1 યોહાન પત્રો 1

જીવનુ વચન

1આમુહુ ઓ પત્ર તીયા વિશે લેખી રીયાહા જો જીવન આપનારો વચન. તોઅ જગત બોના પેલ્લા આથો, જીયા વિશે આમુહુ ઉનાયા, જીયાલે પોતા ડોંઆકી હેયો, આને જીયાલે આમુહુ ધ્યાનુકી હેયો, આને આથુકી આથલ્યો. 2ઇ જીવન તોરતીપે આલો આને આમુહુ તીયાલે દેખ્યો, આને આમુહુ તીયા સુવાર્તા દેતાહા આને તુમનેહે તીયા અનંત જીવનુ વિશે આખતાહા જો બાહકા પરમેહેરુ આરી આથો, આને આમનેહે દેખાયો. 3જો કાય આમુહુ હેયો આને ઉનાયાહા તેજ સુવાર્તા તુમનેહે બી ઉનાવતાહા ઈયા ખાતુરે કા તુમુહુ બી આમા આરી ભાગીદાર બોના; આને આમા ભાગીદારી પિતા આને તીયા પોયરો ઇસુ ખ્રિસ્તુ આરી હાય. 4આને આમુહુ એ ગોઠયા ઈયા ખાતુરે લેખતાહા કા તુમા ખુશી પુરી વી જાય.

ઉજવાળામે ચાલુલો

5જે સુવાર્તા આમુહુ ઇસુ ખ્રિસ્તુકી ઉનાયા આને તુમનેહે ઉનાવતાહા તે સુવાર્તા એ હાય; કા પરમેહેર ઉજવાળો હાય આને તીયામે આંદારો નાહ. 6કાદાચ આમુહુ આખજી, આમા ભાગીદારી પરમેહેરુ આરી હાય આને આંદારામે ચાલતાહા તા આમુહુ ઝુટો ગોગતાહા આને હાચાયુપે નાહ ચાલતા. 7પેન કાદાચ પરમેહેરુ ઉજવાળામે હાય, તેહેકીજ આપુહુ ઉજવાળામે ચાલજી, આપુહુ એકબીજા આરી ભાગીદારી રાખતાહા, આને તીયા પોયરા ઇસુ રોગુતુ બલિદાન આપનેહે બાદાહાને બાદા પાપુકી શુદ્ધ કેહે. 8કાદાચ આમુહુ આખજી આમામે કાયજ પાપ નાહ તા પોતાલુજ ધોકો દેતાહા, આને પરમેહેરુ હાચાય આપુમે નાહ. 9પેન કાદાચ આપુહુ આપુ પાપુહુને પરમેહેરુ હુંબુર માની લેતાહા તા તોઅ આપુ પાપુહુને માફ કેરા આને આપુ બાદા ખારાબ કામુકી શુદ્ધ કેરામે વિશ્વાસ યોગ્યો આને ધર્મી હાય. 10પેન કાદાચ આપુહુ આખજી કા આપુહુ પાપ નાહ કેયો તા આપુહુ પરમેહેરુ ઝુટો ઠેહરાવેહે આને તીયા વચન આપુમે નાહ.

Currently Selected:

1 યોહાન પત્રો 1: DUBNT

Highlight

Copy

Compare