प्रेरीत 16
16
तीमोथीइ पावल रा सीलासला फ्रेक्योक
1पावल डर्बीला ओःले ओःलाःम्ले पेःदी लुस्त्राला काःल्सी। लुस्त्राला तीमोथी मीःन पेःक्योक प्रभुला सेमल्हुक लुगेन मेःन्दा चीग नोः तेःकुके। खुङगीइ आमादी प्रभुला सेमल्हुक लुगेन यहुदी एःके इःनाङ खुङगीइ आबादी ग्रीक एःके। 2लुस्त्रा रा आइकोनीयनला एःक्योक प्रभुला सेमल्हुक लुगेन थाम्जेर आतानोःक्याइ तीमोथीइ बारेला याःबु ताम लाःकुके। 3पावलगीइ खुङला ङीमुरा खेर्चे सेम पेःसी ओःले यहुदीक्याला केःदाङ जोजेला खुङगीइदी खतना पेःतेर्सी, चीलेलाःना ओः ठाउँक्याला तेःकेन थाम्जेर यहुदीक्याइ तीमोथीइ आबा ग्रीक एःके लाःकेन ताम छोर्ती एःके।
4ओःले खुङक्या क्याःसा क्याःसाक्याला काःल्दी प्रभुला सेमल्हुक लुगेन मीःक्याला यरुशलेमगीइ प्रेरीतक्याइ ओःले कोःम्साइ छेस्योक्याइ ठीवा चेक्योक तामक्या ङीःन्दो लाःती लाःसी। 5एःन्डुले कोःम्साइ मीःक्याइ सेमल्हुक राःम्बु काःल्देरा काःल्सी ओःले प्रभुला सेमल्हुक लुगेन मीःक्या ङीःमारी टाःङ्मा माःङ्बु काःल्देरा काःल्सी।
पावलगीइ त्रोआस क्याःसाला थोङ्क्योक दर्शन
6पावल रा खुङगीइ रोःक्या फ्रीगीया रा गलातीयाइ छेत्रक्याले पेःदी काःल्सी चीलेलाःना चाङ्मा लाइ खुङक्याला एशीयाइ छेत्रक्याला याःबु लेःङ्गो टाःम्जेला डोजे मातेर। 7खुङक्या माइसीयाइ कोःर्साला लेप्मीःजीक बीथीनीयाइ क्षेत्रला डोगेन ठीवा चेसी। इःनाङ येशुइ लाइ खुङक्याला डोजे मातेर। 8ओः सोङ्गारा, खुङक्या माइसीयाले पेःदी त्रोआसला काःल्सी। 9ओः कुःङ्मु पावलगीइ प्रभुलाःम्ले दर्शन ज्योर्सी। खुङगीइ दर्शनला माकेडोनीयाइ मेःन्दा चीग मीः लाःङ्दी खुङला एःन्डुले वासी पेःक्योक थोङ्सी, “माकेडोनीयाला ओःङ्तेर ओःले ङीःला रोः पेःतेर।” 10पावलगीइ ओःन्डुबा दर्शन ज्योर्मीःजीक ङीः तुरुन्त माकेडोनीया डोगेन ठीक पेःसी। चीलेलाःना कोन्ज्योइ ङीःला ओःलाइ मीःक्याला याःबु लेःङ्गो टाःम्च्युजेला केक्याःप्क्योक इःङेन दुबा लाःती ङीःइ ठीवा चेसी।
लीडीयाइ सेमल्हुक लुक्योक
11ङीः त्रोआसलाःम्ले जहाजला जादी फार्केनला सामोथ्राकेछ्योले काःल्सी, ओःले ङार्तो च्योःङ्रा ङीः नीयापोलीसला लेप्सी। 12ओःलाःम्ले ङीः काङ्बाइ काःल्दी फीलीप्पीला लेप्सी। ओःखो माकेडोनीयाइ प्रमुख क्याःसा एःके ओःले ओः क्याःसादी रोमी शासनला एःके। ङीः ओः क्याःसाला चीङ ङीःमाथुप तेःसी।
13यहुदीक्याइ थाङ सोगेन ङीःमाला ङीः क्याःसालाःम्ले तीबी चीग पाङ्ला लुःङ्बाइ सुःरला काःल्सी। ओःला यहुदीक्या जोम्दी प्रार्थना पेःगेन ठाउँ एःस्वाँ लाःती ङीःइ ठीवा चेसी। ओःले ङीः ओःला काःल्दी तेःसी ओःले जोम्दी तेःक्योक पेःन्पीःजाक्या ङीमु ताम लाःकाला स्युःसी। 14ङीःइ ताम कोःगेनक्या नाःङ्ला लीडीया लाःकेन थीयाटीरा क्याःसाइ बैजनी रङगीइ छेन्दी केलाः चोङेन पेःन्पीःजाङ एःके। खुङ कोन्ज्योला मेःबा पेःगेन राःङ्सा क्युःपाइ पेःन्पीःजा एःके। पावलगीइ लाःक्योक तामला सेम तेर्ती कोःजेला प्रभुइ खुङगीइ सेम फ्यातेर्सी। 15खुङ ओःले खुङगीइ खीमगीइ थाम्जेरकीइ बप्तीस्मा लेःङ्मीःजीक खुङगीइ ङीःला वासी पेःदी एःन्डु लाःसी, “ख्याक्याइ ङाःला प्रभुला सेमल्हुक लुगेन नोःमो लाःकुए लाःना ङाःइ खीमला ओःङ्दी तेःतेर।” ओः सोङ्गारा, खुङगीइ ङीःला वाःम्सी।
