1 યોહાન પત્રો 3
3
1હેરા, પિતા પરમેહેરુ આપનેહે, કેહેડો પ્રેમ કેયોહો કા આપુ તીયા પોયરે આખાજી, આને ખરેખર આપુ તીયા પોયરે હાય: ઈયા ખાતુરે જગતુ લોક આપુહુ પરમેહેરુ પોયરે એહેકી નાહ જાંતે કાહાકા તીયાહા પરમેહેરુ નાહ જાંયો. 2ઓ મેરાલાહા, આમી આપુહુ પરમેહેરુ પોયરે હાય આને આમી લોગું ઇ નાહ માલુમ કા આપુહુ કેહેડે વિહુ! ખાલી આપુ ઓતોજ જાંતાહા કા જાંહા ઇસુ ખ્રિસ્ત દેખાય દી તાંહા આપુહુ બી તીયા સમાનુજ રીહુ કાહાકા આપુહુ તીયાલે તેહેકીજ હીહુ જેહેકી તોઅ હાય. 3આને જો કેડો ખ્રિસ્તુપે આશા રાખેહે તોઅ પોતાલે તેહેકીજ પવિત્ર કેહે જેહેકી તોઅ હાય.
4જો કેડો પાપ કેહે તોઅ નિયમુ વિરુધ કેહે; આને નિયમુ નાય માનુલોજ પાપ હાય. 5તુમુહુ જાંતાહા ઇસુ ખ્રિસ્તુ કેલ્લોજ પાપ નાહ કેયો, પેન તોઅ જગતુમે ઈયા ખાતુરે આલો કા પાપુલે દુર કી દેઅ, 6જો કેડો ખ્રિસ્તુ સંગતીમે રેહે તોઅ પાપ નાહ કેતો: પેન જો કેડો પાપ કેતોજ રેહે, તીયાહા નાય તા તીયાલે હેયોહો આને નાહ તીયાલે જાંતો. 7ઓ મેરાલા પોયરાંહા, કેડો બી તુમનેહે ભરમાવી નાય સેકે; જો ધર્મી કામે કેહે તોઅ ખ્રિસ્તુ સમાનુજ ધર્મી હાય. 8જો કેડો પાપ કેતોજ રેહે, તોઅ શૈતાનુ વેલેનેજ હાય પેન શૈતાન શુરુવાતુમેનેજ પાપ કેતો આલોહો. પરમેહેરુ પોયરો શૈતાનુ કામુલે નાશ કેરા ખાતુરે જગતુમે આલો. 9જો કેડો પરમેહેરુ પોયરો હાય તોઅ પાપ નાહ કેતો; કાહાકા તીયામે પરમેહેરુ સ્વભાવ હાય, આને પરમેહેર તીયા બાહકો હાય ઈયા ખાતુરે તે પાપ નાહ કી સેક્તે. 10ઈયાકીજ પરમેહેરુ પોયરે આને શૈતાનુ પોયરે ઓળખામે આવતેહે; જો કેડો ધાર્મિક કામ કેહે આને તે જે પોતા પાવુ-બોયુ આરી પ્રેમ કેતેહે તે પરમેહેરુ વેલને હાય.
એકબીજા આરી પ્રેમ રાખા
11જે સુવાર્તા તુમુહુ શુરુવાતુમેને ઉનાયા તે એ હાય કા આપુહુ એકબીજા આરી પ્રેમ રાખજી. 12આને આદમુ પોયરો કાયનુ સમાન નાય બોને, જો શૈતાનુ વેલેને આથો, આને જીયાહા પોતા પાવુહુ હાબેલુલે માય ટાકલો. તીયાહા ઈયા ખાતુરે માય ટાક્યો કાહાકા તીયા કામે ખારાબ આથે, આને તીયા પાવુ કામ ખારાબ આથે.
