1 Tioni 3

Mosinge ta'olu so isexelaxa'a ngato'o

1Ai ngamalei no anu sexela tatila toe Maminge musexelanenge no anu. Xo anu Mosinge ia mumoxo'inge lexe nenge 'o a Mosinge ta'olusi. La mi ne manina misevile, xo nenge ta'olu a. Laso maixene tatemanu lialia tane'ililiinge mo ilavusinge uasi xo ilavusou Mosinge uasi. 2Ani tamaula, nenge'a taxolu Mosinge ta'olu vaimomo 'o ia loxo no anu xoluxolunenge ili'i la upalasi uao. Ia mi 'o telavusou, no voxo loxo Kalaisiti upala'a la nenge taxali loxo anu, xo nenge tasaxisou no anu xoluxoluxu manina. 3La tamitema mukalusi ta'ei ilopalanu ixomaiou Kalaisiti la ikalipalane'i no anu susu xo imasaxau xoluxolu malemalenga aloxo anusi.

4Tamitema ta'ei loxo ilavusou isususi la ivila'isou lo noxou Mosinge ane. Ilixo so ivila'isou lo ne a no anu sususi. 5Mo loxo ngelavu, Kalaisiti mune'e mupala'a so ukalusou susu xe noxou la anu susu vile uasi. 6Laso ena'ei mu'una mutalupexa nonano noxou Kalaisiti la uxolu no anu sususio uasi. Xo tamitema ane ixoxolu no anu sususio, la upala'a lexe itongonu mo ilavusou Kalaisiti uasi.

7Ta'alixeli moso 'o, ngalaxa'i laixe mo ngalavu aloxo 'o mo so evile u'oxonu lolongenge uasi. Kalaisiti anu mulapusi laso itema ane mulapu no iou Mosinge aloxo Kalaisiti, la ilixou kalumo ulapusi. 8Mo aloxo 'o. Musoko'u tei tei manina mo mune'e avile 'o la Uluaou usususu utotomu to. Laso loxo itema ulavusou u'oxonu susu la anu noxou Uluaou ane. La tava'u so Mosinge Olu mune'e mupala'a a so umamulonu xaixai noxou Uluaou usu'a avilesi. 9Manina lexe itema uxali Mosinge olu la anu so uxolu no anu ilixo so susu uasi. Mauli noxou Mosinge u'isalili uxolu noxou itema ne laso uxoxolu no anu susu uasi xo anu Mosinge olumo. 10Ioxe, laso vote'i so tatongo lamana noxi'a tamitema lexe ane'i ta'ei Mosinge ta'olu xe ane'i ta'ei Uluaou ta'olu aloxo 'o. Tamitema ane imulinu ilixo mulapusi uasi ane'i tanoxou Mosinge uasisi. Xe ane'i ane imoxo'a tamitema lexe tavimo'a ia isexelaxa'a uasi, ane'i kalumo tanoxou Mosinge uasi.

Kalaisiti mupela'ingexu vote'i so sexela

11Voto ane lexe tasexelanenge ngato'o ne ngelomusou no tava'u mune'e 'oe. 12Mamu so ilixomenge aloxo Kaini e itemaou mosou susu olele, xo anu ne muvau vimou musoli. La tava'u ma'ia so muvau axone? A xo ilixo noxou masuamo, io noxou vimou la mulapusi.

13Tavivilo, loxo tatemanu lialia imatapiangengi la ngakulukemolu uasi. 14Xo loxo telavu, tei la texolu no anu soli ia tevula tela mo a taxolu no anu mauli. La telavusou axova? A xo nenge talavusou tasexelaxa'a tavivinge talopala. Ia ane'i ane ilavusou isexela manina uasi la ixolu no anu solisio. 15Loxo evile umoxo'u menexu lexe vimou ia no oponu umatapianu la anu iou vilesisi loxo itema so uve'a tamitema isoisoli. Mo anu upalasi noxinge lexe tamitema so ive'a tamenexi'a isoisoli la mauli kaluxu uasi uxolu noxi'a uasisi.

16Ioxe, noxou Kalaisiti la mu'italonu mauli noxou so musolisinge, xe no anu vote'i anene la tano'u lavulavusou sexela maninasou. Laso anu laixe so nenge kalumo tapilixinu mauli noxinge so su'ulisi'a tavivinge talopala. 17Ia loxo misomisou lialia muai noxou evile xe utatusou oponu noxi'a tavimou ane tasi'a xalusou avile, la sexela noxou Mosinge uxolu noxou axovae? Uasi to. 18O ta'alixeli moso 'o, mamu so talemolu sexela no ananenge vitanisi, ta'oxonu sexela manina no anu ilixomenge.

Mosinge ta'olu imomomo so itulu no iou mo i'ume uasi

19Ioxe, no anu vote'i anene la nenge talavu lexe nenge a no anu vaikala maninasi. Mo so loxo taxolu no iou Mosinge la oponenge u'ume uasi. 20Xo masi oponenge uto'omenge ia loxo telavu, Mosinge ulavusou mimi mukalusi mo lavulavuou uua'ulixu lavulavu noxinge. Laso anu umomomo so oponenge uai se'isisi no iou. 21Ia tamaula, loxo oponenge uto'oto'omenge uasi la nenge ta'ume uasi ane, tatulu pumunenge no iousi. 22Xe axone la anu ulosinge mi ma'ia talingau noxou xo talomuxu voto noxou mo ta'oxonu mi ane u'osasousi. 23Xo voto noxou aloxo 'o. Nenge talopala noxou Olu Iesua Kalaisiti mo tasexelanenge ngato'osi no anu vote'i e muvotonengexu. 24Anu ane ulolomuxu votovoto noxou Mosinge la mu'una mutalupexa nonano noxou mo Mosinge a mutalupexa nonano noxou itema ne. Xo mulosinge Ulenu laso anene vote'i so talavu lexe Mosinge a utalupexa nonano noxinge.

Currently Selected:

1 Tioni 3: ATA

Highlight

Copy

Compare