रोमी 15
15
उःक्याइ राःङ्सा मीःक्याला रोः पेःकोः
1उःक्या सेमल्हुकला राःम्बु एःकेनक्याइ सेमल्हुकला राःम्बु म्याःक्योकला रोः पेःकोःउए, ओःले उःक्या राःङ चीग्रा केःदाङ ओःङ्जे छोल्मीःङे। 2उःक्या थाम्जेरकीइ राःङगीइ टोःङ्रीक्याला याःबु काःल्ज्युक ओःले खुङ सेमल्हुकला राःम्बु ओःङ्ज्युक लाःती खोला केःदाङ जोकोः। 3चीलेलाःना ख्रीष्टकीइयाङ राःङला केःदाङ जोगेन लेःगाक्या माःबे। ओःन्डुरा पेःदी छेइ पेज्यालाङ एःन्डुबा प्रुःदी एः, “ए कोन्ज्यो, ख्याला नीन्दा पेःगेनक्याइ नीन्दा ङाःखाला लेप्ती एः।”#भजन ६९:९ 4छ्येइ पेज्याला ताःङ्बु ताःङ्सीःङला प्रुःक्योक तामक्या उःला लोप्चेइ लागी प्रुःक्योक इःङे। उःइ रेःवा मासीज्युक लाःती छ्येइ पेज्याइ उःला नाजे खुगेन ल्हे ओःले उत्साह तेर्कुए। 5नागेन ल्हे ओःले उत्साह तेर्केन कोन्ज्योइरा ख्याक्या चीगकीइ राःङ्सा ङीमु येशु ख्रीष्टकीइ सेम पेःक्योक च्योःङ्राले डीक्ती तेःचे खुगेन ल्हे तेर्च्युक। 6एःन्डुले ख्याक्या चीग्रा सेमगीइदी काःल्दी के चीगलारा उःइ प्रभु येशु ख्रीष्टकीइ आबा कोन्ज्योला ख्याक्या थाम्जेरकीइ महीमा तेर्चे खुज्युक।
राःङ्सा क्युःपाइ लागी याःबु लेःङ्गो
7ओः सोङ्गारा, कोन्ज्योइ महीमाइ लागी ख्रीष्टकीइ ख्याक्याला ग्रहण पेःक्योक च्योःङ्रा ख्याक्याङ चीगकीइ राःङ्साला ग्रहण पेःदो। 8ङाः ख्याक्याला लाःके, कोन्ज्योइ खुङक्याइ मेःमे फेबेक्याला ताःम्ज्या पेःक्योक ताम छाङ्च्युजेला ख्रीष्ट यहुदीक्याइ योक्पु काःल्सी। 9ओःले कोन्ज्योइ पेःक्योक कृपाइ लागी राःङ्सा क्युःपाइ मीःक्याइ खुङला महीमा तेर्च्युक लाःती खुङ ओःङ्सी। छ्येइ पेज्याला एःन्डुबा प्रुःदी एः,
“ओः सोङ्गारा, ङाः राःङ्सा क्युःपाइ मीःक्याइ कील्ला ख्याला प्रशंसा तेर्के,
ओःले ख्याइ मीःन सेःसा पेःजेला लु लेःङे।”#२ शमुएल २२:५०; भजन १८:४९
10फीर्च्या एःन्डुबा प्रुःदी एः,
“ए राःङ्सा क्युःपाइ मीःक्या,
कोन्ज्योइ मीःक्या ङीमु केःदाङ पेःदो।”#व्यवस्था ३२:४३
11ओःले राःङ्सा ठाउँला फीर्च्या एःन्डुले प्रुःदी एः,
“ख्याक्या थाम्जेर राःङ्सा क्युःपाइ मीःक्याइ प्रभुइ मीःनला क्यादो,
ओःले थाम्जेर मीःक्याइ खुङला प्रशंसा पेःज्युक।”#भजन ११७:१
12फीर्च्या कोन्ज्योइ लेःङ्गो तेर्केन यशैयाइ लाःती एः,
“यीशैगीइ#१५:१२ यीशैगीइ यीशैदी क्याःल्बु दाऊदकीइ आबा एःके। वंशलाःम्ले मेःराङ चीग छार्क्युफुर्क्यु ओःङेन एः,