13ઓ પાવુહુ આને બોયુહુ, કાદાચ જગત લોક તુમા આરી દુશ્મની કેતેહે તા નોવાય નાય કેરુલો. 14આપુહુ જાંતાહા આપુહુ મોતુ શક્તિમેને સ્વતંત્ર વી ગીયાહા આને આપુ પાહી સાદા માટે જીવન હાય; કાહાકા આપુ વિશ્વાસી પાવુ-બોયુ આરી પ્રેમ રાખતાહા, જો પ્રેમ નાહ રાખતો તોઅ આમી બી મોતુ બંધનુમે હાય. 15જો કેડો વિશ્વાસી પાવુ-બોયુ આરી પ્રેમ દુશ્મની રાખેહે તોઅ હત્યારો હાય, આને તુમુહુ જાંતાહા કા એગા હત્યારાલે અનંત જીવન નાહ મીલતો. 16આપુહુ પ્રેમ ઈયાકીજ જાંયો, કા ઇસુ ખ્રિસ્તુહુ આપુ ખાતુરે પોતા જીવ આપી દેદો; ઈયા ખાતુરે આપનેહે બી વિશ્વાસી પાવુ-બોયુ ખાતુરે જીવ આપા જોજે. 17કાદાચ એગોહો માલદાર હાય, આને તોઅ એગા માહાલે જરુરતુમે હીને તીયાપે દાયા નાય કે, તા પરમેહેરુ પ્રેમ તીયામે રી નાહ સેકતો. 18ઓ મા મેરાલા પોયરાંહા, આપુહુ વચનુકી આને ગોઠીકી નાહ પેન કામ આને સત્ય મારફતે પ્રેમ કેજી.
પરમેહેરુ હુંબુર હિંમત
19જાંહા આપુહુ બીજા આરી પ્રેમ કીહુ તાંહા આપુહુ જાંહુ કા આપુ સત્યા હાય, આને જીયુ ગોઠી વિશે આપુ મન આપનેહે દોષી ઠેરવેહે, તીયુ ગોઠી વિશે પરમેહેરુ હુંબુર આપુહુ પોતા મનુમે આત્મા વિશ્વાસ કી સેકુહુ. 20કાદાચ આપુ મન આપનેહે દોષી ઠેરવે તા આપુહુ જાંતાહા કા પરમેહેર આપુ મનુકી મોડો હાય, આને તોઅ બાદો જાંહે. 21ઓ મેરાલાહા કાદાચ આપુ મન આપનેહે દોષી નાય ઠેરવે તા આપનેહે પરમેહેરુ હુંબુર હિંમત વેહે. 22આને જો કાય આપુહુ પરમેહેરુ પાહી માગતાહા, તોઅ આપનેહે દેહે; કાહાકા આપુ તીયા આજ્ઞાલે માનતાહા; આને જો તીયાલે હારો લાગેહે તોજ આપુહુ કેતાહા. 23આને તીયા આજ્ઞા એ હાય કા આપુહુ તીયા પોયરા ઇસુ ખ્રિસ્તુ નાવુપે વિશ્વાસ કેજી, આને જેહેકી આપનેહે તીયાહા આજ્ઞા દેદીહી, તીયુજ અનુસાર એકબીજા આરી પ્રેમ રાખે. 24આને જો પરમેહેરુ આજ્ઞાહાને માનેહે તોઅ પરમેહેરુમે આને પરમેહેર તીયામે બોની રેહે: આને તીયાકીજ એટલે જે પવિત્રઆત્મા તીયાહા આપનેહે દેદીહી આપુહુ જાંતાહા તે આપુમે બોની રેહે.
Currently Selected:
1 યોહાન પત્રો 3: DUBNT
Highlight
Copy
Compare
Share
Want to have your highlights saved across all your devices? Sign up or sign in
Dubli (દુબલી) Bible by The Love Fellowship is licensed under Creative Commons Attribution-ShareAlike 4.0 License.
