रोमी 2
2
कोन्ज्योइ पेःगेन ठीम
1ओः सोङ्गारा, ए रोःक्या, राःङ्साला ठीम पेःगेन्दी ख्याक्या सुरा इःनाङ, ख्याक्याला बहाना पेःगेन ठाउँरा म्याः। ख्याक्याइ राःङ्साला ठीम पेःगासुना ख्याक्याइ राःङलाराङ ठीम पेःउए, चीलेलाःना ख्याक्याइयाङ खुङक्याइ पेःक्योक लेःगारा पेःउए। 2एःन्डुबा माःइबा लेःगा पेःगेन मीःक्याला कोन्ज्योइ डीक्पु पेःदी ठीम पेःउए लाःकेन ताम ङीःइ छोर्ती एः। 3ख्याक्याइ एःन्डुबा लेःगा पेःगेनक्याला ठीम पेःउए ओःले राःङगीइयाङ ओःखोरा लेःगा पेःउए लाःना, ची ख्याक्या कोन्ज्योइ पेःगेन ठीमलाःम्ले स्योर्चे खुडो लाःती ठीवा साल्गुबा? 4कोन्ज्योइ ख्याक्याला माःङ्बुरा नीङ च्योःसी ओःले खुङगीइ ख्याक्याला नादी कुःदी तेःसी, इःनाङ ताः ची कोन्ज्योइ ओःन्डु पेःगासुना खुङला ख्याक्या माःरीःक्पा ठीवा साल्गुबा? ची ख्याक्याइ लाःयोलाःम्ले लोःज्युक लाःती कोन्ज्योइ ख्याक्याला नीङ च्योःक्योक ताम ख्याक्याइ छोर्ती म्याःपा? 5इःनाङ ख्याक्याइ राःङगीइ सेम ताःम्बु पेःदी स्याबा माःबेक्योक सोङ्गारा कोन्ज्योइ सीःताङ ओःङेन ङीःमाला ख्याक्याइ ताःरुङ छ्योम्बो दण्ड ज्योर्केन एः। ओः ङीःमाला कोन्ज्योइ थाम्जेरला डीक्पु पेःदी ठीम पेःगेन एः। 6चीलेलाःना कोन्ज्योइ थाम्जेर मीःक्याला खुङक्याइ पेःक्योक लेःगा तदी तेर्केन एः। 7याःबु लेःगाक्या पेःदी कोन्ज्योइ महीमा, सेःसा रा नाःमाङ मीसीगेन मीःली छोल्गेनक्याला कोन्ज्योइ नाःमाङ मीसीगेन मीःली तेर्केन एः। 8इःनाङ चीङ मीःक्याइ राःङला चीग्रा च्याःम्बु पेःउए, तेःन्दामला मीःङीन एः रा माःरीक्पा लेःगाक्या पेःदी डोउए। ओःन्डुबा मीःक्या कोन्ज्योइ मेः च्योःङ्रा सीःताङला लेप्केन एः। 9माःइबा लेःगा पेःगेन थाम्जेर मीःक्या छ्योम्बो तुःक्पु रा काःबुला लेप्केन एः, तोःङ्ला यहुदी ओःले राःङ्सा क्युःपाइ मीःक्याङ। 10इःनाङ याःबु लेःगा पेःगेन थाम्जेरला कोन्ज्योइ महीमा, सेःसा ओःले खाम्साङ्बु तेर्केन एः, तोःङ्ला यहुदीक्याला ओःले राःङ्सा क्युःपाइ मीःक्यालाङ। 11चीलेलाःना कोन्ज्योइ सुलाङ ओलापाङ्दे मेःबेए।
12कोन्ज्योइ तेर्क्योक छ्येइ ठीम माःज्योर्क्योक राःङ्सा क्युःपाइ मीःक्याइ तीःक्पा पेःसी लाःना खुङक्या छ्येइ ठीम माःज्योर्पारा सीःङ्दा काःल्दी डोगेन एः। ओःले छ्येइ ठीम ज्योर्तीमाराङ तीःक्पा पेःगेन यहुदी मीःक्याला छ्येइ ठीमलाःम्लेरा ठीम पेःगेन एः। 13चीलेलाःना छ्येइ ठीम कोःदी चीग्रा मीःक्या कोन्ज्योइ तोःङ्ला ताःक्पा ओःङ्जे मीःखुए, इःनाङ छ्येइ ठीम ङीःङेन मीःक्या चीग्रा कोन्ज्योइ तोःङ्ला ताःक्पा ओःङेन एः। 14राःङ्सा क्युःपाइ मीःक्या ङीमु छ्येइ ठीम म्याः, इःनाङ खुङक्याइ छ्येइ ठीमगीइ लाःक्योक च्योःङ्रा लेःगा पेःउए लाःना, खुङक्या ङीमु छ्येइ ठीम म्याःनाङ खुङक्याइ सेम खुङक्याइ लागी छ्येइ ठीम च्योःङ्रा ओःङ्गुए। 15खुङक्याइ राःङगीइ डोलुङ तेःलुङलाःम्लेरा छ्येइ ठीमला एःक्योक तामक्या खुङक्याइ सेमला प्रुःदी एः लाःती तेङ्गुए। ओःले दी तेःन्दाम इःङे लाःती खुङक्याइ राःङगीइ नावालाःम्ले तेङ्तेर्कुए, चीलेलाःना खुङक्याइ नावाइ नाःमचीग राःङगीइ माःइबा पेःसी लाःती तेङ्गुए ओःले नाःमचीग डीक्पु पेःसी लाःती तेङ्गुए। 16ओःले ङाःइ याःबु लेःङ्गो फेल्गासुना लाःकासुना च्योःङ्रारा, मीःइ सेमगीइ नाःङ तीःङगीइ इप्ती ज्याक्योक तामक्याला कोन्ज्योइ येशु ख्रीष्टलाःम्ले ङीःमा चीग ठीम पेःगेन एः।
