर मीःइ स्योप क्युःर्नाङ कोन्ज्योइ नाःमाङ स्योप मेःक्याःपए। छ्येइ पेज्याला खुङगीइ बारेला एःन्डुबा प्रुःदी एः,
“ख्याइ लाःक्योक ताम डीक्पु दु लाःती मीःक्याइ थोङेन एः।
ओःले मीःक्याइ ख्याला ठीम पेःगासुना ख्याइरा क्याःल्गेन एः।”#भजन ५१:४
5इःनाङ उःक्याइ माःरीक्पा पेःगासुना, कोन्ज्यो ताःरुङ ताःक्पा एः लाःकेन ताम तेङ्तेर्कुए लाःना उःक्याइ ची लाःचे ले? कोन्ज्योइ उःखाला सीःताङ पुङ्गासुना ची खुङगीइ उःक्याला माःइबा पेःउबा ले? लाःलेइ मीःक्याइ एःन्डुबारा ठीवा साल्गुए। 6ओःन्डुबा इःङ्रा मीःङे! ओःन्डु इःङे लाःना नी कोन्ज्योइ जाम्बुलीङगीइ मीःक्याला काःन्डुले ठीम पेःजे खुडो ले? 7ङाःइ स्योप क्युःर्कासुना, कोन्ज्योइ लेःङ्गो तेःन्दाम एः लाःती साङ्बुले थोङ्गुए लाःना, ओःले मीःक्याइ खुङला ताःरुङ माःङ्बु सेःसा पेःउए लाःना, चीले ङाःला ताःरुङ लाःयो पेःगेन्दी इःङे लाःती माःताक्पा च्याःङेन्दी? 8ओःन्डु इःङे लाःना, याःबु काःल्ज्युक लाःती माःइबा लेःगाक्यारा चीले मेःबेगेन्दी ले? चीङ मीःक्याइ ङीःइ ओःन्डुबा लाःकुए लाःती ङीःला माःताक्पा च्याःङ्गुए। एःन्डुबा माःताक्पा च्याःङेन मीःक्याइ ओः अनुसारकीइ सजाय ज्योर्केन एः।
ताःक्पा मीः सुङ म्याः
9ओःन्डु इःङे लाःना उः यहुदीक्या राःङ्सा क्युःपा भन्दा याःबु इःङे ले? ओःन्डुबा इःङ्रा मीःङे। यहुदी ओःले राःङ्सा क्युःपाइ मीःक्याङ लाःयोइ आङ्ज्या वाःला एः लाःती ङाःइ तोःङ्लारा लाःसीःङ्दी एः। 10छ्येइ पेज्याला एःन्डुबा प्रुःदी एः,
“ताःक्पा मीः सुङ म्याः, मेःराङ चीगकाङ म्याः।
11सेगेन्दी सुङ म्याः,
कोन्ज्योला छोल्गेन्दी सुङ म्याः।
12खुङक्या थाम्जेर आला ख्याम्दी एः,
खुङक्या थाम्जेर लेःगा म्याःक्योक काःल्दी एः।
सुइयाङ याःबु लेःगा मेःबेए, याःबु लेःगा पेःगेन्दी मेःराङ चीगकाङ म्याः।”#भजन १४:१-३; ५३:१-३
13“खुङक्याइ वाल्दोक नी खाफ्यादी ज्याक्योक तुःर्सा च्योःङ्रा इःङे,
खुङक्याइ चेइ स्योप्केरे तामक्या लाःकुए।”#भजन ५:९
“प्रुःलगीइ वीष खुङक्याइ खाला एः।”#भजन १४०:३
14“खुङक्याइ खा खाम्सी रा खेन्दी तामगीइ काःङ्दी एः।”#भजन १०:७
15“खुङक्याइ नी मीः सेचेला गेबु एः।
16खुङक्या काःला डोनाङ सीःङ्दा जोउए ओःले मीःक्याला तुःक्पु तेर्कुए,
17ओःले खाम्साङ्बुइ लाःम खुङक्याइ ङोःसेदी म्याः।”#यशैया ५९:७-८
18“ओःले खुङक्या कोन्ज्यो ङीमु तीबी चीगकाङ जीबा मेःबेए।”#भजन ३६:१
19छ्येइ ठीमगीइ ताम छ्येइ ठीमगीइ आङ्ज्या वाःला एःक्योक मीःक्याला लाःक्योक इःङे लाःती उःइ छोर्ती एः। ओः सोङ्गारा, थाम्जेर मीःक्या ङीमु लाःचेला चीङ मेःयोङेन एः ओःले थाम्जेर जाम्बुलीङगीइ मीःक्या कोन्ज्योइ तोःङ्ला ठीम पेःजेला लाःङ्कोःन एः। 20चीलेलाःना छ्येइ ठीमगीइ लेःगाक्या ङीःन्दी सुङ कोन्ज्योइ तोःङ्ला ताःक्पा ओःङ्जे मीःखुगेन एः, बरु छ्येइ ठीमगीइ उःक्या लाःयो पेःगेन्दी इःङे लाःती चीग्रा तेङ्गुए।
