रोमी 16
16
पावलगीइ टासीदेले
1ताः ङाः ख्याक्याला उःइ नोःमो फीबी ङीमु ङोःसेच्यु, ओः नोःमोइ कींक्रीया क्याःसाइ कोःम्साला डीकनगीइ लेःगा पेःउए। 2ओः नोःमोइ माःङ्बुरा मीःक्याला रोः पेःदी एः ओःले ङाःलाङ माःङ्बुरा रोः पेःदी एः। ओः सोङ्गारा, ख्याक्याइयाङ कोन्ज्योइ मीःक्याइ प्रभुला सेमल्हुक लुगेन राःङ्सा मीःक्याला तोःङ्ज्याङ पेःकोःन च्योःङ्रारा खुङलाङ ख्रीष्टकीइ मीःनला तोःङ्ज्याङ पेःदो, ओःले खुङ ताःसुकला एःकासुना खुबाथुप रोःङ पेःदो।
3येशु ख्रीष्टकीइ लेःगाला ङाः ङीमु ङीमुरा लेःगा पेःगेन प्रीस्का रा अकीलासला ङाःइ टासीदेले एः। 4ङाःला थार्च्युजेइ लागी, खुङ ङी ङाःइ लागी सीजेलाङ तयार काःल्सी। ओः सोङ्गारा, ङाःइ चीग्रा मीःङे, राःङ्सा क्युःपाइ थाम्जेर कोःम्साक्याइयाङ खुङक्याला थुजीछे तेर्कुए। 5खुङक्याइ खीमला जोम्ङेन मीःक्यालाङ ङाःइ टासीदेले लाःतेर।
ङाःइ च्याःम्बु नोः इपेनीतसलाङ ङाःइ टासीदेले एः लाःतेर। खुङ एशीयाइदीरा तोःङ्ला ख्रीष्टला सेमल्हुक लुगेन मीः इःङे। 6ख्याक्याइ लागी तुःक्पु पेःदी लेःगा पेःगेन मरीयमलाङ ङाःइ टासीदेले एः लाःतेर। 7ङाःइ यहुदी रोःक्या एन्ड्रोनीकस रा युनीयसलाङ ङाःइ टासीदेले एः लाःतेर। खुङक्याला ङाः ङीमुरा चेङाङला कादी एःके। थाम्जेर प्रेरीतक्याइ खुङ ङीला याःबुले ङोःसेउए ओःले ङाःइ ख्रीष्टला सेमल्हुक लुजे तोःङ्लारा खुङक्याइ ख्रीष्टला सेमल्हुक लुसीःङ्दी एःके।
8प्रभुला सेमल्हुक लुगेन ङाःइ च्याःम्बु रोः एम्प्लीआतसला ङाःइ टासीदेले एः लाःतेर। 9उःक्या ङीमुरा ख्रीष्टकीइ लेःगा पेःगेन उर्बनसलाङ ङाःइ टासीदेले एः लाःतेर, ओःले ङाःइ च्याःम्बु रोः स्ताखुसलाङ ङाःइ टासीदेले एः लाःतेर। 10ख्रीष्टकीइ तोःङ्ला डीक्पु काःल्क्योक अपेल्लेसला ङाःइ टासीदेले एः लाःतेर। अरीसतोबुलसकीइ थाम्जेर खीम फेबेक्याला ङाःइ टासीदेले एः लाःतेर। 11ङाःइ यहुदी नोः हेरोदीयनला ङाःइ टासीदेले एः लाःतेर। प्रभुला सेमल्हुक लुगेन नर्कीससकीइ खीमफेबेला थाम्जेरला ङाःइ टासीदेले एः लाःतेर।
12प्रभुइ लागी तुःक्पु पेःदी लेःगा पेःगेन नोःमोक्या त्रुफेना रा त्रोफोसालाङ ङाःइ टासीदेले एः लाःतेर। प्रभुइ लागी माःङ्बुरा लेःगा पेःगेन ङाःइ च्याःम्बु नोःमो परसीसला ङाःइ टासीदेले एः लाःतेर। 13प्रभुइ दाम्क्योक रुफस ओःले खोइ आमालाङ ङाःइ टासीदेले एः लाःतेर। खुङ ङाःइ आःमा च्योःङ्रारा इःङे। 14असींक्रीतस, फ्लेगन, पत्रोबास, हर्मास ओःले खुङक्या ङीमु एःक्योक आतानोःक्या ओःले आजीनोःमोक्यालाङ ङाःइ टासीदेले एः लाःतेर। 15फीलोलोगस, युलीया, नेरीयस ओःले खुङगीइ नोःमो, ओलीम्पास, ओःले खुङक्या ङीमु एःक्योक कोन्ज्योइ थाम्जेर मीःलाक्याला ङाःइ टासीदेले एः लाःतेर।
16चीगकीइ राःङ्साला पाःङ्ज्या लुदी टासीदेले लोःप। ख्रीष्टकीइ थाम्जेर कोःम्साक्याइ मीःक्याइ ख्याक्याला टासीदेले ताङ्दी एः।
