मर्कुस 6
6
नासरतकीइ मीःक्याइ येशुला सेमल्हुक मालुक्योक
(मत्ती १३:५३-५८; लुका ४:१६-३०)
1येशु ओः ठाउँ पोःर्ती राःङ छाक्र्योक क्याःसा नासरतला ओःङ्सी। खुङगीइ योबाक्याङ खुङ ङीमुरा ओःङ्सी। 2खुङगीइ यहुदीक्याइ थाङ सोगेन ङीःमाला जोम्साखीमला लोप्काला स्युःसी। खुङगीइ लोप्क्योक कोःगेन माःङ्बुरा मीःक्या याःमाछाक काःल्दी लाःसी, “खुङगीइ दी थाम्जेर काःलाःम्ले ज्योर्पा? खुङला तेर्क्योक एःन्डुबा नावा ची इःम्बा? खुङगीइ काःन्डुले एःन्डुबा याःमाछाककीइ लेःगाक्या पेःखुउबा? 3दीखो नी सीङगीइ लेःगा पेःगेन्दी मरीयमगीइ पुः मीःङे ले? ची दीखो याकुब, योसेफ, यहुदा ओःले सीमोनगीइ आता मीःङे ले? खुङगीइ नोःमोक्याङ उःक्या ङीमु दीलारा एः।” ओः सोङ्गारा, खुङला मीःक्याइ सेमल्हुक मालु। 4ओःले येशुइ खुङक्याला लाःसी, “कोन्ज्योइ लेःङ्गो तेर्केन मीःक्याला राःङगीइ युःल क्याःसाइ मीःक्याइ, राःङगीइ छ्योरीक्याइ ओःले राःङगीइ फेबेक्याइ बाहेक राःङ्सा ठाउँगीइ मीःक्याइ खुङक्याला सेःसा पेःउए।” 5येशुइ ओःला चीङ नेःपाक्याला लाःक्पा ज्यादी टाःच्युजे बाहेक राःङ्सा चीङ याःमाछाककीइ लेःगाक्या पेःमाःखु। 6राःङगीइ ठाउँगीइ मीःक्याइ सेमल्हुक मालुक्योक थोङ्दी येशुला याःमाछाक नेसी।
येशुइ योबाक्याला याःबु लेःङ्गो टाःम्च्युजेला ताङ्क्योक
(मत्ती १०:५-१५; लुका ९:१-६)
ओःले येशु युःल युःलक्याला लोप्तेरा काःल्सी। 7येशुइ चीङ्ङीरा योबाक्याला खुङ साःला केक्याःप्सी ओःले खुङक्याला हेन्डी तेङेन्दी ल्हे तेर्सी। ओःले खुङगीइ मेःन्दा ङी ङी पेःदी खुङक्याला ताङ्तेर्सी। 8येशुइ खुङक्याला एःन्डु लाःसी, “लाःम्ज्याङगीइ लागी पेःर्का चीग बाहेक राःङ्सा साःप्च्या, काःल्दा ओःले डेबा चीङ माःखुर। 9लेखाम केःङ्दो इःनाङ राःङ्सा फेर्तीगेन केःला माःखुर। 10काःखो खीमगीइ मीःक्याइ ख्याक्याला तोःङ्ज्याङ पेःबा, ओः युःल माःपोःरथुप ओःखो खीमलारा तेः। 11काःखोङ ठाउँगीइ मीःक्याइ ख्योक्याला तोःङ्ज्याङ माःबे लाःना ओःले ख्योक्याइ ताम माःको लाःना ओः मीःक्याला कोन्ज्योइ पेःगेन ठीमगीइ चेताउनी तेर्चेला ख्योक्याइ राःङगीइ स्याःप्टाइ तुःल प्रुदी#६:११ स्याःप्टाइ तुःल प्रुदी स्याःप्टाइ तुःल प्रुजे लाःक्योकदी ओःखो ठाउँगीइ मीःक्याइ येशुइ बारेइ याःबु लेःङ्गोला सेमल्हुक मालुक्योक सोङ्गारा खुङक्याला इन्कार पेःक्योक इःङे। ओः ठाउँला पोःर्तेर!”
