रोमी 4
4
अब्राहामगीइ सेमल्हुक
1ताः, उःइ क्युःपाइ आबा अब्राहामगीइ बारे ची लाःका ले? कोन्ज्योइ तोःङ्ला ताःक्पा ओःङेन बारेला खुङगीइ ची लोप्पा ले? 2अब्राहाम लेःगालाःम्ले ताःक्पा काःल्क्योक इःना नी खुङला घमण्ड पेःगेन ठाउँ ओःङ्जेके, इःनाङ कोन्ज्योइ तोःङ्ला खुङगीइ घमण्ड पेःजे माःखु। 3चीलेलाःना छ्येइ पेज्याला एःन्डुबा प्रुःदी एः, “अब्राहामगीइ कोन्ज्योखाला सेमल्हुक लुसी ओःले खुङगीइ ओः सेमल्हुककीइ पेःगासुनारा कोन्ज्योइ खुङला ताःक्पा थोङ्सी।”#उत्पत्ती १५:६ 4लेःगा पेःगेन मीःइ ला ज्योर्कुए। ओःखो खोइ एःन्दाराङ ज्योर्क्योक मीःङे, इःनाङ ओःखो खोइ ज्योर्कोन डेबा इःङे। 5काःखोङ मीः राःङगीइ लेःगा पेःदी ताःक्पा ओःङ्जे माःछोल्बा, माःताक्पा मीःक्याला ताःक्पा जोगेन कोन्ज्योखाला सेमल्हुक लुसी लाःना खुङगीइ सेमल्हुककीइ पेःगासुना कोन्ज्योइ ओःखोला ताःक्पा मीः लाःती टाःङेन एः। 6याःबु लेःगाक्यारा माःबेक्योक मीःलाङ कोन्ज्योइ ताःक्पा जोक्योक मीःइ काःजे मोलाम ज्योर्ती एः लाःती क्याःल्बु दाऊदकीइ एःन्डु लाःती एः,
7“काःखो मीःइदी कोन्ज्योइ माःरीक्पा लेःगाक्या क्षमा पेःतेर्ती एःपा,
ओःले काःखोइदी तीःक्पाक्या कोन्ज्योइ उप्तेर्ती एःपा,
ओःखो मीःइ काःजे मोलाम ज्योर्ती एः!
8प्रभुइ काःखो मीःइदी लाःयोक्या प्रुःदी म्याःपा,
ओःखो मीःइ काःजे मोलाम ज्योर्ती एः!”#भजन ३२:१-२
9ची दी मोलाम खतना पेःक्योक मीःक्याइ लागी चीग्रा इःङे, की खतना माःबेक्योकक्याइ लागीङ इःङे? चीलेलाःना अब्राहामगीइ कोन्ज्योला सेमल्हुक लुक्योक सोङ्गारा कोन्ज्योइ खुङला ताःक्पा मीः लाःती टाःङ्क्योक ताम तोःङ्लारा ङीःइ लाःसीःङ्दी एः। 10ताः कोन्ज्योइ खुङला नाःम ताःक्पा मीः लाःती टाःङ्बा? खुङगीइ खतना पेःजे तोःङ्ला की खतना पेःसीःङ्दी तीङ्ला? तेःन्दामरा खतना पेःदी तीःङ्ला मीःङे, खतना पेःजे तोःङ्लारा कोन्ज्योइ खुङला दीखो लाःती एःके। 11अब्राहामगीइ सेमल्हुक लुक्योक सोङ्गारा खुङगीइदी खतना ओःङ्जे तोःङ्लारा कोन्ज्योइ खुङला ताःक्पा मीः लाःती टाःङ्सी, ओःले खुङ ताःक्पा काःल्क्योक तामला पार क्याःप्चेला कोन्ज्योइ खुङला खतनाइ चुःन्डुल तेर्सी। एःन्डुले अब्राहाम कोन्ज्योला सेमल्हुक लुगेन थाम्जेर मीःक्याइ आबा काःल्सी, ओःले खुङक्याइ खतना माःबेक्योक एःनाङ कोन्ज्योइ खुङक्याला ताःक्पा मीःक्या लाःती लाःसी। 12खतना पेःक्योक सोङ्गारा चीग्रा मीःङे, इःनाङ खतना पेःजे तोःङ्लाङ अब्राहामगीइ कोन्ज्योला सेमल्हुक लुक्योक च्योःङ्रारा खुङक्याइयाङ सेमल्हुक लुक्योक सोङ्गारा, अब्राहाम खतना पेःक्योक थाम्जेरकीइ आबा काःल्सी।
कोन्ज्योइ ताःम्ज्या सेमल्हुकलाःम्ले ज्योर्कुए
