मर्कुस 7
7
ठीमक्याइ बारेला लोप्क्योक
(मत्ती १५:१-९)
1यरुशलेम क्याःसालाःम्ले ओःङ्क्योक फारीसीक्या ओःले छ्येइ ठीमगीइ लोबेनक्या येशुइ छुरफारले जोम्सी। 2ओःले येशुइ योबाक्या काःजेइदी लाःक्पा माःठुबारा साःप्च्या साःक्योक खुङक्याइ थोङ्सी। 3(चीलेलाःना फारीसीक्याइ ओःले राःङ्सा यहुदीक्याइयाङ राःङगीइ फाफामुमीःजीक पेःदी ओःङ्क्योक ठीमगीइ लाःक्योक च्योःङ्राले लाःक्पा माःठुबाइ साःप्च्या मेःसाःए। 4खुङक्या छोङ्सालाःम्ले ओःङ्मीःजीक राःङला जुबु ठुदी चाङ्मा माःजोबाइ चीङ मेःसाए। खुङक्याइदी एःन्डुबा राःङ्सा माःङ्बुरा ठीमक्या एः, खुङक्याइ बोङ्नेक्या, साःङ्बुङक्या ओःले तीःकक्या ठुदी चाङ्मा जोउए।)
5ओः सोङ्गारा, फारीसीक्या ओःले छ्येइ ठीमगीइ लोबेनक्याइ टीःसी, “चीले ख्याइ योबाक्याइ उःइ फाफामुमीःजीक पेःदी ओःङ्क्योक ठीम माःङीःनबाइ लाःक्पारा माःठुबा साःउबा?” 6येशुइ खुङक्याला लाःसी, “कोन्ज्योइ लेःङ्गो तेर्केन्दी यशैयाइ प्रुःक्योक दी ताम ख्या खोक्नाकक्याला डीक्कुए,
‘कोन्ज्योइ लाःकुए, दी मीःक्याइ ङाःला खाइ चीग्रा सेःसा पेःउए, इःनाङ खुङक्याइ सेम लाःना ङाःछ्योले म्याः।
7 दीखुङक्याइ ङाःला तेःमेला मेःबा पेःउए, चीलेलाःना दीखुङक्याइ लोप्क्योक ताम मीःक्याइ जोक्योक ठीमक्या चीग्रा इःङे।’ #
यशैया २९:१३
8 ख्याक्याइ कोन्ज्योइ आज्ञा मीःङीन एः ओःले मीःक्याइ ठीमक्यादी ङीःन्गुए।”
9येशुइ खुङक्याला लाःसी, “ख्याक्या राःङगीइ ठीमक्या ङीःन्जेला काःजे च्याङ्बु चादी कोन्ज्योइ आज्ञाक्या इन्कार पेःउए। 10चीलेलाःना मोशाइ लाःती एः, ‘राःङगीइ आबा आमाला सेःसा पेःदो,’#प्रस्थान २०:१२; व्यवस्था ५:१६ ओःले ‘काःन्दीइ राःङगीइ आबा आमाला खाम्सी क्याःप्पा ओःखोला सेराकोःउए।’#प्रस्थान २१:१७; लेबी २०:९ 11इःनाङ ख्याक्याइ मीःक्याला खुङक्याइ आबा आमाला एःन्डु लोःप लाःती लोप्कुए, ‘ख्याक्याइ ङाःलाःम्ले ज्योर्कोःन थाम्जेर ताम कुर्बान इःङे।’ (कुर्बान लाःक्योकदी कोन्ज्योला फुल्क्योक भेटी इःङे)। 12एःन्डुले ख्योक्याइ खुङक्याला राःङगीइ आबा आमाइ लागी चीङ पेःजे मेतेरए। 13ओः सोङ्गारा, ख्याक्याइ लोप्क्योक ठीमक्या थार्च्युजेला कोन्ज्योइ आज्ञालादी इन्कार पेःउए। ओःले ख्याक्याइ एःन्डुबा माःङ्बुरा राःङ्सा लेःगाक्याङ पेःउए।”
