प्रेरीत 17
17
थेसलोनीकेला
1पावल रा सीलास अम्फीपोलीस ओःले अपोल्लोनीया क्याःसाले पेःदी थेसलोनीकेला लेप्सी। ओःला यहुदीक्याइ जोम्साखीम चीग एःके। 2तेन्दु च्योःङ्रारा पावल ओः जोम्साखीमलाङ काःल्सी ओःले यहुदीक्याइ थाङ सोगेन ङीःमा सुमथुप खुङ छेइ तामक्याइ बारेला खुङक्या ङीमु टाःटेः पेःसी। 3खुङगीइ छेलाःम्ले दास्यी तेर्ती खुङक्याला एःन्डुले लाःसी, “थार्च्युगेन ख्रीष्टकीइ तुःक्पु खुर्ती सीःकोःउके ओःले फीर्च्या सेन्कोःउके, ओःले ङाःइ लेःङ्गो टाःम्सुना लाःकेन येशुरा ओः थार्च्युगेन ख्रीष्ट इःङे।” 4ओःला एःक्योक चीङ यहुदीक्याला दी तामगीइ सेम साःसी ओःले पावल रा सीलास ङीमु डीक्सी। ओःन्डुलेरा कोन्ज्योला मेःबा पेःगेन माःङ्बुरा ग्रीक मीःक्या ओःले मीःक्याइ सेःसा पेःक्योक माःङ्बुरा पेःन्पीःजाक्याइ खुङला सेमल्हुक लुसी।
5इःनाङ राःङ्सा यहुदीक्याइदी खुङक्याला मीसेर पेःसी ओःले ओःलाइ छोङ्साक्याइ गुण्डाक्याला रुःप चीःदी क्याःसाला खैलाबैला पेःच्युसी। ओःले खुङक्याइ पावल रा सीलासला मीःक्याइ तोःङ्ला ख्योङ्जेला यासोनगीइ खीमछ्योले काःल्सी। 6इःनाङ खुङक्याइ पावल रा सीलासला ओःला माःफ्रे। ओः सोङ्गारा, खुङक्याइ यासोन रा प्रभुला सेमल्हुक लुगेन राःङ्सा आतानोःक्याला क्याःसाइ हाकीमक्या साःला टीःतेरा खेर्सी ओःले केताङ्देरा एःन्डु लाःसी, “जाम्बुलीङ काःङ्रा मीःक्याला तुःक्पु तेर्केन मीःक्या ताःसे उःइ क्याःसालाङ लेप्ती एः! 7ओःले यासोनगीइ दीखुङक्याला खुङगीइ खीमला ज्यादी एः। दीखुङक्या थाम्जेरकीइ येशु लाःकेन मेःन्दा चीग राःङ्सारा क्याःल्बु एः लाःती कैसर क्याःल्बुइ हुकुमगीइ वीरुद्ध लेःगा पेःउए।” 8दीखो कोःदी क्याःसाइ मीःक्या ओःले क्याःसाइ हाकीमक्याला सीःताङ लाःङ्सी। 9ओःले ओः हाकीमक्याइ यासोन रा राःङ्साक्याला जरीवाना लेःङ्दी पोःर्तेर्सी।
पावल रा सीलास बेरीया क्याःसाला
10नाःम छेलुङ्म्याःपा, प्रभुला सेमल्हुक लुगेन आतानोःक्याइ पावल रा सीलासला बेरीया क्याःसाला ताङ्सी। ओःला लेप्मीःजीक खुङक्या यहुदीक्याइ जोम्साखीमला काःल्सी। 11ओःलाइ मीःक्या थेसलोनीकेइ मीःक्या भन्दा सेम साङा एःके ओःले खुङक्याइ कोन्ज्योइ लेःङ्गोला केःदाङ पेःदेरा कोःसी। ओःले पावलगीइ लोप्क्योक तामक्या तेःन्दामरा इःङे की मीःङे लाःती खुङक्याइ ङीःमारी टाःङ्मा कोन्ज्योइ छ्ये टोःउके। 