पावल रा सीलासला चेङाङला काक्योक
16ङीःमा चीग ङीःक्या प्रार्थना पेःगेन ठाउँला डोदेरा एःकासुना ङीःइ हेन्डी क्याःप्क्योक स्यार्मा लाबु चीगला फ्रेसी। ओःखोइ पेःगासुना खुङगीइ मीःक्याइ म्हो ताउके ओःले माःङ्बुरा डेबा जोदी खुङगीइ ताःक्पुक्याला तेर्कुके। 17खुङगीइ पावल रा ङीःला ब्य्राङ्देरा एःन्डुले केताङ्गाला स्युःसी, “दीखुङक्या नी थाम्जेर भन्दा चोइ कोन्ज्योइ लाबुक्या इःङे। खुङक्याइ काःन्डुले ख्योक्याइ थार्चे ज्योर्केन एःपा लाःती उःला लाःतेरा एः।” 18माःङ्बुरा ङीःमाथुप ओः स्यार्माइ ओःन्डुरा लाःती के तेङ्सी। इःनाङ पावलला माःङ्बुरा सीःताङ लाःङ्मीःजीक ओः स्यार्माछ्योले लोःदी ओः हेन्डीला लाःसी, “ङाः येशु ख्रीष्टकीइ मीःनला ख्योला खुङलाःम्ले थेङ्दी सुङ लाःती आज्ञा पेःगे।” ओःले ओः हेन्डी ओः तेःकासुरा खुङलाःम्ले थेङ्दी काःल्सी।
19इःनाङ ओःखोइ ताःक्पुक्याइ ओः स्यार्मालाःम्ले डेबा जोगेन लाःम सीःङ्सी लाःती छोर्मीःजीक खुङक्याइ पावल रा सीलासला जुम्सी ओःले टीःतेरा खेर्ती क्याःसाइ शासकक्या साःला खेर्सी। 20ओःले खुङक्याइ पावल रा सीलासला क्याःसाइ रोमी हाकीमक्याइ तोःङ्ला ख्योङ्दी एःन्डु लाःसी, “दी मीःक्या यहुदीक्या इःङे, दीखुङक्याइ उःइ क्याःसाला तुःक्पु तेर्तेरा एः। 21खुङक्याइ उःक्या रोमीक्याइ ठीमला म्याःक्योक ओःले उःक्याइ ङीःन्जेला डीक्पु म्याःक्योक तामक्या मीःक्याला लोप्तेरा एः।” 22ओः तेःकासुरा मीःक्याइ पोर्चोम डीक्ती खुङक्याला रोप्सी। ओःले क्याःसाइ हाकीमक्याइ पावल रा सीलासकीइ केःलाक्या राल्दी क्युर्तेर्सी ओःले खुङक्याला कोर्रा क्याःप्केन आज्ञा तेर्सी। 23माःङ्बुरा कोर्रा क्याःप्मीःजीक खुङक्याइ पावल रा सीलासला चेङाङला लुतेर्सी ओःले चेङाङगीइ हाकीमला ओः खुङक्या छ्योङ्मीःखुगेन पेःदी कातेर लाःती आज्ञा तेर्सी। 24एःन्डुबा आज्ञा ज्योर्मीःजीक हाकीमगीइ खुङक्याला चेङाङगीइ नाःङ्गीइ कोठाला खेर्सी ओःले खुङक्याइ काङ्बाला सीङगीइ ठींगुरो क्याःप्ती ज्यासी।
