1 Tioni 2

Kalaisiti uxolu so uvalanenge noxou Mosinge

1O eni asexelangenge aloxo ngingi ta'alixeli mososi. Eni akaukavunu vaikala ano'o ulai noxinge mo so ngingi ngasususu uasi. Ia loxo nenge vile ususu la Iesua Kalaisiti e so ilixo mulapusi a uxolu noxou Maminge so uvalanenge noxou. 2Xo anusi a vote'isou tina'unenge so susu mukalu. Ia anu vote'isingesi uasi, anu vote'isi'a tatemanu lialia mukalusi so tina'uxa'a so susu ukalu.

Itema ane ulavusou Mosinge la anu ulomuxu ane

3Loxo nenge tamomoxu voto noxou, laso ane, oponenge ulavu lexe nenge talavusou manina. 4Xo loxo itema u'oxo lexe, “A eni alavusou Mosinge ane,” ia ulomuxu voto noxou uasi, la anu itema so kalavoi mo vaikala manina uxolu nonano noxou to uasi. 5Ia itema ena'ei ulolomuxu vaikalaou Mosinge la sexela noxou Mosinge uxolu ulomotele manina nonano noxou ne. La anenesi vote'i so upela'inge lexe nenge'a taxolu nonano noxou. 6Loxo evile u'oxo lexe “Eni epita axolu nonano noxou Mosinge a,” la anu masi muamua'i noxou aloxo muamua'ixu Kalaisitisi.

7O tamaula, voto ane akaukavunu ulai noxinge 'o anu alavua uasi. Anu voto teinu e ngeno'u loxo ngelomusou vaikalasou no anu votovoto tei manina. 8Ia voto e akaukavunu 'o, anu alavua kalumo xo temanu manina uxolu noxou Kalaisiti mo a uxaxali no anu xoluxolungenge kalumo. Uxaxali axone xo isivoxo a ukakalu xe lamana maninasou a uieiei 'oe.

9Loxo itema vile u'oxo lexe anu uxolu no lamanasi ia umatapianu vile ane umoxo'u lexe vimou, la itema ne xoluxoluxu no anu isivoxosio. 10Ia itema ane ulavusou usexelaxu vimou la anu uxolu no lamanasi laso mi vile uxalisou so utulaki no anu uasi. 11Io itema e umatapianu ane umoxo'u lexe vimou la uxolu mo umuamua'i no anu isivoxosi mole ulavusou vote'i so ulai axova uasi xo isivoxo mukapinu iou.

12Ta'alixeli moso 'o, eni akaukavu ulai noxinge xo tava'u e noxou Kalaisitisi laso Mosinge muiasou tina'ungenge so susu. 13Tamamilo 'o, eni akaukavu ulai noxinge xo ngingi ngelavusou anu ane muxolu tei tei manina mune'e avile 'o. Ngingi tamaulu kalumo, akaukavu ulai noxinge xo ngingi a ngeua'ulixu mosou susu to ne. 14Ta'alixeli moso 'o, akaukavu ulai noxinge xo ngingi ngelavusou Maminge. Tamamilo, akaukavu ulai noxinge xo ngingi ngelavusou anu ane muxolu tei tei manina mune'e avile 'o. Mo akaukavu ulai noxinge tamaulu xo ngingi pakia'inge mo vaikalaou Mosinge uxolu pumuxu noxinge mo ngingi ngeua'ulixu mosou susu olele.

Mamu so oponenge usexelaxu mimi so lialia

15Mamu so opongengi usexelaxu lialia ano'o ilou misomisou. Xo loxo itema oponu usexelaxu misomisou lialia la sexelasou Maminge uxolu noxou uasi ane. 16Xo mimi masua e vasimenge upalusinge no anu xe mimi ane ienge ulapunenge no anu xe mimi no lialia so ta'itinenge no anu la anene molu noxou Maminge no tualasou uasi, anu mimi so lialia to 'osi. 17La lialia ano'o ilou misomisou e ulapunenge no anu susu la anene so tasiauxusi. Ia itema ane umulinu masaxa noxou Mosinge la uxolu avile kaluxusou uasi.

Taxililiou Kalaisiti a ixoxolu 'oe

18Ta'alixeli, nenge'a taxoxolu no anu taimusou kaluxusou voxoe'a. Tatei ngingi ngelomusou vaikala lexe Xililiou Kalaisiti uxali sila ane'i taxililiou Kalaisiti tavu'alo a mixali mukalu 'oe. Laso anene upela'inge lexe taxolu no anu taimusou kaluxusou voxo ne. 19Ane'i anene mixolu mipita noxinge kaio mixexesinge mila. Mipita noxinge tei ia ane'i tanoxinge manina uasi xo axone la ane'i ixolu noxinge avile. Ia mila axone so umaxa'u lexe ane'i mukalusi ne tanoxinge to uasi.

20Xe loxo ngingi la Ulenu Laixe uxolu noxinge mukalu laso ngexalisou lavulavu. 21La akaukavu ulai noxinge aloxo 'o xo vaikala anu temanu manina ngalavusou uasi? Uasi, tava'u xo ngingi ngelavusou mukalu mo ngelavu lexe vaikala anu temanu manina uxalixu kalavoi uasisi. 22Itema kaini axova e mosou kalavoi? A itema so uvikala lexe “Uo, Iesua ne anu Kalaisiti e molu noxou Mosinge uasi ane.” Itema so uxililiou ualasou Maminge ilou Olu axone, la anu mosou e so xililiou Kalaisiti ane. 23Itema ena'ei uxililiou ualasou Olu la anu uxililiou Maminge kalumo. Ia itema ena'ei oponu upala'a lexe ulopalanu Olu la anu upala'a lexe ulopalanu Maminge kalumo ane.

24Laso loxo ngingi la vaikala e ngelomusou no tava'u mune'e la ngatetelisou mo so uxolu pumuxu noxinge. Loxo vaikala e ngelomusou no tava'u mune'e ne uxolu pumuxu noxinge la ngingi ngaxolu pumungenge kalumo noxi'a Olu ilou Maminge ane. 25Xo mi e Kalaisiti muvavalimasou noxinge ano'osi, a so ulosinge mauli kaluxusou uasi.

26Vaikala ano'o akaukavunu ulai noxinge so apela'ingexa'a ane'i tamitema ane itovonu so i'oxo lolongenge ne. 27Ia Kalaisiti mupilixinu Ulenu Laixe noxinge so uxolu noxinge avile. Laso tava'u so evile upela'inge la uasi xo Ulenu Laixe molu upalo matanangengi no anu mimi mukalusi. Xe mi ma'ia upela'ingexu la maninasousi, kalavoi no anu uasi. Laso ngamulinu loxo mupela'ingexu mo ngaxolu pumungenge noxou Kalaisitisi.

28Laso ane, ta'alixeli moso 'o, ngingi ngaxolu pumungenge noxou Kalaisiti mo so loxo anu upala'a la ta'osasi so tamaisou iou mo tamaila ka ta'umenu vasimenge noxou loxo uxali uasi. 29Xo loxo ngelavu, anu ilixou Kalaisiti mulapu lolonisi. Laso mi ano'o ngalavusou kalumo, ta'ei ane so i'oxonu ilixo mulapu la ane'i mixali Mosinge ta'olu noxou Kalaisiti ane.

Currently Selected:

1 Tioni 2: ATA

Highlight

Copy

Compare