12ओः सोङ्गारा, माःङ्बुरा यहुदीक्याइ प्रभुला सेमल्हुक लुसी ओःले छ्योम्बो ग्रीक ख्य्वापीःजाक्या ओःले पेःन्पीःजाक्याइयाङ सेमल्हुक लुसी। 13इःनाङ थेसलोनीकेला एःक्योक यहुदीक्याइ बेरीयालाङ पावलगीइ कोन्ज्योइ लेःङ्गो टाःम्देरा एः लाःकेन ताम कोःसी ओःले खुङक्या बेरीयाला ओःङ्दी मीःक्याला पावलगीइ वीरुद्धला क्यातेर्सी। 14ओः तेःकासुरा सेमल्हुक लुगेन आतानोःक्याइ पावलला चाङ्बुइ सुःरला ताङ्तेर्सी। इःनाङ सीलास ओःले तीमोथीदी ओःला बेरीयालारा तेःसी। 15पावलला क्याल्गाला डोगेन आतानोःक्याइ खुङला एथेन्स क्याःसाथुप क्याल्तेर्सी। ओःला लेप्मीःजीक पावलगीइ राःङला क्याल्गाला ओःङेन आतानोःक्याला सीलास रा तीमोथीला खुबाथुप गेबु खुङ साःला स्यो लाःती खुङक्याला बेरीयाला लोताङ्सी।
पावल एथेन्स क्याःसाला
16पावल एथेन्स क्याःसाला सीलास ओःले तीमोथीला कुःदी तेःकासुना ओः क्याःसा काःङ्रा कुरा कुइ काःङ्क्योक थोङ्दी खुङला तुःक्पु नेसी। 17ओः सोङ्गारा, खुङ जोम्साखीमला काःल्दी यहुदीक्या ओःले कोन्ज्योला जीबा पेःगेन ग्रीक मीःक्या ङीमु बसह पेःउके। ओःन्डुलेरा ङीःमारी टाःङ्मा क्याःसाइ छोङ्साक्याला ओःङेन्दी डोगेन्दी मीःक्या ङीमुङ बसह पेःउके। 18ओःला इपीक्युरी रा स्तोइकी लोबेनक्याइयाङ पावल ङीमु टाःटे पेःसी। खुङक्या नाःङ्ला काःजेइदी लाःसी, “दी तामगेरेइ ची लाकुबा?” काःजेइदी, “दीखोइ नी वीदेशी ल्हाक्याइ बारेला लेःङ्गो फेल्देरा दु!” लाःसी। पावलगीइ येशुइ बारेला ओःले येशु सीक्योकलाःम्ले सोम्बो लोःक्योक बारेला लेःङ्गो फेल्क्योक सोङ्गारा खुङक्याइ एःन्डु लाःक्योक इःङे। 19ओः सोङ्गारा, खुङक्याइ पावलला अरीयोपागसकीइ छोबाला खेर्ती लाःसी, “दी ख्याइ लोप्तेरा पेःक्योक सेम्बा शीक्षाला ङीःइयाङ कोःजेला सेम थेती एः। 20ख्याइ लाःक्योक तामक्या नी ङीःक्याइ लागी सेम्बा तामक्या इःङे, ओःखोइ लेःन चीम्बा ङीःला लोःप।” 21चीलेलाःना एथेन्सकीइ मीःक्या ओःले ओःला तेःकेन वीदेशीक्याइ सेम्बा सेम्बा तामक्या चीग्रा लाःतेरा ओःले कोःदेरा थाम्जेर ङीःमाक्या ताङ्गुके।
22ओः सोङ्गारा, अरीयोपागसकीइ छोबाइ कील्ला पावल लाःङ्दी खुङक्याला लाःसी, “एथेन्स क्याःसाला तेःकेन आतानोःक्या, ख्याक्या नी माःङ्बुरा ताःक्पा डु लाःती ङाःइ छोर्सी। 23चीलेलाःना दी क्याःसाला ङाः युःगासुना ख्याक्याइ च्योल्गेन ठाउँक्याङ तासी। वेदी चीगला ङाःइ ‘ङोःमासेक्योक कोन्ज्योला’ लाःती प्रुःक्योक थोङ्सी। ख्याक्याइ ङोःमासेबारा च्योल्गेन कोन्ज्योइ बारेलारा ताःसे ङाः प्रचार पेःदेरा एः। 