12ओः तीङ्ला ओः योबाक्या लाःम स्युःसी ओःले युःल युःलला काःल्दी स्याबा पेःदी लाःयो पोःर्तो ओःले कोन्ज्योछ्योले लोःदो लाःती मीःक्याला लाःकाला स्युःसी। 13खुङक्याइ हेन्डी क्याःप्क्योक माःङ्बुरा मीःक्यालाःम्ले हेन्डी तेङ्सी ओःले माःङ्बुरा नेःपा मीःक्याला माःर्कु टुःल्तेर्सी ओःले टाःच्युसी।
बप्तीस्मा तेर्केन्दी युहन्ना सीक्योक
(मत्ती १४:१-१२; लुका ९:७-९)
14येशुइ मीःन छ्योसीःछ्योराले फेल्क्योक सोङ्गारा हेरोद क्याःल्बुइयाङ खुङगीइ बारेला कोःसी। चीङ मीःक्याइ एःन्डु लाःतेरा एःके, “बप्तीस्मा तेर्केन युहन्ना सीक्योकलाःम्ले सेन्दी एः। ओः सोङ्गारा, नी खुङगीइ एःन्डुबा ल्हेइ लेःगाक्या पेःदी एः।” 15काःजेइदी लाःकुके, “खुङ कोन्ज्योइ लेःङ्गो तेर्केन्दी एलीया इःङे।” ओःले राःङ्साक्याइ लाःकुके, “खुङ नी तोःङ्गीइ कोन्ज्योइ लेःङ्गो तेर्केन्दी मीःक्यानाःङ्गीइ मेःन्दा चीग च्योःङ्रा इःङे।” 16इःनाङ दी ताम हेरोदकीइ कोःमीःजीक खुङगीइ लाःसी, “बप्तीस्मा तेर्केन्दी युहन्नाइ गो नी ङाःइरा तुप्च्युक्योक इःङे, इःनाङ ओःखो ताःसे सीक्योकलाःम्ले सेन्दु।”
17चीङ तीःजी तोःङ्ला हेरोद राःङगीइरा युहन्नाला जुम्दी ताःम्दीमाराङ चेङाङला काच्युदी एःके। हेरोदकीइ एःन्डु पेःसी चीलेलाःना हेरोदकीइ राःङगीइ नोः फीलीपकीइ छ्युङ्मा हेरोदीयासला याःर्का क्याःप्ती एःके। 18बप्तीस्मा तेर्केन्दी युहन्नाइ हेरोदला एःन्डु लाःतीरा तेःसी, “राःङगीइ नोःइ पेःमे ख्योङ्दी ज्याजे डीक्पु मीःङे।”
19ओः सोङ्गारा, हेरोदीयासला युहन्ना ङीमु सीःताङ लाःङ्दी एःके ओःले खुङगीइ युहन्नाला सेचे छोल्दी एःके इःनाङ क्याःल्बु हेरोदकीइ पेःगासुना खुङगीइ चीङ पेःखुदी म्याःके। 20हेरोद युहन्ना ङीमु जीउके चीलेलाःना युहन्ना ताःक्पा ओःले चाङ्मा मीः एःके लाःती खुङगीइ छोर्ती एःके, ओः सोङ्गारा, खुङला याःबु पेःदी ज्यादी एःके। युहन्नाइ लोप्क्योक ताम कोःदी खुङ जोल्नाङ खुङगीइ केःदाङ पेःदीरा कोःउके।
21इःनाङ हेरोदीयासकीइ बदला लेःङेन मौका ज्योर्सी। हेरोदकीइ केबुइ ङीःमाला छ्योम्बो डेन जोदी एःके। डेनला खुङगीइ गालील क्षेत्रइ छ्योम्बो छ्योम्बो शासकक्या, थेक्याइ कप्तानक्या छेस्यो मीःक्याला केक्याःप्ती एःके। 22हेरोदीयासकीइ पोःमो नाःङ्ला ओःङ्सी ओःले छ्याम्सी। खुङगीइ छ्याम्क्योक थोङ्दी क्याःल्बु ओःले खुङगीइ डोम्बोक्या थाम्जेर केःदाङ काःल्सी। ओःले क्याःल्बुइ खुङला लाःसी, “ङाःला ख्योइ ची सेम थेती एःपा ओःखो लाङ्दो ओःले ङाः ख्योला ओःखो तेर्के।” 23क्याःल्बुइ ना लुदी ओःखोला लाःसी, “ख्याइ ङाः ङीमु ची लाङ्बा ङाः ओःखोरा तेर्के। ङाःइ क्याःल्खापकीइ फे लाङ्सी लाःनाङ तेर्के।”
24ओःले ओःखोइ फीला थेङ्दी राःङगीइ आमाला टीःसी, “ङाः ची लाङ्गा?” खुङगीइ आमाइ लाःसी, “बप्तीस्मा तेर्केन्दी युहन्नाइ गो लाङ्दो।”
25खुङ गेबु गेबु क्याःल्बु साःला काःल्दी लाःसी, “ङाःला ताःसेरा बप्तीस्मा तेर्केन युहन्नाइ गो तेःर्माला ज्यादी ना!”