खुङगीइ राःङ्सा क्युःपाइ मीःक्याखाला क्याःल्खाप पेःगेन एः
ओःले राःङ्सा क्युःपाइ मीःक्याइ राःङगीइ रेःवा खुङखाला ज्यागेन एः।”#यशैया ११:१०
13रेःवा तेर्केन कोन्ज्योखाला ख्याक्याइ सेमल्हुक लुदी एः। खुङगीइरा ख्याक्याला माःङ्बुरा केःदाङ जोज्युक ओःले खाम्साङा तेर्च्युक। ओःन्डुलेरा चाङ्मा लाइ ल्हेलाःम्ले ख्याक्याइ रेःवा ताःरुङ माःङ्बु काःल्देरा डोज्युक।
राःङ्सा क्युःपाक्याला पावलगीइ लेःगा पेःक्योक
14आतानोःक्या ओःले आजीनोःमोक्या, ख्याक्या माःङ्बुरा याःबु एः लाःकेन ताम ङाःइ याःबु पेःदी छोर्ती एः। ओःले ख्याक्या नावाइ काःङ्दी चीगकीइ राःङ्साला लोप्चे खुगेन्दी काःल्दी एः। 15इःनाङ ख्याक्याला फीर्च्याङ चीङ तामक्या टेःम्बा साल्च्युजेला ङाःइ आ क्याःप्ती दी इःगी प्रुःदेरा एः। कोन्ज्योइ ङाःला तेर्क्योक अनुग्रहलाःम्ले, 16राःङ्सा क्युःपाइ मीःक्याइ कील्ला लेःगा पेःजेला कोन्ज्योइ ङाःला येशु ख्रीष्टकीइ योक्पु जोसी। ओःले खुङक्या चाङ्मा लालाःम्ले चाङ्मा काःल्दी कोन्ज्योइ लेःङेन भेटी च्योःङ्रा ओःङ्जे खुज्युक लाःती कोन्ज्योइ ङाःला खुङगीइ याःबु लेःङ्गो फेल्जेला पुजाहारीइ लेःगा क्याप च्योल्सी। 17ङाः येशु ख्रीष्ट ङीमु चीग काःल्क्योक सोङ्गारा ङाः ङाःइ कोन्ज्योइ मेःबा पेःगेन लेःगाला घमण्ड पेःउए। 18ख्रीष्टकीइ ङाःइ मीःलीलाःम्ले पेःक्योक लेःगाइ बारेला चीग्रा लाःचेला ङाः आ क्याःप्के। राःङ्सा क्युःपाइ मीःक्याइ कोन्ज्योला ङीःन्ज्युक लाःती ङाःइ खुङक्याला ङाःइ ताम लाःती ओःले लेःगाक्या पेःदी खुङक्याला लोप्सीःङ्दी एः। 19याःमाछाककीइ लेःगा, छ्योम्बो ल्हेइ चुःन्डुल ओःले कोन्ज्योइ लाइ ल्हेलाःम्ले यरुशलेममीःजीक इल्लुरीकनथुप एःक्योक थाम्जेर ठाउँक्याला ङाःइ ख्रीष्टकीइ बारेला याःबु लेःङ्गो लाःकेन लेःगा पेःसीःङ्दी एः। 20राःङ्सा मीःइ चार ज्याक्योक ठाउँला खीम जोक्योक च्योःङ्रा राःङ्सा मीःइ याःबु लेःङ्गो फेल्क्योक ठाउँला ङाः याःबु लेःङ्गो फेल्जे सेम मेःबे। ख्रीष्टकीइ बारेला सुइयाङ कोःरा माःकोःक्योक ठाउँला चीग्रा लेःङ्गो लाःचेला ङाःला छ्योम्बो सेम एः। 21छ्येइ पेज्याला एःन्डुबा प्रुःदी एः,
“खुङगीइ बारेला काःन्दीला नाःमाङ लाःती म्याःके, खुङक्याइ खुङला थोङेन एः,
ओःले खुङगीइ बारेला काःन्दीयाङ नाःमाङ कोःदी म्याःपा, खुङक्याइ सेगेन एः।”#यशैया ५२:१५
पावल रोमला डोगेन तेःदाम