24जाम्बुलीङला एःक्योक थाम्जेर स्याःक्या जोगेन कोन्ज्यो रा नाःम्खालीङ रा जाम्बुलीङगीइ तोःप्ता इःङे। खुङ मीःइ जोक्योक मन्दीरक्याला मेःतेःए। 25मीःइ फुल्क्योक चीङ स्याःइदी कोन्ज्योला ताःसुक मेःयोङ्ए। बरु कोन्ज्योइ मीःक्याला मीःजी, मीःली रा कोःकेन थाम्जेर स्याः तेर्कुए। 26जाम्बुलीङ काःङ्रा मीःक्या तेःच्युक लाःती खुङगीइ मीः चीगलाःम्ले थाम्जेर क्युःपाक्याला जोसी रा खुङक्याला जाम्बुलीङ काःङ्रा तेःचे तेर्सी। खुङक्या सेन्कोःन तीःजी ओःले तेःकोःन ठाउँ खुङगीइ तोःङ्लारा डीक्पु जोसीःङ्दी एःके। 27मीःक्याइ खुङला छोल्जेला रा नुःम्सो क्याःप्ती ज्योर्के की लाःती खुङगीइ एःन्डु पेःसी। इःनाङ कोन्ज्यो उःक्या थाम्जेरलाःम्ले थारीःङ्बु म्याः। 28चीलेलाःना उः कोन्ज्योइ तेःनला छार्ती एः ओःले खुङगीइ तेःनलारा छुरफार पेःउए। दीखोइ बारेला ख्याक्याइ मेःन्दा काःजे कवीक्याइयाङ एःन्डु लाःती एः, ‘तेःन्दामरा उः खुङगीइ छार्क्युफुर्क्यु इःङे’। 29ओःले उःक्या कोन्ज्योइ छार्क्युफुर्क्युक्या सोङ्गारा, कोन्ज्योला उःइ लाःक्पा ओःले सीपकीइ सेर, ङुल ओःले तोःलाःम्ले जोक्योक कु च्योःङ्रा इःङे लाःती टेःम्बा साल्मीःङे। 30तोःङ्ला मीःक्याइ मासेबारा पेःक्योक लेःगाक्या कोन्ज्योइ ङीःन्थे माःज्या। इःनाङ ताः कोन्ज्योइ थाम्जेरछ्योइ थाम्जेर मीःक्याला राःङ राःङगीइ लाःयोला स्याबा पेःदी पोःर्तो लाःती आज्ञा तेर्ती एः। 31चीलेलाःना कोन्ज्योइ जाम्बुलीङगीइ थाम्जेर मीःक्याला ठीम पेःगेन ङीःमा तोक्तीसीःङ्दी एः ओःले ओः ङीःमु कोन्ज्यो राःङगीइरा दाम्क्योक मीःलाःम्ले थाम्जेरकीइ ठीम याःबुले पेःगेन एः। खुङला सीक्योकलाःम्ले सेन्च्युदी कोन्ज्योइ थाम्जेर मीःक्याला दीखोइ दास्यी तेर्ती एः।”
32पावलगीइ मीःक्या सीक्योकलाःम्ले सोम्बो लोःउए लाःक्योक ताम कोःदी काःजे मीःक्याइदी खुङला केःमु क्याःप्सी। इःनाङ काःजेइदी एःन्डु लाःसी, “दीखोइ बारेला फीर्च्या राःङ्सा ङीःमुङ ङीः कोःगे।” 33ओःले पावल सभालाःम्ले थेङ्दी काःल्सी। 34इःनाङ काःजे मीःक्यादी पावल ङीमु ओःङ्दी येशु ख्रीष्टला सेमल्हुक लुसी। खुङक्या नाःङ्ला अरीयोपागस सभाइ डीयनुसीयस, दामारीस मीःन पेःक्योक मेःराङ चीग पेःन्पीःजा ओःले राःङ्सा चीङ मीःक्या एःके।
Currently Selected:
प्रेरीत 17: SYW
Highlight
Share
Copy
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
