चुन्ल आर भेज्ल चेलासब 11

1यहूदिया प्रदेशमे भेल चुन्ल आर भेज्ल चेलासब आर विश्वासी भ्या-बहिनसब गैर-यहूदी आदमीसब भी परमेश्वरके वचन स्वीकार कैल्कै छे कहिके सुन्लकै। 2आर जब पत्रुस यरूशलेम सहरमे ऐलै तब यहूदी विश्वासीसब पत्रुसके एरंके दोष लगाबे लाग्लै, 3“गैर-यहूदी आदमीसिके घरमे जैके ओकरसिके संगे तुहें कथिले खानपिन कैलह?” 4तब पत्रुस ओकरासिके जे बात कर्नेलियसके घरमे भेलै रहे सभे बात एक-एक करिके बयान दिए लाग्लै, 5हमे योप्पा सहरमे प्रार्थना कर्ते रहियै, आर हमे ध्यान मगन रहियै, तब स्वर्गसे चारो कोनामे पकड्ल बडका तन्नाके जुगुर कुछु धर्तीमे उतरिके हमरलगत ऐलै। 6हमे बढियाँसे देख्लियै ते ओत्ते धर्तीके चौपाया जानवर आर जंगली जानवरसब, ससरेवाला जीव-जन्तु आर आकाशके चिडियासब देख्लियै। 7हमरा एरं कहेल एकटा आवाज सुन्लियै, “हे पत्रुस उठ् आर मारिके खो।” 8मगर हमे कहैलियै, “नै, नै प्रभु, कोनो अपवित्र या अशुद्ध चीज कहियो हमर मुखमे नैपड्लै छे।” 9मगर ऊ आवाज दोसर बेर फेर स्वर्गसे हमरा कहैल्कै, “जे कुछु परमेश्वर शुद्ध कैल्कै छे, ओकरा तुहें अशुद्ध नैक।” 10तीनबेर एरं भेलै, आर ऊ सभे चीज फेर आकाशमहर घिची लेल गेलै। 11“तखनिहैं कैसरिया सहरसे हमरा बोलाबैले भेज्ल तीनटा आदमीसब हमे ठहर्ल घरमे ऐलै। 12भला ही ऊसब गैर-यहूदी आदमीसब छै बेधडक ओकरसिके संगमे जैले हमरा पवित्र आत्मा कहैल्कै। आर यी छबो विश्वासी भ्यासिके भी हमर संगमे ल्याके गेलियै, आर हमेसब कर्नेलियसके घरमे गेलियै। 13ऊ हमरासिके बतैल्कै, कि एकटा स्वर्गदूत ओकर घरमे खडा भ्याके एरं कहते ऊ देखल्कै, ‘योप्पा सहरमे तोर आदमी भेजिके सिमोनके, जे पत्रुस कहलाबैछै ओकरा बोलाबैले भेज। 14ऊ तोरासिके वचन सुनैतौ जकरद्वारा तुहेंसब उद्धार पैभैं तुहें आर तोर सारा परिवार।’ 15जब हमे जैके आदमीसिके संगे बोले लाग्लियै, तब पेन्तिकोसके पावनके समयमे आपनसिके उप्परमे जेरंके पवित्र आत्मा ऐलै रहे ओहिने करिके ओकरोसिके उप्परमे ऐलै। 16तब प्रभु येशूके कहेल उटा वचन हमरा याद ऐलै, ‘यूहन्ना ते तोरासिके पानीसे बप्तिस्मा देल्कौ, मगर तुहेंसब पवित्र आत्मामे बप्तिस्मा पैभैं।’ 17सेल्याके यी स्पष्ट छै कि परमेश्वर ओकरासिके भी उहे दान देल्कै, जे दान हमरासिके प्रभु येशू ख्रीष्टसे विश्वास करिके मिल्लै ते, हमे परमेश्वरके रोकेवाला के छियै?” 18यी बात सुन्लके बाद यहूदी विश्वासीसब चुप भेलै, आर एरं कहते परमेश्वरके महिमा कैल्कै, “आब ते परमेश्वर गैर-यहूदी आदमीसिके भी कहियो खतम नैहुएवाला जीवनके लिए पाप करैले छोडिके परमेश्वरके तरफ मन लगाबैके मौका देल्कै छे।”

