JEREMIA 6
6
Jerusalem ikepung musuh
1O kalak Benyamin lompatlah gelah kam terkelin, kiamlah i Jerusalem nari! Embuslah terompet i Tekoa, jenari pegara api jadi tanda i Bet-Hakerem. Nandangi reh me cilaka ras mara i Utara nari. 2Kuta Sion si mejile e nandangi ikernepken me. 3Bagi permakan ras rarasenna bage me raja-raja erkemah i je ras tenterana. Ipajekkenna kemahna i sekelewet kuta e. Tep-tep kalak rate-ate i ja atena ipajekkenna kemahna. 4Nina, “Ersikaplah merang Jerusalem! Ersikaplah! Seranglah tupung pantek ciger.” Tapi nina ka, “Enggo melawenca, sabap wari enggo nandangi ben, dingen awih-awih enggo reh gedangna. 5Berngi saja gia siserang; siradasken benteng-benteng kutana.”
6 TUHAN si Mada Kuasa si merentahken raja-raja gelah nabah batang-batang kayu dingen pegun-gun taneh jadi benteng Jerusalem. Nina, “Kuukum me kuta e erkiteken dem i je penindasen. 7Desken sumbul pedarat lau malem, bage me ia pedarat kejahatenna. Kubegi kekejamen ras kecedaan i bas kuta e. Penakit, ugah, e me kerina si Kuidah i je. 8O kalak Jerusalem bahan kerina kesusahen e jadi pelajaren man bandu, adi lang Kutundalken me kam. Kusalihken kuta e jadi taneh si melungen, la lit sekalak manusia pe ringan i je.”
Israel si pemberontak
9Nina TUHAN si Mada Kuasa man bangku, “Nandangi ipelinang me Israel, bali ras batang anggur si enggo keri buahna iputiki.” E maka arus ipulahindu kerina kalak si banci ipulahindu tupung lit denga kesempaten.”
10Ningku njabapsa, “Ise kin megiken aku adi aku ngerana persingeti ia? Mekengsa pusuhna, labo ia ngasup megiken tenahNdu. Itawaina aku adi kubelasken kataNdu. 11Pernembeh ateNdu man bangsa e, gara ka nge i bas pusuhku pe. E maka lanai tertahanken aku.”
Kenca bage nina TUHAN, “Amburken pernembehKu ku babo anak-anak i bas gedang-gedang dalan, ras ku babo perpulungen anak perana. Perbulangen ras ndehara la banci la iangkut. Kalak si enggo metua kal pe labo tading. 12Rumahna, ndeharana, jumana ibereken man kalak. Kuukum ateKu penduduk negeri enda. #Jer 8:10-12
13Kerina kalak, subuk mbelin ras kitik, ndarami duit alu dalan si la bujur. Subuk nabi bage pe imam kerina nipu jelma si nterem. 14Perbahanenna encidahken tempa-tempa ugah bangsangKu labo mekelek. ‘Dame’ nina, tapi si tuhuna labo lit dame. #Esek 13:10 15Aturenna mela iakapna ngelakoken perbahanen si mbau e, kepeken labo iakapna mela. Sitik pe la ietehna mela. E maka guling ia bagi perguling kalak si deban. Adi Kuukum ia e maka enggo dung kal ia. Aku TUHAN kap si ngerana.”
Israel la nggit ngikutken TUHAN
16Nina TUHAN kempak bangsaNa, “Tedislah i bas serpang-serpang jenari nehenlah. Daramilah dalan si nai, dalan si mehulina kal. Arah e lah erdalan, e maka dame man bandu.”
Tapi nina njabapsa, “Lang! Kami la nggit!” #Mat 11:29 17E maka itugasken TUHAN penjaga-jaga lako megiken sora terompet tanda persinget. Tapi nina kalak e, “La ate kami ibegiken kami.”
18Kenca bage ngerana TUHAN nina, “O bangsa-bangsa, erlajar kerna kai si jadi man bangsangKu. 19O pertibi, dengkehkenlah! Kuukum me bangsangKu, erkiteken kerina sura-surana. Kuruntuhken me bangsa enda, erkiteken enggo itulakna pengajarenKu, janah la iikutkenna katangKu. 20Kai kin gunana man bangKu si merim-merim si ibaba i Syeba nari! Man kadengKu kin rempah-rempah si ibabana i bas negeri si ndauh nari? La Kualoken persembahenna, la ngena ateKu persembahen tutungen. 21E maka Kubahan bangsa enda terantuk dingen guling. Parang-mbelin ras anakna, teman-teman ras anak kutana la banci lang mate kerina.”
Serangen i Utara nari
22Nina TUHAN, “Bangsa si megegeh sangana reh i Utara nari. Erperang atena. 23Senjatana panah ras lembing; bangsa e kejam janah la meteh mekuah. Bali ras pergeruhguh lau lawit bage me sora nahe kudana; irattuhna ku Jerusalem lako nerangsa.”
24Megi berita e nggirgir kalak Jerusalem. Perban biarna mesui akapna bagi persuina iakap diberu si nandangi mupus. 25La ia pang ndarat ntah ku juma, sabap i japa pe musuh erbahan kebiaren.
26Nina TUHAN man bangsaNa, “Uisken uis guni janah erguling-gulinglah i bas abu. Cedalah atendu dingen serkolah bagi kalak si nangisi kematen anakna si tonggal, sabap rempet me reh si engkernepi.
27E maka nina TUHAN man Jeremia, “Ujilah bangsangKu bali ras tukang nguji logam. Perdiatekenlah lagu langkahna. 28Kerina ia pemberontak, metangkang, piher bagi tembaga ras besi. Pertaki pacik ia, dingen erdalan-dalan ku jah ku jenda lako pebau-bau kalak. 29Logam enggo iuji seh melebur, tapi melketna lalap la bene. Percuma bangsangKu terus iuji gelah tulen, sabap kalak jahat lalap la tersirangken i bas ia nari. 30Pirak si la terpake me ibahan gelarna, sabap Aku TUHAN enggo ngambekken ia.”
Currently Selected:
JEREMIA 6: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
