रोमी 14
14
राःङ्साला ठीम माःबे
1सेमल्हुकला राःम्बु म्याःक्योक मीःक्याला तोःङ्ज्याङ पेःदो, ओःले ओःखोइ ठीवा साल्क्योक तामला ठुक्पा क्याःप्केन लेःगादी माःबे। 2लाःलेइगीइ थाम्जेर स्याःक्या साःजे ओःङ्गुए लाःती ठीवा चेकोए, इःनाङ सेमल्हुकला राःम्बु म्याःक्योकक्याइदी ङोजेक्या चीग्रा साःउए। 3थाम्जेर स्याःक्या साःगेन मीःइ ङोजे चीग्रा साःगेन मीःला ङ्याप्च्युक पेःजे मेःयुङे। ओःन्डुरा पेःदी ङोजे चीग्रा साःगेन मीःइयाङ थाम्जेर स्याः साःगेन मीःला ङ्याप्च्युक पेःजे मेःयुङे। चीलेलाःना कोन्ज्योइ खुङक्या थाम्जेरला तोःङ्ज्याङ पेःदी एः। 4राःङ्साइ योक्पुला ठीम पेःगेन्दी ख्यो सु इःङे? खोइ ताःक्पुइ का खोइ याःबु पेःबा की माःइबा पेःबा लाःती ठीवा चेकुए। ओःले खोइ ताःक्पुला याःबुले मेःबा पेःजे खुउए चीलेलाःना प्रभुइरा खोला ओःन्डु पेःजेला रोः पेःउए।
5चीङ मीःक्याइ ङीःमा चीग राःङ्सा ङीःमा भन्दा छ्योम्बो इःङे लाःती लाःकुए,#१४:५ प्रभुला सेमल्हुक लुगेन लाःलेइ यहुदीक्याइ थाङ सोगेन ङीःमा ओःले चीङ मेःलीङगीइ ङीःमाक्या राःङ्सा ङीःमाक्या भन्दा चाङ्मा ओःङ्गुए लाःती ठीवा साल्गुके। इःनाङ काःजेदी थाम्जेर ङीःमा चीग्रा इःङे लाःती लाःकुए। थाम्जेर मीःक्याइ राःङ राःङगीइ सेमला ची ठीवा साल्दी एःपा ओःखो ताम ठीवा चेकोः। 6काःन्दीङ मीःइ ङीःमा चीगला छ्योम्बो इःङे लाःती ठीवा साल्गुए लाःना खुङगीइ प्रभुला सेःसा ओःङ्ज्युक लाःती ठीवा साल्गुए। ओःले थाम्जेर स्याःक्या साःगेन मीःइ प्रभुला सेःसा काःल्ज्युक लाःती साःक्योक ओःङ्गोए चीलेलाःना खोइ कोन्ज्योला थुजीछे तेर्ती साःउए। ओःले ङोजेक्या चीग्रा साःगेन मीःइयाङ प्रभुला सेःसा काःल्ज्युक लाःतीरा साःक्योक ओःङ्गोए चीलेलाःना खोइयाङ कोन्ज्योला थुजीछे तेर्कुए। 7उः सुङ राःङगीइ लागी मेसेन एः ओःले सुङ राःङगीइ लागी मीसीए। 8उः सेन्गुए लाःना प्रभुइ लागीरा सेन्गुए ओःले सीउए लाःनाङ उः प्रभुइ लागीरा सीउए। ओः सोङ्गारा, उः सेन्नाङ ओःले सीनाङ उः प्रभुइदीरा इःङे। 9दीखोइ लागीरा ख्रीष्ट सीसी ओःले फीर्च्याङ सोम्बो लोःसी, ओः सोङ्गारा, खुङ सीक्योक्या रा सोम्बोक्या ङीक्कारकीइ प्रभु इःङे। 10ख्या चीले राःङगीइ नोःला ठीम पेःउबा ले? ख्या राःङगीइ नोःला चीले ङ्याप्च्युक पेःउबा? चीलेलाःना उः थाम्जेर कोन्ज्योइ तोःङ्ला लाःङ्कोःउए ओःले खुङगीइ उःक्या थाम्जेरला ठीम पेःउए। 11चीलेलाःना छ्येइ पेज्याला एःन्डुबा प्रुःदी एः,
“प्रभुइ लाःकुए,
‘ङाः सोम्बो एः,
थाम्जेर ङाःइ तोःङ्ला पीमु चुगेन एः,
