Popular Bible Verses from रोमी 3

Share

चीलेलाःना थाम्जेर मीःक्याइ लाःयो पेःदी एः, ओःले खुङक्या कोन्ज्योइ महीमाला लेप्चे खुदी म्याः। इःनाङ कोन्ज्योइ थाम्जेरला नीङ च्योःउए, ओःले खुङगीइ मीःक्याला अनुग्रह पेःदी येशु ख्रीष्टलाःम्‍ले खुङगीइ तोःङ्ला एःन्दाराङ ताःक्पा जोसी, चीलेलाःना ख्रीष्टकीइ उःक्याला लाःयोलाःम्‍ले थार्च्युदी एः।

एःन्डुले येशु ख्रीष्टला सेमल्हुक लुगेन थाम्जेरला कोन्ज्योइ ताःक्पा जोउए। कोन्ज्योइ तोःङ्ला थाम्जेर मीःक्या च्योङेम्बा एः।

चीलेलाःना कोन्ज्योइ ख्रीष्टला उःक्याइ लाःयोइ क्षमा पेःगेन बली ओःङ्जेला ताङ्सी। ओः सोङ्‍गारा, येशुइ राःङगीइ ठा उःइ लागी स्याःल्च्युसी लाःती सेमल्हुक लुगेन थाम्जेरकीइ लाःयोइ क्षमा ज्योर्केन एः। कोन्ज्योइ राःङगीइ पेःक्योक लेःगाक्या डीक्पु एः लाःती तेङ्जेला दी पेःसी, चीलेलाःना ख्रीष्ट ओःङ्जे तोःङ्ला कोन्ज्योइ राःङगीइ सीःताङ नादी तेःती एःके, ओःले तोःङ्ला मीःक्याइ पेःक्योक लाःयोइ दण्ड खुङगीइ मातेर। कोन्ज्यो राःङ ताःक्पा एः ओःले येशुखाला सेमल्हुक लुगेन्दीला खुङगीइ ताःक्पा जोगेन एः लाःती तेङ्तेर्चेला खुङगीइ ताःसेइ तीःनामला दी लेःगा पेःसी।

चीलेलाःना छ्‍येइ ठीमगीइ लेःगाक्या ङीःन्दी सुङ कोन्ज्योइ तोःङ्ला ताःक्पा ओःङ्जे मीःखुगेन एः, बरु छ्‍येइ ठीमगीइ उःक्या लाःयो पेःगेन्दी इःङे लाःती चीग्रा तेङ्‍गुए।

छ्‍येइ पेज्याला एःन्डुबा प्रुःदी एः, “ताःक्पा मीः सुङ म्याः, मेःराङ चीगकाङ म्याः। सेगेन्दी सुङ म्याः, कोन्ज्योला छोल्गेन्दी सुङ म्याः। खुङक्या थाम्जेर आला ख्याम्दी एः, खुङक्या थाम्जेर लेःगा म्याःक्योक काःल्दी एः। सुइयाङ याःबु लेःगा मेःबेए, याःबु लेःगा पेःगेन्दी मेःराङ चीगकाङ म्याः।”

ओः सोङ्‍गारा, छ्‍येइ ठीम ङीःन्दी मीःङे, इःनाङ ख्रीष्टला सेमल्हुक लुदी चीग्रा उःक्या ताःक्पा ओःङ्जे खुउए लाःकेन ताम उःइ सेउए।

ओःन्डुबा इःङ्‍रा मीःङे, थाम्जेर मीःइ स्योप क्युःर्नाङ कोन्ज्योइ नाःमाङ स्योप मेःक्याःपए। छ्‍येइ पेज्याला खुङगीइ बारेला एःन्डुबा प्रुःदी एः, “ख्याइ लाःक्योक ताम डीक्पु दु लाःती मीःक्याइ थोङेन एः। ओःले मीःक्याइ ख्याला ठीम पेःगासुना ख्याइरा क्याःल्गेन एः।”