JEREMIA 5
5
Dosa Jerusalem
1O kalak Jerusalem, kiamlah arah pasar-pasarndu!
Pernehen kelewet, tatap alu matandu jine,
pepayo kerina tiga inganndu erbinaga.
Lit kin kam jumpa sekalak lah gia,
si ngelakoken kai si mehuli,
si ersura-sura erkemalangen man Dibata?
Adi lit kam jumpa sekalak lah gia,
banci ialemi TUHAN kuta Jerusalem.
2Aminna pe nindu maka nembah nge kam man TUHAN,
tapi si tuhuna lain si ibelaskenndu, lain i bas pusuhndu.
3Tentu idarami TUHAN ketutusen kalak,
iligasNa kam, tapi la diatendu pe.
IripukkenNa kam tapi la kam nggit erlajar.
Ibahanndu mekeng pusuhndu e maka la kam nggit nadingken dosandu.
4E maka nina ukurku, “Kitik kap kalak enda!
Bodoh kap ia
la ietehna sura-sura Dibata,
si ngena ate TUHAN la ietehna.
5Kudahi ateku kalak si erkuasa,
ngerana ateku rassa.
Pasti ietehna kai sura-sura Dibata,
kai peraten TUHAN si man dalanenken.”
Tapi kerina enggo nulak kuasa TUHAN
janah la nggit patuh.
6E me sabapna reh singa i bas kerangen nari munuh kalak enda,
serigala i gurun pasir nari reh encaing-caing ia.
Arimo gawah-gawah arah tengah kutana.
Ise si ndarat la banci la ijerngemna
perban melala kal dosa-dosana,
dingen lalap la erngadi-ngadi itundalkenna Dibata.
7Nungkun Dibata nina, “Engkai maka arus Kualemi dosa bangsangKu?
Itundalkenna kap Aku,
nembah ia man dibata-dibata si la tuhu.
Kubere nakan bangsangKu seh besur,
tapi kenca besur lawes ia erlua-lua
ikerikenna wari-warina ras diberu si pencarinna erlua-lua.
8Desken kuda kiringen si dem kerincuhen,
erngih-ngih man ndehara temanna.
9Engkai maka la arus Kuukum ia erkiteken kerina si e,
ngkai maka la Aku erbalas man bangsa si bage?
10Kusuruh musuh nabahi batang anggur bangsangKu,
tapi la keri kal iradasken.
Kukataken man musuh e gelah itastasina dahan-dahanna,
sabap dahan-dahan e labo Aku empuna.
11Kalak Israel ras Juda
tuhu-tuhu enggo Aku itipuna.
Aku, TUHAN, kap si ngerana.”
Israel itulak TUHAN
12Bangsa Israel enggo mersoken TUHAN nina, “Labo kai pe si ibahanNa. Labo kita ikenai paksa si mesera. Labo kita ngenanami peperangen ras kelihen.” 13-14Ikataken bangsa e maka nabi-nabi labo kai pe ertina; desken angin saja nge ngenca. Labo lit ibabana berita i bas TUHAN nari. Ngerana TUHAN si Mada Kuasa nina, “O Jeremia erkiteken enggo bage pengerana bangsa enda, Kubahan maka katangKu Kutamaken ku babahndu bali ras api. BangsangKu bali ras ranting, jenari ipan api e ia seh keri.”
15O bangsa Israel, ibaba TUHAN me sada bangsa i bas ingan si ndauh nari nerang kam. Bangsa e megegeh tuhu-tuhu dingen nai nari enggo lit janah la iantusindu cakapna. 16Tukang pemanahna tentera si mbisa. Ibunuhina kalak, sitik pe la atena mekuah. 17Itelenna kerina ulih jumandu ras panganndu; ibunuhina anakndu si dilaki ras si diberu. Igelehina lembu ras biri-birindu, jenari ikernepkenna batang anggur dingen batang ara. Kuta-kutandu si erbenteng si jadi penalemenndu, ikernepkenna salu tenterana.
18Nina TUHAN, “Tapi i bas paksa si e pe labo keri Kulesapken bangsangKu. 19O Jeremia, adi isungkunna kam ngkai maka bagenda jadina, turiken man bana, maka si enda kerina jadi erkiteken enggo itundalkenna Aku, jenari jadi budak dibata-dibata si deban i bas negerina jine. Dage ia pe iperbudak me i bas negeri si labo negerina jine.”
Dibata mpersingeti bangsaNa
20Nina TUHAN, “Kataken man kesusuren Jakup, turiken man kalak Juda. 21Perdiatekenlah, o kam kalak longor, kam kalak bodoh! Lit matandu tapi la erpengidah. Lit cupingndu tapi la erpemegi. #Jes 6:9-10; Esek 12:2; Mrk 8:18 22Aku kap TUHAN; ngkai maka la kam mbiar man bangKu? Engkai maka la nggirgir i adep-adepenKu? Kuamparken kersik jadi baleng lawit, jadi baleng si rasa lalap si la banci ikeparina. Aminna pe galumbangna ergalun dingen ergeruhguh tapi labo terlewatisa. #Jop 38:8-11 23Tapi bangsa enda bangsa si mekeng pusuhna dingen pemberontak. Kam enggo erkusur jenari itadingkenndu Aku. 24Aminna pe Kupesusur udan i bas paksana ras Kubereken pe man bandu paksa peranin tep-tep tahun, tapi labo pernah iukurindu uga erbahan mehamat man Bangku. 25Tapi dosa-dosandu ngolangi si mehuli e i bas kam nari.
26Kalak jahat nggeluh i tengah-tengah bangsangKu. Nimai janah nggempangi ia desken peniding-niding nangkap perik-perik, bage me itogengna sidingna lako nangkap manusia. 27Bali ras perburu ndemi ranjangna alu perik, bage me pe kalak enda ndemi rumahna alu barang rampasen. E me erbahanca maka ia erkuasa dingen bayak, 28si erbahanca ia mbur dingen cukup panganna. La ersibar kejahaten si ibahanna. La iberekenna hak man anak melumang. La iberekenna keadilen man kalak si itindih.
29Tapi erkiteken si e, Aku TUHAN la banci lang ngukum ia. Erbalas Aku man bangsa enda. 30Kiniseran ras cilaka jadi i negeri enda. 31Nabi-nabi melasken kata la tuhu, imam-imam merentah sue ras si iperentahken nabi-nabi, janah bangsangKu la melasken keberatenna. Tapi kai nari pagi ibahanna adi enggo seh paksa pendungina?”
Currently Selected:
JEREMIA 5: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