मीःक्याला चीबु जोगेन तामक्या
(मत्ती १५:१०-२०)
14येशुइ फीर्च्या मीःक्याला केक्याःप्ती लाःसी, “ख्याक्या थाम्जेरकीइ सेम तेर्ती ङाःइ ताम कोःदो ओःले सेदो। 15मीःक्याइ खालाःम्ले साःगेन साःप्च्याइ खुङक्याला चीबु मेःजोए इःनाङ खुङक्याइ सेमलाःम्ले थेङेन तामक्याइ खुङक्याला चीबु जोउए। 16[काःखोक्याइदी कोःगेन नाम्ज्यो एःपा, ओःखोक्याइ कोःज्युक!]#७:१६ काःजे ग्रीक तामगीइ तोःङ्गीइ कोन्ज्योइ छ्येक्याला दीखो पद म्याः।”
17येशुइ मीःक्याला पोःर्ती खीम नाःङ्ला स्युःमीःजीक खुङगीइ योबाक्याइ खुङगीइ लाःक्योक तामगीइ लेःन ची इःम्बा लाःती टीःसी। 18येशुइ खुङक्याला लाःसी, “ची ख्योक्याइ ताःरुङ मासेबा? मीःइ खालाःम्ले साःगेन साःप्च्याइ मीःला चीबु मेःजोए लाःती ख्योक्याइ सेकोःन्दी। 19चीलेलाःना दीखो मीःइ सेमला मेःन्डोए, इःनाङ दीखो टोःपा नाःङ्ला स्युःउए ओःले फीला थेङ्दी डोउए।” (एःन्डु लाःती येशुइ थाम्जेर साःगेन स्याः चाङ्मा इःङे लाःतेर्सी।)
20येशुइ ताःरुङ लाःसी, “मीःक्याइ सेम नाःङ्ले थेङ्क्योक तामगीइ मीःक्याला चीबु जोउए। 21चीलेलाःना मीःइ सेम नाःङ्ले थेङ्क्योक माःरीक्पा ठीवाक्याइ पेःगासुना व्यभीचार पेःजे, कुजे, मीः सेचे, व्यभीचार पेःजे, 22फाङ्जे, माःरीक्पा लेःगा पेःजे, स्योप क्युःर्चे, छ्याल्जे, मीफामु पेःजे, माःताक्पा च्याःङ्जे, खोक्नाक पेःजे ओःले मुर्ख लेःगा पेःजे च्योःङ्रा माःइबा लेःगाक्या पेःउए। 23दी थाम्जेर तामक्यादी मीःइ सेम नाःङ्लेरा थेङ्गुए ओःले दी तामक्याइरा मीःला चीबु जोउए।”
राःङ्सा क्युःपाइ पेःन्पीःजाइ सेमल्हुक
(मत्ती १५:२१-२८)
24ओः तीङ्ला येशु ओः ठाउँ पोःर्ती टुरोस रा सीदोन क्याःसा सुःरक्याला एःक्योक छेत्रला काःल्सी। खुङ मेःराङ चीगकीइ खीमला स्युःसी ओःले खुङ ओःला एः लाःकेन ताम सुइयाङ माःछोर्च्युक लाःती खुङ सेम पेःउके। इःनाङ मीःक्याइ ओः ताम छोर्तीहाल्तीसी। 25ओः तेःकासुरा मेःराङ चीग पेःन्पीःजाइ खुङगीइ बारेला कोःलुङ्म्याःपा खुङ साःला ओःङ्दी खुङगीइ तोःङ्ला पीमु चुदी तेःसी। ओः पेःन्पीःजाइ पोःमोलादी हेन्डी क्याःप्ती एःके। 