एन्टीओखिया सहरमे शाउल आर बरनाबास

19स्तिफनसके जान मार्ल गेलके बाद, बहुते विश्वासीसब यरूशलेम सहर छोडल्कै आर ऊसब भागिके फोनिके प्रदेश, साइप्रस टापु आर सिरिया प्रदेशके एन्टीओखिया सहरमे पहुँचलै। मगर ऊसब यहूदी आदमीसिके सिवाय आर कक्रहौ येशू ख्रीष्टके बारेमे सन्देश नैसुनाबै। 20मगर ओकरासिमेसे कुछु विश्वासीसब साइप्रस टापु आर कुरेनीवासीसब रहै, जेसब एन्टीओखिया सहरमे आबिके बहुते गैर-यहूदी आदमीसिके भी प्रभु येशू ख्रीष्टके बारेमे खुश-खबरी प्रचार कैल्कै। 21प्रभुके शक्ति ओकरसिके संगे रहै आर बहुते गैर-यहूदी आदमीसब ओकरसिके सन्देशमे विश्वास कैल्कै आर प्रभु येशूमे भरोसा करे लाग्लै। 22जब यी खबर यरूशलेम सहरमे भेल मण्डलीमे पुग्लै, तब ऊसब बरनाबासके एन्टीओखिया सहरमे भेजल्कै। 23ऊ ओत्ते आबिके परमेश्वरके अनुग्रहके देखिके बहुते आनन्दित भेलै, आर ऊ सभैके तन मनसे प्रभुके बतैल रस्तामे चलैके लिए उपदेश देल्कै। 24बरनाबास भला आदमी रहै आर पवित्र आत्मा आर विश्वाससे परिपूर्ण रहै, आर बहुते आदमीसब प्रभुमे विश्वास करे लाग्लै। 25तब बरनाबास एन्टीओखिया सहर छोडल्कै आर शाउलके खोजैले टार्सस सहरमे गेलै। 26आर जब ओकरासे मिल्लै तब ओकरा एन्टीओखिया सहरमे आनल्कै। तब पुरा एक सालतक मण्डलीके आदमीसिके संगे पावल आर बरनाबास भेटघाट कर्ते रहलै आर बहुते आदमीसिके प्रभु येशूके बारेमे शिक्षा देते रहलै। आर चेलासब सभैसे पहेला एन्टीओखिया सहरमे ही ख्रीष्टियन कहलैलै।

27उहे समयमे कुछु विश्वासीसब जेसब परमेश्वरके वक्तासब रहै यरूशलेम सहरसे एन्टीओखिया सहरमे ऐलै। 28ओकरसिमेसे अगाबस नाम भेल एकझन खडा भ्याके पवित्र आत्माके प्रेरणासे यी बतैल्कै कि सारा संसारमे बडका अकाल पड्तै, आर ऊ अकाल महाराजा क्लौडियसके शासनकालमे पड्लै। 29तब चेलासब सभेकोय आपन-आपन क्षमताके मुताबिक यहूदिया प्रदेशमे रहेवाला ख्रीष्टके सभे विश्वासी भ्या-बहिनसिके लिए सहायता दियैके निर्णय कैल्कै। 30एरंके उठैल पैसा ऊसब यरूशलेम सहरके मण्डलीके अगुवासिके बरनाबास आर शाउलके हातसे भेजी देल्कै।

Currently Selected:

चुन्ल आर भेज्ल चेलासब 11: KYVNT

Highlight

Compare

Copy