1 Tioni 4

Tatilovosou vaikalai'a tamitema lexe molu noxou Ulenu Laixe o uasi

1Tamaula, tamitema masi ine'e mo ivikala lexe, “Eni eno'u vaikala ano'o noxou Ulenu a.” Ia ngalopala noxi'a avile uasi, ngatilovosou vaikalai'a lexe molu noxou Ulenu Mosinge o uasi. Xo tamitema so pela'a kalavoi to a ixixaoxao no xale tuatuala mukalusi. 2La vote'i so ngalavu lexe Ulenu Mosinge uxolu noxi'a tamitema anene aloxo 'o. Loxo itema ulavusou upala'anixu oponu lexe “Iesua Kalaisiti mune'e no lialia so muxolu itema no anu vasimolu,” la itema ne Ulenu Mosinge a uxolu noxou. 3Ia loxo ngalomusou itema vile upala'anixu oponu io uxililiou vaikalasou Iesua ne, la anu upalasi lexe Ulenu Mosinge uxolu noxou uasi. Anu ulenu toe upamuxanu ne anu ulenu so xililiou Kalaisitisi e ngelomusou tatei lexe uxali, la anu a uxoxolu no lialia mukalu.

4Ia loxo ngingi ta'alixeli moso 'o, ngingi tanoxou Mosingesi mo ngeua'ulixa'a tamitema so pela'a kalavoi ne xo Ulenu e uxolu noxinge la uua'ulixu ulenu so lialia. 5Ane'i ne so lialiasi laso maixene vaikalai'a tamaxu ulai no anu mimi so lialiasi sila tatemanu lialia ilomuxa'asi. 6Ia nenge la tanoxou Mosingesi, laso tamitema ane ilavusou Mosinge la ilomunenge. Io ane'i ane tanoxou Mosinge uasi la ilomunenge to uasi. Laso no anu vote'i anene la talavu lexe Ulenu so vaikala manina o ulenu so kalavoi uxolu noxou itema vile.

Tava'u sexela a noxou Mosingesi

7O tamaula, nenge'a tasexelanenge ngato'osi xo Mosinge anu tava'u sexela. Laso loxo itema usexela la anu upalasi lexe anu Mosinge olu mo anu ulavusou Mosinge laixe ane. 8Ia loxo itema usexela uasi la upalasi lexe anu ulavusou Mosinge uasi xo Mosinge anu mosou sexelasi. 9No anu vote'i aloxo 'o Mosinge mumaxa'u sexela noxou noxinge. Anu Olu e soxu vilesisi ne, mupalusou mune'e no lialia mo so noxou, la mu'oxonu vote'i so taxalisou mauli. 10Laso ane, anene sexela manina. Anu mi so nenge tesexelaxu Mosinge tei uasisi. Anu molu musexelanenge laso mupalusou Olu soxu ne mo so noxou, la muxalixu vote'isou susu noxinge ukalu.

11Ioxe tamaula, Mosinge musexelanenge axone laso nenge tasexelanenge ngato'o. 12Itema vile usaxisou Mosinge uasi ia loxo nenge tamitema so tasexelanenge ngato'o la Mosinge a uxoxolu utalupexa nonano noxinge e ane, mo sexela noxou uxali ulomotele noxinge.

13Vote'i axova so talavu lexe Mosinge uxolu utalupexa avile nonano noxinge xe nenge taxolu tatalupexa nonano noxou? A xo anu molu mulosinge Ulenu so uxolu noxinge 'o. 14Xe mi ane tesaxisou la tapala'anixu lamana aloxo 'o. Maminge no tualasou mupalusou Olu mune'e no lialia so uxali Itema so Pamauli si'a tatemanu. 15Laso loxo itema upala'anixu oponu lexe Iesua anu Mosinge Olu, la anu upalasi lexe Mosinge uxolu utalupexa nonano noxou mo anu uxolu utalupexa nonano noxou Mosinge ane. 16Xe nenge la teno'u lavulavu kaio telopala manina lexe Mosinge usexelanenge misevile.

Mosinge anu mosou sexela, laso itema ane so uxolu pumuxu no anu sexela la anu uxolu utalupexa nonano noxou Mosinge mo Mosinge uxolu utalupexa nonano noxoui ane. 17Laso no anu vote'i anene la sexela uxali ulomotele no anu xoluxolunenge. Mo so loxo sexela uxali ulomotele la no voxo so utilovosi'a tamitema mukalusi la nenge ta'ume uasi. Ta'ume uasi xo nenge a taxolu no lialia 'osio ia te'una mukalu no anu xoluxoluxu Kalaisiti a. 18Xo ume u'avuti no anu ma'ia? A so oponenge kalauaou lakolisou susu. Laso loxo ume uxolu noxou itema la anu upalasi lexe sexela uxali ulomotele noxou uasi ane. Io loxo sexela uxolu manina la ume uila no anu uasisi, xo loxo sexela uxali ulomotele no oponu itema la uxexenu ume avile.

19Nenge tasexela xo Mosinge musexelanenge tei. 20Loxo itema uvikala lexe “Eni asexelaxu Mosinge a,” ia umatapianu menexu vile ane umoxo'u lexe vimou, la anu mukalavoi toe. Xo menexu e umoxo'u lexe vimou a uxolu no iou ia usexelaxu to uasi. Laso vote'i axova so usexelaxu Mosinge e usaxisou no iou uasi ne? 21Ioxe, laso voto e teno'u noxou Kalaisiti aloxo 'o. Itema e so usexelaxu Mosinge la anu masi usexelaxu vimou kalumo.

Currently Selected:

1 Tioni 4: ATA

Highlight

Copy

Compare