मर्कुस 5
5
हेन्डी क्याःप्क्योक मीः टाःक्योक
(मत्ती ८:२८-३४; लुका ८:२६-३९)
1येशु ओःले खुङगीइ योबाक्या गालील छोइ फार्केनगीइ गेरासेनसक्याइ क्षेत्रला लेप्सी। 2येशु टुःलाःम्ले पाःप्लुङ्म्याःपा मेःन्दा चीग हेन्डी क्याःप्क्योक मीः तुःर्साइ#५:२ तुःर्साइ दी तुःर्साक्यादी च्यार्का तोःला सुप तोल्दी जोक्योक फुक च्योःङ्रा इःङे। छेत्रले छ्योङ्देरा खुङला फ्रेचेला ओःङ्सी। 3ओः मीः तुःर्साइ फुकक्याला तेःकुके। खुङला सुइयाङ ताःम्दी ज्यामीःखुके, च्याल्दाइयाङ ताःम्दीङ ज्यामीःखुके। 4माःङ्बुरा खेप खुङगीइ लाःक्पा काङ्बा च्याल्दाइ तादी ज्याउके, इःनाङ खुङगीइ च्याल्दारा चेती छ्योङेन्दी पेःउके। सुइयाङ खुङला काबुला ज्याजे मीःखुके। 5कुःङ्मु ङीःमाला खुङ चीरे तेङ्देरा ओःले राःङगीइ जुबुला तोःइ चीथार्तीदेरा तुःर्साक्या ओःले देपक्याला हीर्ती तेःकुके।
6खुङगीइ येशुला थारीःङ्बुलेरा थोङ्सी ओःले छ्योङ्देरा ओःङ्दी खुङगीइ तोःङ्ला पीमु चुसी, 7ओःले छ्योम्बो केइ चीरे तेङ्दी लाःसी, “ए येशु, थाम्जेरलेङ छ्योम्बो कोन्ज्योइ पुः, ख्याइ ङाःला ची पेःजे चाल्क्योक? कोन्ज्योइ मीःनला ङाः ख्याला वासी पेःगे, ङाःला तुःक्पु मातेर!” 8ओः मीःइ एःन्डु लाःसी चीलेलाःना येशुइ ओःखोला तोःङ्लारा एःन्डु लाःती एःके, “ए माःताक्पा ला, ओः मीःलाःम्ले थेङ्दी स्यो!” 9ओःले येशुइ खुङला टीःसी, “ख्योइ मीःन ची इःम्बा?” ओःखोइ येशुला लाःसी, “ङाःइ मीःन फौज इःङे, ङीःक्या माःङ्बुरा एः।” 10ओःले ओः हेन्डीइ येशुला ओः ठाउँलाःम्ले खुङक्याला त्याःमातेर लाःती वासी पेःदीरा तेःसी।
11ओःखो काःङगीइ देपला छोबा चीग फाक्या#५:११ फाक्या यहुदीक्याइ लागी फाक्यादी असुद्ध पशुक्या इःङे ओःले खुङक्याइ फाइ स्या नाःमाङ मेःसाके। दीला फाइ बारेला ताम लाःतेरा एःक्योक सोङ्गारा दी ठाउँदी यहुदीक्या मेःतेकेन ठाउँ एःके। चा साःदेरा एःके। 12ओःले ओः हेन्डीइ येशुला वासी पेःदी लाःसी, “ङीःक्याला ओः फाक्या साःला डोजे तेर, ओःले ङीःक्या ओः नाःङ्ला स्युःगे।” 13येशुइ ओः हेन्डीक्याला डोगेन अनुमती तेर्सी। ओः हेन्डीक्या ओः मीःलाःम्ले थेङ्दी फाक्या नाःङ्ला स्युःसी। ओःले ओः हेन्डीक्या फाइ पोर्चोमला स्युःलुङम्याःपा हाजार ङी चे फाक्या प्य्राःलाःम्ले माःर्ला छ्योङ्देरा काःल्दी छोला ताःप्ती बीङ्दी सीसी।