यहुदी रा छ्येइ ठीम
17ख्याक्या नाःङ्ला मेःन्दा काःजेइदी राःङला यहुदीक्या इःङे लाःती लाःकुदु ओःले छ्येइ ठीमखाला भर पेःउदु। ओःले ङाः कोन्ज्योला ङोःसेउए लाःती घमण्ड पेःउदु। 18कोज्योइ ची सेम पेःउबा लाःकेन ताम ख्याक्याइ छोर्ती एः लाःती लाःकुदु, ओःले ख्याक्याइ ची याःबु ची माःइबा इःङे लाःकेन ताम छ्येइ ठीमलाःम्ले सेदी ओःखो खाफ्याजे खुउए लाःकुदु। 19कोन्ज्योला ङोःमासेक्योक राःङ्सा क्युःपाइ मीःक्याइ लागी ख्याक्या तोःङ क्याःप्केन मीःक्या इःङे लाःकुदु, ओःले नाक्जुकला एःक्योकक्याइ लागी ज्योती इःङे लाःती ख्याक्या तेःन्दामरा छोर्ती एः लाःकुदु। 20ओःले ख्याइ आक्याक्पाक्याला लोप्चे खुउए लाःकुदु ओःले चीङ मेसेगेन मीःक्याला लोप्चे खुउए लाःकुदु, चीलेलाःना ख्याइ छ्येइ ठीमलाःम्ले थाम्जेर नावा ओःले तेःन्दाम सेसीःङ्दी एः लाःकुदु। 21ताः एःन्डु इःङे लाःना ख्या राःङ्साक्यालादी लोप्केन्दी, इःनाङ राःङलादी मेलोप्केन्दी? ओःले ख्या राःङ्साक्यालादी कुजे मेःयुङे लाःती लोप्केन्दी, इःनाङ ख्या राःङदी कुगेन्दी? 22ओःले ख्या राःङ्साक्यालादी व्यभीचार पेःजे मेःयुङे लाःती लाःकेन्दी, इःनाङ ख्या राःङदी व्यभीचार पेःगेन्दी? ख्या कुला छ्याक छाल्जेला क्युक्टा पेःउए, इःनाङ ख्या ची राःङ्सा क्युःपाइ मीःक्याइ मन्दीरला फुल्क्योक स्याःक्या कुगेन्दी? 23ख्या छ्येइ ठीमगीइ बारेला घमण्ड पेःउए, इःनाङ ख्याइ छ्येइ ठीमला गोम्दी कोन्ज्योला सेःसा मेःबेए? 24चीलेलाःना छ्येइ पेज्याला एःन्डुबा प्रुःदी एः, “ख्याक्या यहुदीक्याइ पेःगासुना राःङ्सा क्युःपाइ मीःक्याइ कोन्ज्योइ बारेला माःइबा लाःकुए।”#यशैया ५२:५
25ख्याक्याइ छ्येइ ठीम ङीःन्गुए लाःना यहुदीक्याइ खतना पेःगेन रीमठीम याःबुरा इःङे, इःनाङ ख्याक्याइ छ्येइ ठीम मीःङीन एः लाःना नी ख्याक्या खतना माःबेक्योक मीःक्या च्योःङ्रा ओःङ्गुए। 26काःन्दीङ खतना माःबेक्योक मीःइ छ्येइ ठीम ङीःन्सी लाःना ओःखो कोन्ज्योइ तोःङ्ला खतना पेःक्योक मीः च्योःङ्रारा माःकाल्बा ले? 27खतना माःबेक्योकक्याइ ख्या खतना पेःगेन यहुदीक्याला माःताक्पा च्याःङेन एः, चीलेलाःना ख्याक्या ङीमु प्रुःक्योककीइ छ्येइ ठीम एःके इःनाङ ख्याइ ओःखो माःङीन, ओःले राःङ्सा क्युःपाइ मीःक्याइ खतना पेःदी म्याःके, इःनाङ खुङक्याइ छ्येइ ठीम ङीःन्सी। 28फीइ छेन्दा चीग्रा यहुदी एःकेनक्या तेःन्दाम यहुदी मीःङे। ओःन्डुरा पेःदी जुबुला चीग्रा पेःगेन खतनाङ ओःखो तेःन्दाम खतना मीःङे। 29नाःङ्गीइ छेन्दाइ चीग्रा तेःन्दाम यहुदी ओःङ्जे खुउए, ओःले तेःन्दाम खतनादी चाङ्मा लाइ सेम नाःङ्ला पेःगेन ताम इःङे, प्रुःक्योक छ्येइ ठीम चीग्रा मीःङे। एःन्डुबा मीःक्याला मीःक्याइ मीःङे कोन्ज्योइ चीग्रा लाःती क्याउए।
Currently Selected:
रोमी 2: SYW
Highlight
Share
Compare
Copy
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