25नुःप फेला पावल रा सीलास प्रार्थना पेःदेरा कोन्ज्योइ लु लेःङ्देरा एःके, ओःले राःङ्सा कैदीक्यादी कोःदेरा एःके। 26ओः तेःकासुरा एक्कासी ओःला छ्योम्बो सायु ओःङ्सी ओःले चेङाङगीइ चारथुपरा योङ्सी। खेप चीगलारा थाम्जेर कोःक्या फ्यासी ओःले थाम्जेर कैदीक्याला ताःम्क्योक च्याल्दाक्या सीःसी। 27चेङाङगीइ हाकीम ङीचु छेसी ओःले थाम्जेर कोःक्या फ्याक्योक थोङ्सी। खुङगीइ थाम्जेर कैदीक्या छ्योङ्दुबा लाःती राःङलारा सुर्ती सीजेला राःङगीइ खुर्क्योक तरवार तेङ्सी।#१६:२७ ओः तीःनामलादी चीङ पेःदी कैदी छ्योङ्सी लाःना, ओः कैदीइ ज्योर्केन दण्डदी खुङला रुःङेन मीःइ ज्योर्कुके। 28दीखो थोङ्दी पावलगीइ के तेङ्देरा लाःसी, “कुःदो, ओःन्डु माःबे! ङीःक्या थाम्जेर दीलारा एः।”
29हाकीमगीइ छेमी थेप्च्युसी ओःले छ्योङ्देरा नाःङ्ला ओःङ्सी ओःले जीबाइ दार्तेरा पावल रा सीलासकीइ काङ्बा तोःङ्ला खाप्लु क्याःप्सी। 30ओः तीङ्ला हाकीमगीइ खुङक्याला फीला तेङ्दी टीःसी, “ए हजुर, ङाःइ ची पेःगासुना थार्चे ज्योर्कुबा?” 31खुङक्याइ लाःसी, “प्रभु येशुला सेमल्हुक लुदो, ओःले ख्याइ थार्चे ज्योर्कुए। दी ताम ख्या ओःले ख्याइ फेबेक्याइ लागी तेःन्दामरा इःङे।” 32पावल रा सीलासकीइ खुङ ओःले खुङगीइ खीमला एःक्योक थाम्जेरला प्रभुइ सुङ लाःसी। 33ओःले कुःङ्मु ओः तेःकासुरा हाकीमगीइ खुङक्याला खेर्ती खुङक्याइ स्य्वा ठुतेर्सी। ओः तीङ्ला खुङ ओःले खुङगीइ खीमगीइ थाम्जेर फेबेक्याइ बप्तीस्मा लेःङ्सी। 34ओः तीङ्ला हाकीमगीइ पावल रा सीलासला राःङगीइ खीमला खेर्ती साःजे थुङ्जे तेर्सी। खुङ ओःले खुङगीइ थाम्जेर खीम फेबेक्याइ कोन्ज्योला सेमल्हुक लुक्योक सोङ्गारा खुङक्या केःदाङ काःल्सी।
35ङार्तो ङामु च्योःङ्रा क्याःसाइ शासकक्याइ पावल रा सीलासला पोःर्तेर लाःती थेक्याला चेङाङगीइ हाकीम साःला ताङ्तेर्सी। 36ओः सोङ्गारा, हाकीमगीइ पावलला लाःसी, “क्याःसाइ शासकक्याइ ख्याला रा सीलासला पोःर्तेर लाःती लेःङ्गो ताङ्दी एः। ताः ख्याक्या खाम्साङ्बुले सुङ।” 37इःनाङ पावलगीइ लेःङ्गो ख्योङेन थेक्याला लाःसी, “ङीः रोमी मीःक्यारा एःनाङ रोमी शासकक्याइ ङीःला ङीःइदी गल्तीरा म्याःनाङ मीःक्याइ तोःङ्ला एःन्दाराङ कोर्रा क्याःप्सी, ओःले चेङाङला लुतेर्सी। ओःले ताःसे ङीःला खाजुम्बाले तेङ्जे छोल्गुदुबा? दीखो मेःयोङे! खुङक्या राःङरा ओःङ्ज्युक ओःले ङीःला तेङ्ज्युक।”
38पावलगीइ लाःक्योक ताम थेक्याइ काःल्दी शासकक्याला लाःतेर्सी। पावल रा सीलास रोमी मीःक्या इःङे लाःकेन ताम कोःदी खुङक्या जीसी। 39ओः सोङ्गारा, खुङक्या ओःङ्दी पावल रा सीलास ङीमु माफी लाङ्सी ओःले खुङक्याला चेङाङलाःम्ले पाङ्ला तेङ्दी खुङक्याला ओः क्याःसा पोःर्ती सुङ लाःती वासी पेःसी। 40पावल रा सीलास चेङाङलाःम्ले थेङ्मीःजीक खुङक्या लीडीयाइ खीमला ओःङ्सी। ओःला खुङक्याइ प्रभुला सेमल्हुक लुगेन आतानोःक्याला फ्रेती साहस तेर्सी ओःले खुङक्या ओःलाःम्ले काःल्सी।
Currently Selected:
प्रेरीत 16: SYW
Highlight
Share
Copy
Want to have your highlights saved across all your devices? Sign up or sign in
© 2025 by Nepal Bible Society and Wycliffe Bible Translators, Inc.