14एःन्डुबा थोङ्दी फा छोगेनक्या छ्योङ्सी ओःले खुङक्याइ ओः ताम ओः युःल ओःले क्याःसा काःङ्रा टाःम्सी। ओःले माःङ्बुरा मीःक्या ची काःल्दुबा लाःती ताजेला येशु साःला ओःङ्सी। 15तोःङ्ला हेन्डीक्या क्याःप्क्योक मीः ताःसे नावा याःबु काःल्दी केःला केःङ्दी येशुइ काङ्बाइ सुःरला तेःक्योक खुङक्याइ थोङ्सी। दीखो थोङ्दी खुङक्या माःङ्बुरा जीसी। 16दीखो थोङेनक्याइ ओः मीः काःन्डुले टाःक्योक ताम ओःले फाक्याइ बारेला थाम्जेर ताम राःङ्साक्याला लाःसी। 17एःन्डुबा ताम कोःदी ओः क्षेत्रइ थाम्जेर मीःक्याइ येशुला ओःलाःम्ले सुङ लाःती वासी पेःसी।
18येशु टुःला जादेरा एःकासुना ओः टाःक्योक मीःइ येशुला वासी पेःदी लाःसी, “ङाःलाङ ख्याइ ङीमुरा खेर्ती सुङ!” 19इःनाङ येशुइ खुङला ओःङ्जे मातेर, बरु एःन्डु लाःसी, “ख्यो राःङगीइ खीमला सुङ ओःले प्रभुइ ख्योला काःन्डुले नीङ च्योःदी एःपा ओःले खुङगीइ ख्योला पेःक्योक थाम्जेर ताम राःङ्साक्याला लोःप।” 20ओःले ओः मीः काःल्दी क्याःसा च्युइ मीःक्याला येशुइ राःङगीइ लागी पेःक्योक लेःगा थाम्जेरला लाःसी। ओःले कोःगेन मीःक्या याःमाछाक काःल्सी।
याइरसकीइ पोःमो ओःले मेःन्दा चीग नेःपा पेःन्पीःजा
(मत्ती ९:१८-२६; लुका ८:४०-५६)
21येशु लोःदीमाराङ छोइ छुर्केनछ्योले ओःङ्सी। ओःला छोइ सुःरछ्योले एःकासुना मीःइ पोर्चोमगीइ खुङला जोम्सी। 22याइरस लाःकेन मेःराङ चीग यहुदीक्याइ जोम्साखीमगीइ छेस्यो मीः ओःङ्दी येशुइ तोःङ्ला पीमु चुसी 23ओःले वासी पेःदी लाःसी, “ङाःइ छीमी पोःमो सीजे छोल्दी एः। ख्या ओःङ्दी खुङला देतेर ओःले खुङ टाःदी सेन्जे एः।”
24ओःले येशु याइरस ङीमु काःल्सी। माःङ्बुरा मीःक्या खुङगीइ तीङ तीङ्ला ओःङ्दी छ्योसीःरालाःम्ले पोर्चोम काःल्सी। 25ओः मीःइ पोर्चोमला लोः चीङ्ङी तोःङ्मीःजीक ठा डोगेन नाःजालाःम्ले तुःक्पु ज्योर्क्योक मेःराङ चीग पेःन्पीःजाङ एःके। 26खुङला काःखोइयाङ टाःच्युदी म्याःके। एःक्योक थाम्जेर नोःर क्युःक्या ओः नाःजालारा सीःङ्दी एःके, इःनाङ टाःजे नी ची ताःरुङ नाःजाइ स्युःसेर माःङ्बु काःल्दी एःके। 27खुङगीइ येशुइ बारेला राःङ्सा मीःक्यालाःम्ले कोःदी एःके। ओः सोङ्गारा, खुङ येशुइ तीङ्लाःम्ले पोर्चोमला ओःङ्सी ओःले खुङगीइ केःला देसी, 28चीलेलाःना खुङगीइ सेम सेमलारा लाःती एःके, “खुङगीइ केःला चीग्रा देजे ज्योर्सी लाःनाङ ङाः टाःजे एःके।” 29येशुइ केःलाइ सुःरला देलुङ्म्याःपा, ओः तेःकासुरा खुङगीइ ठा डोजे पोःर्सी ओःले राःङगीइ जुबुइ नाःजा टाःक्योक खुङगीइ छोर्सी। 