26ओः पेःन्पीःजा सीरीयाइ फोनीकेला केक्योक राःङ्सा क्युःपाइ ग्रीक पेःन्पीःजा एःके। ओः पेःन्पीःजाइ राःङगीइ पोःमोलाःम्ले हेन्डी तेङ्तेर लाःती येशुला वासी पेःसी। 27इःनाङ येशुइ लाःसी, “तोःङ्ला पीःजाक्याला डाङ्जेथुप साःजे तेर्कोः। खुङक्याइ साःगेन स्याः फ्रोदी खीक्याला तेर्चे डीक्पु मीःङे।” 28ओःले पेःन्पीःजाइ लाःसी, “इःङे प्रभु, इःनाङ खीक्याइयाङ नी पीःजाक्याइ चोक्ची वाःला ताःप्च्युक्योक पुःजुपक्या साःजे ज्योर्कुए नी!” 29येशुइ ओः पेःन्पीःजाला लाःसी, “ख्योइ एःन्डु लाःक्योक सोङ्गारा ताः ख्यो खीमला सुङ। ख्योइ पोःमोलाःम्ले हेन्डी थेङ्दी काःल्सीःङ्दी एः।” 30खुङ खीमला लोःदी लेप्कासुना राःङगीइ पोःमो तेनला ङ्याःल्दी तेःक्योक फ्रेसी ओःले खुङलाःम्ले हेन्डी थेङ्सीःङ्दी एःके।
येशुइ नाम्ज्यो मेःकोःगेन मीःला टाःच्युक्योक
31येशु टुरोस क्षेत्रलाःम्ले काःल्सी ओःले सीदोन क्याःसा पेःदेरा क्याःसा च्युइ लाःम पेःदी गालील छोला काःल्सी। 32ओःला मीःक्याइ मेःराङ चीग नाम्ज्यो मेःकोगेन्दी ओःले याःबुले ताम लाःमीःखुगेन मीःला येशु साःला ख्योङ्सी, ओःले खुङक्याइ येशुला ओःखोखाला लाःक्पा ज्यातेर लाःती वासी पेःसी। 33येशुइ खोला मीःइ पोर्चोमलाःम्ले तीबी चीग फार्ला सुङ म्याःसाला खेर्सी। ओःले येशुइ ओःखोइ नाम्ज्योला राःङगीइ थेबु लुसी ओःले खुङगीइ थेबुला छेमाक क्युर्ती ओःखोइ चेला देसी। 34ओःले येशुइ नाम्सार्गाछ्योले तासी ओःले रीःङ्बु उ स्याङ्दी ओः मीःला “इफ्फाता!#७:३४ इफ्फाता! इफ्फाता लाःक्योकदी आरामाइक तामगीइ शब्द इःङे। दी ताम येशुइ तीःनामला इस्राएलला लाःकुके।” लाःसी। ओःखो लाःक्योकदी “फ्याज्युक!” इःङे। 35ओः तेःकासुरा ओः मीःइ नाम्ज्यो कोःसी ओःले याःबुले ताम लाःखुगेन्दी काःल्सी। 36येशुइ खुङक्या थाम्जेरला ओः ताम सुलाङ माःलाःप लाःती आज्ञा तेर्सी। इःनाङ खुङगीइ काःजे माःलाःप लाःकेन आज्ञा तेर्पा, मीःक्याइ ताःरुङ माःङ्बु लाःतेरा डोउके। 37दीखो ताम कोःगेन थाम्जेर मीःक्या माःङ्बुरा याःमाछाक्का काःल्दी लाःसी, “खुङगीइ थाम्जेर लेःगाक्या याःबु पेःदी एः। खुङगीइ नाम्ज्यो मेःकोःगेन्दीलाङ कोःच्युउए ओःले लेम्बालाङ ताम लाःच्युउए।”
Currently Selected:
मर्कुस 7: SYW
Highlight
Share
Copy
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
