1 યોહાન પત્રો 4
4
આત્માલે પારખા
1ઓ મેરાલાહા, દરેક માંહાપે વિશ્વાસ માઅ કીહો, જો પવિત્રઆત્મા મારફતે ગોગા દાવો કેતેહે. પેન આત્માલે પારખા કા તે પરમેહેરુ વેલેને હાય કા નાહ કાહાકા ખુબુજ ઝુટા ભવિષ્યવક્તા જગતુમે હાય. 2તુમુહુ ઈયુ રીતીકી પરમેહેરુ આત્માલે પારખી સેક્તાહા કા જે આત્મા ઇ માની લેહે, ઇસુ ખ્રિસ્ત માંહુ બનીને જગતુમે આલો, તોઅ પરમેહેરુ વેલેને હાય. 3આને જે આત્મા ઇસુલે નાહ માનતી, તે પરમેહેરુ વેલેને નાહ; એજ ખ્રિસ્તુ વિરોધ કેનારી આત્મા હાય જીયા વિશે તુમુહુ ઉનાય ચુક્યાહા કા ખ્રિસ્તુ વિરુદ્ધ કેનારો આવનારો હાય, આને તોઅ આમી બી જગતુમે હાય. 4ઓ મેરાલા પોયરાંહા, તુમુહુ પરમેહેરુ પોયરે હાય આને તુમુહુ ઝુટા ભવિષ્યવકતાપે વિજય મીલવ્યોહો; કાહાકા જે પવિત્રઆત્મા તુમામે હાય તે જે જગતુમે હાય તીયા કેતા મોડી હાય. 5તે ઝુટા ભવિષ્યવક્તા જગતુ હાય, ઈયા ખાતુરે તે જગતુ ગોઠયા કેરી, જગતુ લોક તીયા ગોઠયા ઉનાતાહા. 6પેન આપુહુ પરમેહેરુ લોક હાય. જે પરમેહેરુલે જાંતેહે તે આપુ ગોઠયા ઉનાતાહા; આને જે પરમેહેરુલે નાહ જાંતા તે આપુ નાહ ઉનાતા, ઇયુજ રીતીકી આપુહુ સત્ય ગોગ્નારી આત્મા આને ઝુટો ગોગનારી આત્માલે ઓખી લેતાહા.
પરમેહેર પ્રેમ હાય
7ઓ મેરાલાહા આપુ એકબીજા આરી રાખજી કાહાકા પ્રેમ પરમેહેરુ આરી હાય આને જો કેડો એકબીજા આરી પ્રેમ કેહે તોઅ પરમેહેરુ પોયરો હાય આને પરમેહેરુલે જાંહે. 8પેન જો કેડો એકબીજા આરી પ્રેમ નાહ કેતે તે પરમેહેરુલે નાહ જાંતે કાહાકા પરમેહેર પ્રેમ હાય. 9જો પ્રેમ પરમેહેરુ આપુપે રાખેહે તોઅ તીયાકી જાહેર વીયો કા પરમેહેરુહુ પોતા એકુ-એકુ પોયરાલે જગતુમે મોક્લ્યોહો, કા તીયા મારફતે આપનેહે સાદા માટે જીવન મિલે. 10ખેરો પ્રેમ ઓ નાહ કી આપુહુ પરમેહેરુ આરી પ્રેમ કેયો, પેન ખેરો પ્રેમ ઓ હાય કા પરમેહેરુ આપુ આરી પ્રેમ કેયો, આને આપુ પાપુ માફી માટે તીયાહા પોતા એકુ-એક પોયરાલે બલિદાન વેરા ખાતુરે જગતુમે મોકલ્યો. 11ઓ મેરાલાહા, કાદાચ ઈયુ રીતીકી પરમેહેરુહુ આપુ આરી પ્રેમ કેયોહો તા આપનેહે બી એકબીજા આરી પ્રેમ રાખા જોજે.
12પરમેહેરુલે કીદીહીજ કેડાહા નાહ હેયો; પેન કાદાચ આપુહુ એકબીજા આરી પ્રેમ કેતાહા તા પરમેહેર આપુમે બોની રેહે; આને તીયા પ્રેમ આપુમે પુરો વેહે. 13ઇયાકી આપુહુ જાંતાહા કા આપુહુ તીયામે આને તોઅ આપુમે બોની રેહે; કાહાકા તીયાહા આપનેહે પોતા પવિત્રઆત્મા આપીહી. 14આને આમુહુ પોયરાલે હેયોહો આને સાક્ષી દેતાહા પિતા પરમેહેરુહુ પોયરાલે જગતુ લોકુ ઉદ્ધારકર્તા વેરા ખાતુરે જગતુમે મોક્લ્યોહો.
15જો કેડો ઇસુલે પરમેહેરુ પોયરો આખીને માની લેહે તોઅ પરમેહેરુમે બોની રેહે આને પરમેહેર તીયામે બોની રેહે. 16જો પ્રેમ પરમેહેર આપુ આરી રાખેહે તીયાલે આપુહુ જાંતાહા આને તીયાપે વિશ્વ આશા કેતાહા. પરમેહેર પ્રેમ હાય, આને કેડો પ્રેમુમે બોની રેહે તોઅ પરમેહેરુમે બોની રેહે; આને પરમેહેર તીયામે બોની રેહે. 17ઈયાકીજ પ્રેમ આપુમે પુરો વીયો કા આપનેહે ન્યાયુ દિહ હિંમત મીલે, કાહાકા જેહેડો તોઅ હાય તેહેકીજ જગતુમે આપુહુ બી હાય. 18પ્રેમુમે બીખ નાહ રેતી પેન પુરો પ્રેમ બીખીલે કાડી દેહે કાહાકા બીખું સંબંધ દંડુ આરી હાય આને જો બીખ રાખેહે તીયામે પુરો પ્રેમ નાહ. 19આપુહુ ઈયા ખાતુરે પરમેહેરુ આરી પ્રેમ રાખતાહા કાહાકા તીયાહા આપુ આરી પ્રેમ કેયોહો. 20કાદાચ એગોહો આખે, કા “આંય પરમેહેરુ આરી પ્રેમ રાખુહુ” પેન પોતા વિશ્વાસી પાવુ આરી દુશ્મની રાખે; તા તોઅ ઝુટા; કાહાકા જો વિશ્વાસી એગા વિશ્વાસી પાવુ આરી પ્રેમ નાહ રાખતો, જીયાલે તીયાલે હેયોહો તા તોઅ પરમેહેરુ આરી બી પ્રેમ નાહ રાખી સેકતો કાહાકા તીયાહા પરમેહેરુલે દેખ્યોજ નાહ. 21તીયાકી આપનેહે એ આજ્ઞા મીલીહી કા જો કેડો પરમેહેરુ આરી પ્રેમ કેહે, તોઅ વિશ્વાસી પાવુ બોયુ આરી બી પ્રેમ રાખેહે.
Currently Selected:
1 યોહાન પત્રો 4: DUBNT
Highlight
Copy
Compare
Share
Want to have your highlights saved across all your devices? Sign up or sign in
Dubli (દુબલી) Bible by The Love Fellowship is licensed under Creative Commons Attribution-ShareAlike 4.0 License.