सेमल्हुक लुदी मीः ताःक्पा ओःङ्खुउए
21इःनाङ ताः छ्येइ ठीम म्याःबा पेःदीङ कोन्ज्योइ राःङगीइ तोःङ्ला मीःक्याला ताःक्पा जोउए लाःती खुङगीइ तेङ्तेर्ती एः। दीखो ताम छ्येइ ठीमला ओःले कोन्ज्योइ लेःङ्गो तेर्केन मीःक्याइ लाःती एः। 22एःन्डुले येशु ख्रीष्टला सेमल्हुक लुगेन थाम्जेरला कोन्ज्योइ ताःक्पा जोउए। कोन्ज्योइ तोःङ्ला थाम्जेर मीःक्या च्योङेम्बा एः। 23चीलेलाःना थाम्जेर मीःक्याइ लाःयो पेःदी एः, ओःले खुङक्या कोन्ज्योइ महीमाला लेप्चे खुदी म्याः। 24इःनाङ कोन्ज्योइ थाम्जेरला नीङ च्योःउए, ओःले खुङगीइ मीःक्याला अनुग्रह पेःदी येशु ख्रीष्टलाःम्ले खुङगीइ तोःङ्ला एःन्दाराङ ताःक्पा जोसी, चीलेलाःना ख्रीष्टकीइ उःक्याला लाःयोलाःम्ले थार्च्युदी एः। 25चीलेलाःना कोन्ज्योइ ख्रीष्टला उःक्याइ लाःयोइ क्षमा पेःगेन बली ओःङ्जेला ताङ्सी। ओः सोङ्गारा, येशुइ राःङगीइ ठा उःइ लागी स्याःल्च्युसी लाःती सेमल्हुक लुगेन थाम्जेरकीइ लाःयोइ क्षमा ज्योर्केन एः। कोन्ज्योइ राःङगीइ पेःक्योक लेःगाक्या डीक्पु एः लाःती तेङ्जेला दी पेःसी, चीलेलाःना ख्रीष्ट ओःङ्जे तोःङ्ला कोन्ज्योइ राःङगीइ सीःताङ नादी तेःती एःके, ओःले तोःङ्ला मीःक्याइ पेःक्योक लाःयोइ दण्ड खुङगीइ मातेर। 26कोन्ज्यो राःङ ताःक्पा एः ओःले येशुखाला सेमल्हुक लुगेन्दीला खुङगीइ ताःक्पा जोगेन एः लाःती तेङ्तेर्चेला खुङगीइ ताःसेइ तीःनामला दी लेःगा पेःसी।
27ओःन्डु इःङे लाःना ताः उः ची तामला घमण्ड पेःगेन्दी ले? चीङ तामलाङ मीःङे! चीलेलाःना उःक्या छ्येइ ठीम ङीःन्दी ताःक्पा काःल्क्योक मीःङे, इःनाङ ख्रीष्टला सेमल्हुक लुक्योक सोङ्गारा चीग्रा ताःक्पा काःल्क्योक इःङे। 28ओः सोङ्गारा, छ्येइ ठीम ङीःन्दी मीःङे, इःनाङ ख्रीष्टला सेमल्हुक लुदी चीग्रा उःक्या ताःक्पा ओःङ्जे खुउए लाःकेन ताम उःइ सेउए। 29ची कोन्ज्यो यहुदीक्याइदी चीग्रा कोन्ज्यो इःङे ले? ची कोन्ज्यो राःङ्सा क्युःपाइ मीःक्याइदी कोन्ज्यो मीःङे ले? इःङे, खुङ राःङ्सा क्युःपाइ मीःक्याइदीङ कोन्ज्यो इःङे। 30चीलेलाःना कोन्ज्यो चीग्रा चीग एः। खुङगीइ यहुदीक्याला खुङक्याइ सेमल्हुकलाःम्ले ताःक्पा जोगेन एः, ओःले राःङ्सा क्युःपाइ मीःक्यालाङ सेमल्हुकलाःम्लेरा ताःक्पा जोगेन एः। 31ताः ची दीखो सेमल्हुकलाःम्लेरा छ्येइ ठीमला क्युर्केन्दी ले? मीःङे, ओःन्डु इःङ्रा मीःङे! बरु उःइ नी छ्येइ ठीम ताःरुङ लेःगा ओःङेन्दी एः लाःती सेमल्हुक का लुउए ले।
Currently Selected:
रोमी 3: SYW
Highlight
Share
Compare
Copy
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