13कोन्ज्योइ अब्राहामला ओःले खुङगीइ छार्क्युफुर्क्युक्याला खुङक्याइ दी जाम्बुलीङ ज्योर्केन एः लाःती ताःम्ज्या पेःसी। इःनाङ खुङगीइ दी ताःम्ज्या मोशाइ छ्येइ ठीमला ङीःन्क्योक सोङ्गारा ज्योर्क्योक मीःङे, बरु अब्राहामगीइ सेमल्हुक लुक्योक सोङ्गारा खुङ कोन्ज्योइ तोःङ्ला ताःक्पा काःल्दी खुङगीइ दी ताःम्ज्या ज्योर्ती एःके। 14चीलेलाःना छ्येइ ठीम ङीःङेनक्याइ चीग्रा जाम्बुलीङ ज्योर्केन एःना नी उःइ कोन्ज्योखाला सेमल्हुक लुक्योक नी चीङ लेःगा ओःङ्जे म्याःके, ओःले कोन्ज्योइ उः ङीमु पेःक्योक ताःम्ज्या एःन्दाराङ डोजेके। 15चीलेलाःना छ्येइ ठीम माःङीन लाःना कोन्ज्योइ मीःक्याखाला सीःताङ पुङ्गुए। छ्येइ ठीम म्याः लाःना ओःला छ्येइ ठीम नोङेन ताम मेःयुङ एः।
16ओः सोङ्गारा, कोन्ज्योइ अनुग्रह पेःदी ताःम्ज्या पेःक्योक ताम तेर्कुए, ओःले सेमल्हुक लुगेनक्याइ ओःखो ज्योर्कुए। ओःले दी ताःम्ज्या पेःक्योक तामक्या अब्राहामगीइ थाम्जेर छार्क्युफुर्क्युक्याइ तेःन्दामरा ज्योर्केन एः। दी ताःम्ज्या छ्येइ ठीम ङीःङेनक्याइ चीग्रा मीःङे, इःनाङ अब्राहामगीइ च्योःङ्रा सेमल्हुक लुगेन थाम्जेर मीःक्याइ ज्योर्केन एः, चीलेलाःना अब्राहाम उः थाम्जेरकीइ आबा इःङे। 17दीइ बारेला छ्येइ पेज्याला एःन्डुबा प्रुःदी एः, “ङाःइ ख्योला माःङ्बुरा क्युःपाक्याइ आबा जोदी एः।”#उत्पत्ती १७:५ कोन्ज्योइ तोःङ्ला उःक्याइ आबा अब्राहामरा इःङे, ओःले सीक्योकक्याला मीःजी तेर्केन्दी ओःले एःरा म्याःक्योक स्याःक्याला आज्ञा तेर्ती जोगेन ओःखोरा कोन्ज्योला खुङगीइ सेमल्हुक लुसी। 18छार्क्युफुर्क्युक्या केगेन रेःवारा म्याःक्योक तीःजीलाङ “ख्योइ छार्क्युफुर्क्युक्या नाःम्खाइ कार्माक्या चे ओःङेन एः”#उत्पत्ती १५:५ लाःती कोन्ज्योइ अब्राहामला पेःक्योक ताःम्ज्याला खुङगीइ रेःवा पेःदी सेमल्हुक लुसी, ओःले तीङ्ला खुङ माःङ्बुरा क्युःपाइ मीःक्याइ आबा काःल्सी। 19अब्राहाम लोः क्याः चीग जे लेप्चे चाल्दी एःके, ओः सोङ्गारा, खुङ माःङ्बुरा काःपु काःल्सीःङ्दी एःके ओःले खुङगीइ पेःमे साराङ पीःजा केजे मीःखुगेन्दी काःल्सीःङ्दी एःके, इःनाङ अब्राहामगीइ राःम्बु पेःदी सेमल्हुक लुदीरा तेःसी। 20कोन्ज्योइ पेःक्योक ताःम्ज्याइ बारेला खुङगीइ पाःकेन माःबे, बरु खुङ सेमल्हुकला ताःरुङ राःम्बु काःल्दी कोन्ज्योला प्रशंसा फुल्सी। 21चीलेलाःना कोन्ज्योइ पेःक्योक ताःम्ज्या खुङगीइ तेःन्दामरा पेःजे खुउए लाःती अब्राहामगीइ याःबु पेःदी छोर्ती एःके। 22ओःखोरा सेमल्हुककीइ पेःगासुना कोन्ज्योइ खुङगीइ तोःङ्ला खुङला ताःक्पा थोङ्सी। 23कोन्ज्योइ तोःङ्ला ताःक्पा थोङेन दी ताम खुङगीइ बारेला चीग्रा प्रुःक्योक मीःङे, 24इःनाङ दी उःइ लागीङ इःङे। उः काःखो काःखोइ उःइ प्रभु येशुला सीक्योकलाःम्ले सोम्बो लोगेन कोन्ज्योखाला सेमल्हुक लुबा, कोन्ज्योइ उःक्यालाङ खुङगीइ तोःङ्ला ताःक्पा थोङेन एः। 25येशु उःइ लाःयोइ लागी सीसी, ओले उःला कोन्ज्योइ राःङगीइ तोःङ्ला ताःक्पा जोजेला खुङगीइ येशुला सोम्बो जोसी।
Currently Selected:
रोमी 4: SYW
Highlight
Share
Compare
Copy
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
