रोमी 13
13
सरकारकीइ आङ्ज्या वाःला तेःकोः
1थाम्जेर मीःक्या सरकारकीइ शासन पेःगेनक्याइ आङ्ज्याला तेःकोःउए। कोन्ज्योलाःम्ले ओःङ्क्योक आङ्ज्या बाहेक राःङ्सा चीङ आङ्ज्या म्याः, ओःले ताःसे एःक्योक थाम्जेर आङ्ज्याक्याङ कोन्ज्योइरा ओःला ज्याक्योक इःङे। 2ओः सोङ्गारा, काःखोइ सरकारला वीरोध पेःउबा ओःखोइ कोन्ज्योइ आज्ञालाङ वीरोध पेःउए। एःन्डुबा पेःगेनक्याइ दण्ड ज्योर्केन एः। 3चीलेलाःना सरकार ङीमु नी याःबु लेःगा पेःगेनक्या मीःङे इःनाङ माःइबा लेःगा पेःगेनक्या का जीकोः। ख्याक्याला सरकार ङीमु माःजीबा तेःचे सेम एः लाःना याःबु लेःगा पेःदो ओःले खुङक्याइ ख्याक्याला याःबु लाःती लाःकेन एः। 4चीलेलाःना ठीम पेःगेनक्या कोन्ज्योइ योक्पुक्या इःङे, ओःले खुङगीइ खुङक्याला ख्याक्यालारा याःबु ओःङ्ज्युक लाःती खटाइतीक्योक इःङे। ख्याक्याइ माःइबा लेःगा पेःसी लाःना चीग्रा सरकार ङीमु जीबा पेःदो चीलेलाःना ख्याक्याला दण्ड तेर्चेला सरकार ङीमु आङ्ज्या एः। सरकारदी माःइबा लेःगा पेःगेनक्याला दण्ड तेर्केन्दी कोन्ज्योइ योक्पु इःङे। 5ओः सोङ्गारा, कोन्ज्योइ दण्ड तेर्कुए लाःकेन जीबाइ पेःगासुना चीग्रा सरकारकीइ ताम ङीःन्क्योक च्योःङ्रा माःबे, इःनाङ राःङगीइ नावाइ एःन्डु पेःजेदी याःबु इःङे लाःतीङ ख्याक्याइ सरकारला सेःसा पेःदो।
6ओः सोङ्गारा, ख्याक्याइ सरकारला कर च्याल्कोःउए। चीलेलाःना सरकारी मीःक्या तेन्दुरा राःङगीइ लेःगा पेःदी तेःक्योक कोन्ज्योइ योक्पुक्या इःङे। 7सुसुला च्याल्कोःन्दी एःपा थाम्जेरला च्याल्दो। च्याल्गो च्याल्कोःन्दी एः लाःना च्याल्दो, भन्सार च्याल्कोःन्दी एः लाःना च्याल्दो, ङीःन्कोःन मीः एः लाःना ङीःन्दो ओःले सेःसा पेःकोन मीः एः लाःना सेःसा पेःदो।
चीगकीइ राःङ्साला च्याःम्बु पेःदो
8चीगकीइ राःङ्साला च्याःम्बु पेःकोःन तामला बाहेक राःङ्सा काःन्दीङ तामला सुइदीङ पेःलेन माःखुर। चीलेलाःना राःङ्साला च्याःम्बु पेःगेन मीःइ छ्येइ ठीमला प्रुःक्योक तामला छाङ्च्युक्योक ओःङ्गुए। 9“ख्योइ व्यभीचार माःबे, मीः मासे, माकु, मीफामु माःबे”#प्रस्थान २०:१३-१५,१७; व्यवस्था ५:१७-१९,२१ दी आज्ञाक्या बाहेक राःङ्साङ काःजे आज्ञाक्या एः। ओःखो थाम्जेरकीइ चार्ङेदी दी आज्ञालारा ज्योर्कुए, ओःखो आज्ञादी दीखो इःङे, “ख्योइ राःङगीइ टोःङ्रीला राःङला च्योःङ्रा च्याःम्बु पेःदो।”#लेबी १९:१८ 10च्याःम्बु पेःगेन्दीइ राःङगीइ टोःङ्रीला माःइबा मेःबेए। ओः सोङ्गारा, च्याःम्बु पेःजे लाःक्योकरा छ्येइ ठीमला प्रुःक्योक ताम छाङ्च्युजे इःङे।
11ख्याक्याइ दी तामक्या पेःदो, चीलेलाःना ताः ख्याक्या ङी छेती लाःङेन तीःजी ओःङ्सीःङ्दी एः लाःती ख्याक्याइ छोर्तीरा एः। चीलेलाःना उःइ तोःङ्ला सेमल्हुक लुगासुना भन्दा ताःसे उःक्या थार्केन तीःजी ताःरुङ थामाला ओःङ्सीःङ्दी एः। 12नुःप माःङ्बुरा काःल्सीःङ्सी, ओःले ङीःमा थामाला ओःङ्सीःङ्दी एः। ओः सोङ्गारा, कुःमुइ लेःगाक्या पोःर्ती ताः उः साङ्बुइ टीःक्या थोकोः। 13ङीःमाला च्योःङ्रा उःक्या याःबु लेःगाक्या पेःगा। साःगेन्दी थुङेन्दी, जीगेन्दी, व्यभीचार पेःगेन्दी, हेदा क्याःप्ती डोगेन्दी, ठुक्पा क्याःप्केन्दी ओःले मीसेर पेःगेन लेःगाक्या पोःर्कोःउए। 14इःनाङ प्रभु येशु ख्रीष्टकीइ च्योःङ्रारा डोलुङ तेःलुङ पेःदो ओःले ठीवा साल्दो, ओःले जुबुइ सेम पेःगेन माःरीक्पा तामक्या पेःजेछ्योले सेम मातेर।
Currently Selected:
रोमी 13: SYW
Highlight
Share
Compare
Copy
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