26दीखो कोःदी क्याःल्बु माःङ्बुरा तुःङाल पेःसी, इःनाङ ओःजेइ डोम्बोक्याइ तोःङ्ला ना लुदी तेर्के लाःक्योक सोङ्गारा मेतेर लाःमाःखु। 27ओः सोङ्गारा, खुङगीइ युहन्नाइ गो तुप्ती खेर्च्यो लाःती राःङगीइ थेला हुकुम तेर्सी। थे चेङाङला काःल्दी युहन्नाइ गो तुप्सी, 28ओःले ओःखोइ गो तेःर्माला ख्योङ्दी पेःन्पीःजाला तेर्सी। खुङगीइ ओःखो खेर्ती राःङगीइ आमाला तेर्सी।
29दी ताम कोःदी युहन्नाइ योबाक्या ओःङ्दी खुङगीइ रोः तुःर्साला खेर्ती तीःप्सी।
येशुइ हाजार ङा मीःक्याला साःच्युक्योक
(मत्ती १४:१३-२१; लुका ९:१०-१७; युहन्ना ६:१-१४)
30मेःन्दा चीङ्ङी प्रेरीतक्या लोःदी ओःङ्दी येशु ङीमु जोम्सी ओःले राःङगीइ पेःक्योक ओःले लोप्क्योक थाम्जेर तामक्या खुङला लाःसी। 31ओःले येशुइ खुङक्याला लाःसी, “उः सुङ म्याःक्योक ठाउँला काःल्दी चीङ तीःजी थाङ सोगा।” चीलेलाःना माःङ्बुरा मीःक्या ओःङेन डोगेन पेःक्योक सोङ्गारा खुङ ओःले खुङगीइ योबाक्याला साःगेन लुःङाङ म्याःके। 32ओः सोङ्गारा, खुङक्या टुःला जादी सुङ म्याःक्योक ठाउँला काःल्सी। 33इःनाङ माःङ्बुरा मीःक्याइ खुङक्याला डोदेरा पेःक्योक थोङ्सी ओःले ङोःसेसी, ओःले खुङक्या क्याःसाक्यालाःम्ले काङ्बाइरा छ्योङ्देरा काःल्दी ओः ठाउँला येशु ओःले खुङगीइ योबाक्या भन्दाङ तोःङ्ला लेप्सी। 34येशु टुःलाःम्ले पाःप्तेरा पेःगासुना मीःक्याइ छ्योम्बो पोर्चोमगीइ राःङला कुःदी तेःक्योक थोङ्दी येशुइ सेमला नीङ च्योःदी ओःङ्सी चीलेलाःना खुङक्या कोःरालु म्याःक्योक लुःकक्या च्योःङ्रा एःके। ओः सोङ्गारा, येशुइ खुङक्याला माःङ्बुरा तामक्याइ बारेला लोप्काला स्युःसी।
35नाःम छेचे चाल्मीःजीक खुङगीइ योबाक्याइ खुङला लाःसी, “ताः नाःम छेचे चाल्सीःङ्सी ओःले दीखो एकान्त ठाउँ एः। 36दी मीःक्याला ताङ्तेर ओःले खुङक्या छुरफारकीइ युःल खीमक्याला काःल्दी राःङला साःजेला चीङ स्याःक्या ङ्योःज्युक।” 37येशुइ लेःन लोदी लाःसी, “ख्योक्याइरा खुङक्याला साःजे तेर।” योबाक्याइ लाःसी, “ची ख्याइ ङीःला क्याः ङी ङुलगीइ टाङ्गा#६:३७ ङुलगीइ टाङ्गा ङुलगीइ टाङ्गा चीगदी लेःगा पेःगेन मेःन्दा चीग मीःइ ङीःमा चीगला ज्योर्केन ला इःङे। डेबा खर्च पेःदी दीखुङक्याला खुरा साःजे तेर लाःती ख्या लाःकुबा?” 38येशुइ खुङक्याला टीःसी “ख्याक्या ङीमु काःजे थाल खुरा एःपा? सुङ ओःले तादो ले।” खुङक्याइ तासी ओःले खुङला लाःसी, “ङाथाल खुरा रा ङीथाल ङ्याः दु।”
