1 યોહાન પત્રો 2

ખ્રિસ્ત આપુ મદદગાર

1માઅ મેરાલા પોયરાંહા, આંય તુમનેહે ઈયા ખાતુરે લેખી રીયોહો, કા તુમુહુ પાપ નાય કેરા, કાદાચ એગોહો પાપ કેતા પોતા પાપુ માફી આપાવા ખાતુરે પરમેહેર બાહકાપે આમા એક મદદગાર હાય એટલે ધર્મી ઇસુ ખ્રિસ્ત. 2આને તોજ આપુ પાપુ બદલે બલિદાન વીને આપનેહે પાપુ માફી આપી, આને ખાલી આપુ માટેજ નાહ પેન બાદા જગતુ લોકુ પાપુ ખાતુર બી બલિદાન વીયો. 3કાદાચ આપુહુ પરમેહેરુ આજ્ઞાલે માનુહુ ઇયાકી આપનેહે માલુમ પોળી કા આપુહુ તીયાલે જાંતાહા. 4જો કેડો ઇ આખેહે, “આંય પરમેહેરુલે જાંહુ,” આને તીયા આજ્ઞાલે નાહ માનતા, તા તોઅ ઝુટો હાય; આને તોઅ પરમેહેરુ હાચાયુ અનુસાર નાહ ચાલતો. 5આને જો કેડો તીયા વચનુપે ચાલે, તીયામે ખરેખર પરમેહેરુ પ્રેમ પુરો વીયોહો. ઈયાકીજ આપુહુ જાતાહા કા આપુહુ તીયામે હાય. 6કાદાચ એગોહો એહેકી આખેહે કા આંય પરમેહેરુ બની રીહુ, તા તીયાલે પોતે જેહેકી ઇસુ ખ્રિસ્ત આખતલો તેહેકીજ રાંઅ જોજે.

નવી આજ્ઞા

7ઓ મેરાલા, આંય તુમનેહે એગી નવી આજ્ઞા નાહ લેખતો, પેન તેજ જુની આજ્ઞા લેખુહુ, જે તુમનેહે શુરુવાતુમેને મીલ્યાહા, એ જુની આજ્ઞા આને તોઅ વચન હાય જીયાલે તુ ઉનાયોહો કા એકબીજા આરી પ્રેમ રાખા. 8પેન આમી જે આજ્ઞા તુમનેહે લેખુહુ તે નવી હાય; કાહાકા ઈયા સત્ય ખ્રિસ્તુમે આને તોમે બી દેખાહે; કાહાકા આંદારો પુરો વેતો જાહે આને સત્ય ઉજવાળો, આમી ચોમકા લાગ્યોહો. 9જો કેડો ઇ આખેહે કા આંય ઉજવાળો હાય; પેન એગો વિશ્વાસી પાવુ આરી દુશ્મની રાખેહે, તોઅ આમી લોગુ આંદારામુજ હાય. 10જો કેડો પોતા પાવુ આરી પ્રેમ રાખેહે તોઅ ઉજવાળામે રેહે, આને તીયામે એહેડો કાય બી નાહ જીયાકી તોઅ ઠોકર ખાહે. 11પેન જો કેડો પોતા પાવુ આરી દુશ્મની રાખેહે, તોઅ આંદારામે હાય આને આંદારામે ચાલેહે આને તોઅ નાહ જાંતો કા કાંહી જાહે, કાહાકા અંધકારુહુ તીયા ડોંઆ આંદલી કી દેદાહા.

12ઓ પોયરાંહા આંય ઇ તુમનેહે ઈયા ખાતુરે લેખી રીયોહો કા ઇસુ ખ્રિસ્તુ નાવુકી તુમા પાપ માફ વીયાહા. 13ઓ બાહકાહા, આંય તુમનેહે ઈયા ખાતુરે લેખી રીયોહો જો શુરુવાતુમેને હાય, તુમુહુ તીયાલે જાંતાહા. ઓ જુવાન્યાહા આંય તુમનેહે ઈયા ખાતુરે લેખી રીયોહો, કા તુમુહુ તીયા શૈતાનુપે વિજય મીલવીહી. ઓ પોયરાંહા આંય તુમનેહે ઈયા ખાતુરે લેખી રીયોહો કા તુમુહુ પરમેહેર બાહકાલે જાંય ગીયાહા. 14ઓ બાહકાહા, આંય તુમનેહે ઈયા ખાતુરે લેખી રીયોહો જો શુરુવાતુમેને હાય, તીયાલે તુમુહુ જાંય ગીયાહા, ઓ જુવાન્યાહા આંય તુમનેહે ઈયા ખાતુરે લેખી રીયોહો કા તુમુહુ મજબુત બોના, આને પરમેહેરુ વચન તુમામે બોની રેહે, આને તુમુહુ તીયા શૈતાનુપે વિજય મીલવીહી.