22माःङ्बुरा थाङ्मा ङाः ख्याक्या साःला ओःङ्जे सेम पेःदी एःके, इःनाङ ङाः सेम्बा सेम्बा ठाउँक्याला याःबु लेःङ्गो लाःचेला काःल्क्योक सोङ्गारा, ङाः ख्याक्या साःला ओःङ्जे माःज्योर। 23इःनाङ ताः दी ठाउँक्याला ङाःइ याःबु लेःङ्गो फेल्गेन लेःगा सीःङ्च्युसी, ओःले ङाःइ माःङ्बुरा लोःमीःजीक ख्याक्या ङीमु फ्रेकेन छ्योम्बो सेम पेःदी एःके। 24ङाः ओःलाःम्ले पेःदी स्पेन डोगासुना ख्याक्याला फ्रेकेन रेःवा ज्यादी एः। चीङ ङीःमा ङाः ख्याक्या ङीमु खाम्साङाले तेःकेन ङाःइ सेम एः। ओः तीङ्ला ङाः स्पेनला डोगासुना ख्याक्याइ ङाःला रोः पेःतेर्टो लाःती ङाःइ रेःवा पेःदी एः। 25इःनाङ ताः ङाः कोन्ज्योइ मीःक्याला रोः पेःजेला यरुशलेमला डोदेरा एः। 26चीलेलाःना माकेडोनीया अखैयाला एःक्योक कोःम्साक्याइ यरुशलेमगीइ कोन्ज्योइ मीःक्या नाःङ्ला चीङ प्राङ्ना मीःक्याइ लागी डेबा तुःदी ताङ्दी एः। 27दी डेबा खुङक्याइ केःदाङ पेःदी तुःदी ताङ्क्योक इःङे, लाःराकोःसुना खुङक्याइ ओः यहुदीक्याला रोः पेःराकोःन एःके चीलेलाःना खुङक्यालाःम्लेरा राःङ्सा क्युःपाइ मीःक्याइ आत्मीक मोलाम ज्योर्सी। ओः सोङ्गारा, राःङ्सा क्युःपाइ मीःक्याइयाङ यहुदी मीःक्याला ताःसुक एःकासुना खुङक्याइ रोः पेःराकोःउए। 28ओः सोङ्गारा, दी डेबा खुङक्याला याःबुले तेर्ती ङाः दी लेःगा सीःङ्मीःजीक, ङाः ख्याक्याला फ्रेकाला ओःङे ओःले स्पेनला डोगे। 29ङाः ख्याक्या साःला ओःङ्गासुना ख्रीष्टकीइ मोलामगीइ काःङ्दी ओःङेन एः लाःती ङाःइ छोर्ती एः।
30आतानोःक्या ओःले आजीनोःमोक्या, उःइ प्रभु येशु ख्रीष्टलाःम्ले ओःले चाङ्मा लाइ च्याःम्बुइ, कोन्ज्योइ ङाःला रोः पेःतेर्च्युक लाःती ख्याक्याइ ङाः ङीमुरा तेन्दुरा प्रार्थना पेःतेर लाःती ङाः वासी पेःगे। 31कोन्ज्योला सेमल्हुक मीलुगेन यहुदीयाला एःक्योक मीःक्यालाःम्ले ङाः थार्ती तेःचे खुज्युक ओःले यरुशलेमला एःक्योक कोन्ज्योइ मीःक्याइ दी डेबा लेःङ्ज्युक लाःती प्रार्थना पेःतेर। 32ओःले कोन्ज्योइ सेम पेःदु लाःना ङाः केःदाङ पेःदी ख्याक्या साःला ओःङेन एः, ओःले उःक्या ङीमुरा तेःती उःक्याइ सेम खाम्साङा ओःङेन एः। 33खाम्साङ्बु (शान्ती) तेर्केन कोन्ज्यो ख्याक्या थाम्जेर ङीमु एःच्युक। आमेन।
Currently Selected:
रोमी 15: SYW
Highlight
Share
Compare
Copy
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