39ओः तीङ्ला येशुइ योबाक्याला मीःक्याला छोबा छोबा पेःदी ङोम्बो चाला तेःच्युदो लाःसी। 40ओः सोङ्गारा, मीःक्या क्याः रेःरे ओःले खाल ङी रा च्यु-च्युइ छोबाक्या पेःदी तेःसी। 41ओःले येशुइ ओः ङाथाल खुरा ओःले ङीथाल ङ्याः लेःङ्दी नाःम्खालीङछ्योले तादी कोन्ज्योला थुजीछे तेर्सी। ओःले खुङगीइ खुरा च्यादीमाराङ मीःक्याला केःतेर लाःती योबाक्याला तेर्सी। ओःन्डुलेरा खुङगीइ ओः ङीथाल ङ्याःङ केःतेर्सी। 42थाम्जेरकीइ डाङेनथुप साःसी। 43ओःले योबाक्याइ ल्हाक्योक खुरा ओःले ङ्याःइ पुःजुपक्या तुःगासुना पती चीङ्ङी काःङ्सी। 44ओःला साःगेन्दी ख्यापीःजाक्या चीग्रा हाजार ङा एःके।
येशु छ्युखाला काःल्योक
(मत्ती १४:२२-३६; युहन्ना ६:१५-२१)
45ओः तीङ्ला येशुइ खुङगीइ योबाक्याला टुःला काल्दी छोइ फार्केनला बेथसेदाला खुङ भन्दा तोःङ्ला ताङ्सी। इःनाङ खुङदी मीःक्याला ताङ्तेर्चेला ओःलारा तेःसी। 46मीःक्याला बीदा पेःसीङमीःजीक येशु प्रार्थना पेःजेला काःङला काःल्सी। 47नाःम छेकासुना टुः छोइ कील्ला एःके, ओःले खुङदी चीग्रा चीग देपला एःके। 48योबाक्याला टुः चालाइतीजे काःबु काःल्क्योक खुङगीइ थोङ्सी, चीलेलाःना ल्हाबा खुङक्याइ तोःङ्लाःम्ले ओःङ्दी एःके। ङामु सुम बजेक्या येशु योबाक्याछ्योले ओःङ्सी। खुङ छ्युखाला डोदेरा एःके ओःले खुङक्या भन्दा तोःङ्ला डोजे छोल्सी।
49इःनाङ खुङक्याइ येशु छ्युखाला डोदेरा पेःक्योक थोङ्दी खुङ नी हेन्डी का दुबा लाःती खुङक्याइ चीरे तेङ्सी। 50चीलेलाःना खुङला थोङ्दी खुङक्या थाम्जेर जीसी। इःनाङ येशुइ गेबु गेबु खुङक्याला लाःसी, “जीबा माःबे! ङाः इःङे, आ क्याःप्तो।” 51ओःले येशु खुङक्या ङीमु टुः नाःङ्ला जासी, ओःले ल्हाबा छ्याबे तेःसी। ओःले योबाक्या माःङ्बुरा याःमाछाक काःल्सी, 52चीलेलाःना येशुइ हाजार ङा मीःक्याला साःच्युक्योक थोङ्दीङ खुङक्याइ ओःखोइ लेःन सेखुदी म्याःके चीलेलाःना खुङक्याइ सेम माःङ्बुरा ताःम्बु काःल्दी एःके।
53येशु योबाक्या ङीमु छो तर्तीदी फार्केनला गनेसरेतला लेप्सी ओःले खुङक्याइ टुः छोइ सुःरछ्योले ज्यासी। 54टुःलाःम्ले खुङक्या पाःप्लुङ्म्याःपा मीःक्याइ येशुला ङोःसेसी। 55ओः सोङ्गारा, खुङक्या छ्योसीःछ्योले छ्योङ्देरा काःल्दी येशु ओःङ्क्योक लेःङ्गो फेल्सी। ओःले मीःक्याइ नेःपाक्याला तेनरा ङीमु खुर्ती येशु साःला ख्योङ्गाला स्युःसी। 56युःल, क्याःसा ओःले बस्ती काःला काःला येशु काःल्बा, ओःलाइ छोङ्साक्याला मीःक्याइ नेःपाक्या खुर्ती ख्योङ्गुके। खुङक्याइ येशुला खुङगीइ केःलाइ सुःरला चीग्रा एःनाङ ओः नेःपाक्याला देजे तेर लाःती वासी पेःउके ओःले येशुइ केःलाला देगेनक्या थाम्जेर टाःउके।
Currently Selected:
मर्कुस 6: SYW
Highlight
Share
Copy
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