तीङगीइ टेःदाम
17ए ङाःइ आतानोःक्या ओःले आजीनोःमोक्या, ङाः ख्याक्याला वासी पेःगे, ख्याक्याइ कील्ला ठुक्पा क्याःप्ती खाफ्याच्युगेन मीःक्या ओःले सेमल्हुकला नोङ्जे छोल्गेन मीःक्यामीःजीक च्यागाताःक्पु पेःदी तेः। ख्याक्याइ ज्योर्क्योक शीक्षाला खुङक्याइ टाःलाङ पेःउए। ओःन्डुबा मीःक्यालाःम्ले थारीःङ्बुरा तेः। 18चीलेलाःना ओःन्डुबा मीःक्याइ उःइ प्रभु ख्रीष्टला मेःबा मेःबेए, इःनाङ खुङक्या नी राःङगीइ जुबुइ सेम थेक्योक स्याःक्याइ लागी लेःगा पेःउए। खुङक्याइ सीम्बु ओःले डेपु तामक्या लाःती थेका मीःक्याला स्योप क्युःर्कुए। 19ख्याक्याइ कोन्ज्योला याःबु पेःदी ङीःन्गुए लाःकेन ताम नी थाम्जेर मीःक्याइ छोर्तीरा एः, ओःले दी तामला ङाः माःङ्बुरा केःदाङ एः। इःनाङ ची याःबु एःपा, ओःखो तामला ख्याक्या नावा साल्बु ओःङ्ज्युक ओःले ची माःइबा एःपा ओःखो तामला ख्याक्याइ लाःक्पा मालुज्युक लाःकेन सेम एः। 20शान्ती तेर्केन कोन्ज्योइ गेबुरा शैतानला ख्याक्याइ काङ्बा वाःला नेम्ङेन एः। उःइ प्रभु येशुइ ख्याक्याला अनुग्रह पेःज्युक।
21ङाः ङीमु लेःगा पेःगेन तीमोथीइ ख्याक्याला टासीदेले लाःती एः। ओःन्डुरा पेःदी ङाःइ यहुदी नोःक्या लुकीयस, यासोन ओःले सोसीपत्रोसकीइयाङ ख्याक्याला टासीदेले लाःती एः।
22पावलगीइ लागी दी इःगी प्रुःगेन ङाः तर्तीयसकीइयाङ प्रभुइ मीःनला ख्याक्या थाम्जेरला टासीदेले लाःतेरा एः। 23ङाः तेःकेन खीमगीइ ताःक्पु गायसकीइयाङ ख्याक्याला टासीदेले लाःती एः, ओःले खुङगीइ खीमलारा कोःम्साइ मीःक्या जोम्गुए। ओःले दी क्याःसाइ डेबाक्या तोःदी ज्यागेन नोः इरास्तस ओःले क्वार्टसकीइयाङ ख्याक्याला टासीदेले लाःती एः। 24[उःइ प्रभु येशु ख्रीष्टकीइ ख्याक्या थाम्जेरला अनुग्रह पेःज्युक। आमेन।]
25उःक्या थाम्जेरकीइ कोन्ज्योला प्रशंसा तेर्का। कोन्ज्योइ ख्याक्याइ सेमल्हुकला राःम्बु जोजे खुउए। ङाःइ ख्रीष्टकीइ बारेला फेल्गेन याःबु लेःङ्गोइयाङ ओःखोरा ताम लाःकुए। तीःनाम तीःनाममीःजीक इप्ती ज्याक्योक दी याःबु लेःङ्गो ताःसे साङ्बुला ओःङ्दी एः। 26इःनाङ कोन्ज्योइ लेःङ्गो तेर्केनक्याइ माःङ्बुरा तोःङ्ला प्रुःक्योक दी ताम ताःसे कोन्ज्योइ थाम्जेर मीःक्याइ साङ्बुले सेगेन पेःदी तेङ्तेर्ती एः। ओःले राःङ्सा क्युःपाइ थाम्जेर मीःक्याइ कोन्ज्योला सेमल्हुक लुज्युक ओःले खुङगीइ लाःक्योक ताम ङीःन्ज्युक लाःती तेन्दुरा तेःकेन कोन्ज्योइ ओः याःबु लेःङ्गोला साङ्बुला ख्योङेन आज्ञा तेर्क्योक इःङे। 27ओःले थाम्जेर ताम सेगेन्दी चीग्रा चीग कोन्ज्योला येशु ख्रीष्टलाःम्ले तेन्दुरा महीमा काःल्ज्युक। आमेन।
Currently Selected:
रोमी 16: SYW
Highlight
Share
Compare
Copy
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