30ओः तेःकासुरा येशुइ राःङलाःम्ले ल्हे थेङ्दी काःल्क्योक छोर्सी। खुङ मीःक्याइ पोर्चोमछ्योले लोःसी ओःले टीःसी, “ङाःइ केःलाला सुइ देबा?” 31खुङगीइ योबाक्याइ लाःसी, “तादो! एःजे मीःक्याइ पोर्चोमगीइ ख्याला फुल्देरा एः, ओःलेङ ख्याला सुइ देबा लाःती काःन्डुले टीःखुउबा?” 32इःनाङ येशुइ राःङला सुइ देबा लाःती छुरफारला तासी। 33ओः पेःन्पीःजाइ राःङला काःल्क्योक ताम छोर्कारा जीबाइ दार्तेरा ओःङ्सी ओःले येशुइ काङ्बा तोःङ्ला पीमु चुसी ओःले खुङ ओः तेःकासुरा काःन्डुले टाःबा ओः ताम येशुला लाःसी। 34ओःले येशुइ पेःन्पीःजाला लाःसी, “आजी, ख्योइ सेमल्हुककीइ पेःसुना ख्योला टाःच्युदी एः, ताः खाम्साङ्बुले सुङ ओःले ख्योइ नाःजा टाःज्युक।”
35येशुइ एःन्डु लाःसुना लाःसुनारा याइरसकीइ खीमले चीङ मीःक्या ओःङ्दी याइरसला लाःसी, “ख्याइ पोःमो नी सीसीःङ्सी, ताः लोबेनला चीले तुःक्पु तेर्केन्दी?” 36खुङक्याइ लाःक्योक ताम येशुइ कोःसी ओःले याइरसला लाःसी, “ख्यो माःजी, सेमल्हुक चीग्रा लुदो।” 37येशुइ पत्रुस, याकुब ओःले याकुबकीइ नोः युहन्नाला बाहेक राःङ्सा सुलाङ राःङ ङीमु डोजे मातेर। 38खुङक्या याइरसकीइ खीमला लेप्कासुना थाम्जेर ङुःदेरा ओःले तुःङाल पेःदेरा पेःक्योक थोङ्सी। 39येशु नाःङ्ला स्युःदी खुङक्याला लाःसी, “चीले ङुःदेरा ओःले तुःङाल पेःदेरा एःपा? दी पीःजा नी ङी चीग्रा लोःदी एः, सीदी म्याः!” 40इःनाङ दीखो ताम कोःदी खुङक्याइ येशुला केःमु क्याःप्सी। ओः सोङ्गारा, येशुइ थाम्जेरला फीला तेङ्सी ओःले पीःजाइ आःबा आमा ओःले राःङगीइ मेःराङ सुम योबाक्याला खेर्ती नाःङ्ला पीःजा एःक्योक कोठाला काःल्सी। 41येशुइ पीःजाइ लाःक्पाला जुम्दी लाःसी, “तालीता कुमी!#५:४१ तालीता कुमी! तालीता कुमी लाःक्योकदी आरामाइक तामला लाःकुके। दी तामदी येशु इस्राएलला एःकेन तीःजीला लाःकुके।” दीखो लाःक्योकदी, “एः पीःजा लोःङ!” 42ओःले पीःजा जुरुक्का लाःङ्सी ओःले छुरफारला डोगाला स्युःसी (खुङ लोः चीङ्ङीइदी एःके)। दीखो थोङ्दी थाम्जेर माःङ्बुरा याःमाछाक काःल्सी। 43इःनाङ येशुइ खुङक्याला ओःखो ताम सुलाङ माःलाःप लाःती चोक्पो आज्ञा तेर्सी। ओःले येशुइ ओः पीःजाला चीङ साःगेन स्याः तेर लाःती लाःसी।
Currently Selected:
मर्कुस 5: SYW
Highlight
Share
Copy
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