જગતુ આરી પ્રેમ માઅ કીહા

15તુમુહુ નાય તા જગતુ આરી નાય તા જગતુ વસ્તુ આરી પ્રેમ રાખા, કાદાચ એગોહો જગતુ આરી પ્રેમ કેહે, તા તીયામે પિતા પરમેહેરુ પ્રેમ નાહ. 16કાહાકા જો કાય જગતુમે હાય એટલે શરીરુ લાલચ આને ડોંઆ લાલચ, આને મિલકતુ ઘમંડ તોઅ પિતા પરમેહેરુ વેલેને નાહ, પેન જગતુ વેલેને હાય. 17જગત આને તીયા લાલચ બેન પુરી વેતી જાહે, પેન જે પરમેહેરુ ઈચ્છા પરમાણે અનુસાર ચાલેહે તોઅ સાદા જીવતો રેહે.

ખ્રિસ્ત વિરોધી

18ઓ પોયરાંહા, ઓ છેલ્લો સમય હાય, આને જેહેકી તુમુહુ ઉનાયાહા કા ખ્રિસ્તુ વિરોધી આવનારો હાય, તીયા અનુસાર આમી ખુબુજ ખ્રિસ્ત વિરોધ કેનારે આવી નીગ્યેહે ઇયાકી આપુહુ જાંતાહા કા ઓ છેલ્લો સમય હાય. 19ખ્રિસ્તુ વિરોધ કેનારા આપુજ ટોલામેને નીગતેહે, પેન તે આપુ સંગતી નાય આથા, કાદાચ તે આપુ સંગતીમે વેતા, તા આપુ આરી રેતા પેન તે ઈયા ખાતુરે નીગી ગીયા કા ઇ નક્કી વી જાય કા તે આપુ સંગતીમેને નાહ. 20પેન તુમનેહે ખ્રિસ્તુ મારફતે પવિત્રઆત્મા આપવામે આલોહો, આને હાચાયુલે તુમુહુ બાદા જાંતાહા. 21માયુહુ તુમનેહે ઈયા ખાતુરે લેખ્યો, કા તુમુહુ સત્યલે જાંતાહા આને ઇ બી જાતાહા બી કી જો કાય ઝુટો હાય તોઅ સત્યકી નાહ. 22ઝુટો કેડો હાય? ખાલી તોજ, ઇસુલે ખ્રિસ્ત હાય આખીને નાહ માનતો, આને ખ્રિસ્તુ વિરોધ કેનારો તોજ હાય, જો પિતા પરમેહેર આને તીયા પોયરા ઇસુ ઇનકાર કેહે. 23જો કેડો પરમેહેરુ પોયરો ઇસુ ઇનકાર કેહે, તીયા પાહી પિતા પરમેહેર બી નાહ: જો પરમેહેરુ પોયરો ઇસુલે માની લેહે તીયા પાહી પરમેહેર બી હાય. 24જાંહા તુમુહુ ખ્રિસ્ત રુપે વિશ્વાસ કેયો તાંહા જો હાચી સુવાર્તા તુમુહુ ઉનાયા, તોજ તુમામે બોની રેઅ, કાદાચ તોઅ તુમામે બોની રેઅ તા તુમુહુ પિતા પરમેહેર આને પોયરામે બોની રીહા.

25ખ્રિસ્તુહુ આપુ આરી વાયદો કેયોહો કા તોઅ આપનેહે અનંત જીવન આપી. 26માયુહુ તુમનેહે એ ગોઠયા તીયા લોકુ વિશે લેખ્યાહા જે તુમનેહે ઝુટો શિક્ષણ આપીને ભરમાવા કોશિશ કેતેહે. 27પેન તુમનેહે જો ખ્રિસ્તુ મારફતે પવિત્રઆત્મા આપવામે ઓલોહો તોઅ તુમામે બોની રેહે, ઈયા ખાતુરે તુમનેહે કેડાલે બી હાચાયુ વિશે હિક્વુલો જરુરત નાહ. પેન પવિત્રઆત્મા જો ખ્રિસ્તુહુ તુમનેહે આપીહી તે તુમનેહે બાદી ગોઠી વિશે હિકવેહે, આને જો કાય તે તુમનેહે હિક્વેહે તોઅ પુરી રીતે સત્ય હાય, આને ઝુટો નાહ ઈયા ખાતુરે ખ્રિસ્તુ આરી સંગતીમે બોની રેજા, જેહેકી કા પવિત્રઆત્માહા તુમનેહે હિક્વ્યોહો.

28ઈયા ખાતુરે ઓ પોયરાંહા ખ્રિસ્તુ સંગતીમે સાદા માટે બોની રેજા, કા જાંહા તોઅ ફાચો જગતુમે આવે તા આપનેહે હિંમત રે આને આપુહુ તીયા આવુલો તાંહા તીયા હુંબુર નાજવાજી નાય. 29કાદાચ તુમુહુ જાંતાહા કા તોઅ ધર્મી હાય, તાંહા ઇ બી જાંતાહા જો કેડો ધર્મું કામ કેહે તે પરમેહેરુ પોયરે હાય.

Currently Selected:

1 યોહાન પત્રો 2: DUBNT

Highlight

Copy

Compare