ओःले थाम्जेरकीइ कोन्ज्योला प्रशंसा तेर्केन एः।’”#यशैया ४५:२३
12ओः सोङ्गारा, उःक्या थाम्जेरकीइ राःङ राःङगीइ पेःक्योक लेःगाक्याइ प्रुःदुक्पा कोन्ज्योला तेर्कोःउए।
सुलाङ लाःयो पेःमाच्यु
13ओः सोङ्गारा, ताःमीःजीक उः चीगकीइ राःङ्साला ठीम माःबेगा, बरु उः राःङगीइ नोःक्याला ङाःर्तोक फोगेन्दी ओःले लाःयोला लेप्केन लेःगाक्या पेःगेन म्याः लाःती सेमला ठीवा साल्गा। 14प्रभु येशुइ ङाःला साङ्बुले तेङ्तेर्ती एः, काःन्दीङ साःगेन स्याःक्या माचाङ्क्योक म्याः। इःनाङ काःखोइ ओःखो माचाङ्क्योक इःङे लाःती ठीवा चेकुबा, ओःखोइ लागी ओःखो माचाङ्क्योक ओःङ्गोए। 15ख्योइ साःक्योक साःगेन स्याःइ पेःगासुना ख्योइ नोःला ङाःर्तोक फोउए लाःना ख्योइ खोला च्याःम्बु पेःक्योक मीःङे। खोइ लागीङ ख्रीष्ट सीक्योक इःङे, ओः सोङ्गारा, ख्योइ स्याःगेन स्याःइ पेःगासुना राःङ्सा मीःक्याला सीःङ्दा चेती डोजे मातेर। 16ओः सोङ्गारा, ख्योला याःबु नेक्योक तामक्याला राःङ्साइ माःइबा लाःचे मातेर। 17चीलेलाःना कोन्ज्योइ क्याःल्खाप लाःक्योक साःजे रा थुङ्जे चीग्रा मीःङे, इःनाङ कोन्ज्योइ तोःङ्ला ताःक्पा लेःगा पेःजे, राःङ्सा ङीमु डीक्ती तेःचे ओःले खाम्साङ्बु ओःङ्जे इःङे। दी थाम्जेर तामक्या चाङ्मा लाइ तेर्कुए। 18एःन्डु पेःदी ख्रीष्टकीइ मेःबा पेःगेनक्याइ कोन्ज्योला केःदाङ जोउए ओःले मीःक्याइ खुङक्याला याःबु लाःकुए।
19ओः सोङ्गारा, उः खाम्साङ्बु तेर्केन्दी ओःले सेमल्हुकला चीगकीइ राःङ्साला राःम्बु जोगेन लेःगाक्याला चीग्रा सेम तेर्कोः। 20साःगेन स्याःइ पेःगासुना कोन्ज्योइ लेःगाला मानोङ। थाम्जेर साःगेन स्याःक्या साःजे ओःङ्गुए इःनाङ राःङगीइ साःक्योककीइ राःङ्साला ङाःर्तोक फोउए लाःना ओःखो याःबु मीःङे। 21ख्याइ स्या साःगासुना, छ्याङ थुङ्गासुना एःनाङ ओःले राःङ्सा चीङ पेःगासुना एःनाङ, ख्याइ नोःला ङाःर्तोक फोउए लाःना ख्योइ ओःखो मेःबेजेरा याःबु इःङे। 22ओः सोङ्गारा, दी तामक्याइ बारेला ख्योइ लुक्योक सेमल्हुक कोन्ज्यो रा ख्योइ कील्ला ज्यो। काःखो मीःइ राःङला डीक्पु नेक्योक ताम पेःउबा ओःले ओः ताम पेःगासुना राःङला माःताक्पा मेनेबा ओःखो मीःला कोन्ज्योइ मोलाम तेर्कुए। 23इःनाङ काःखोइ पाःकेन पेःदी साःगेन स्याः साःसी लाःना ओःखोइ दण्ड ज्योर्केन एः, चीलेलाःना खोइ सेमल्हुक लुदी साःक्योक मीःङे। चीलेलाःना सेमल्हुक मालुबा पेःक्योक थाम्जेर तामक्या लाःयोरा इःङे।
Currently Selected:
रोमी 14: SYW
Highlight
Share
Compare
Copy
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
