JESAYA 51
51
Kata pengapul man Jerusalem
1Nina TUHAN,
“Begikenlah Aku, o kam si mesikel ikelini,
o kam si ndarami penampat i bas Aku.
Ingetlah lingling batu asalndu nai
lubang pemuaten batu ingan asal mulandu.
2Ingetlah nini-ninindu Abraham, ras Sarah;
tupung Kudilo Abraham, langa lit anakna.
Jenari Kupasu-pasu janah Kubereken anak man bana;
Kubahan nterem kal sinursurna.
3Kucidahken me perkuah ateKu kempak Jerusalem,
kempak kerina kalak si ringan i bas runtuh-runtuhenna.
Taneh si kerah janah i je la kai pe turah.
Kubahan jadi peken bali ras Pardis.
Lit i je keriahen ras kemalemen ate,
radu ras ende-enden pujin ras pengataken bujur pe.
4Begikenlah Aku, o bangsangKu,
begikenlah kai si Kukataken bandu.
Kubereken pengajarenKu man bangsa-bangsa;
undang-undangKu mereken terang man bana.
5Pedas Aku reh, lako ngkelini ia;
paksa kemenangenKu enggo reh deherna.
Aku jine pagi ngerajai bangsa-bangsa kerina;
tertima-tima ia, sabap Aku me pengarapenna.
6Tarelah ku langit, tatap kempak doni,
masap me langit desken cimber api.
Doni enda getem bagi uis male,
desken rengit, jelma si ngianisa keri mate.
Tapi kemenangenKu la erpeltep-peltep.
7O bangsangKu si meteh bujur, begikenlah Aku,
i bas pusuhndu kap rurat pengajarenKu.
Ola mbiar adi isaling-saling ras igombangi kalak kam,
8sabap lesap me pagi ia desken uis ipan nget-nget!
Tapi keselamaten si Kubereken tahan rasa lalap,
kemenangenKu la erpeltep-peltep.”
9Kekeken min TUHAN, kekekenlah, sampati kami!
Pakelah kuasaNdu, kelini kami.
Pakelah e bagi si ibahanNdu i bas paksa si nai
tupung iperperkenNdu Rahap,
naga lawit si adi.
10Kam ka nge si ngkerahi lawit si mbages
si erbahan dalan arah tengah lau.
E maka kalak si ikeliniNdu, banci ngepar alu selamat.
11Kalak si enggo ipulahiNdu e
seh me i Jerusalem alu meriah ersurak ras rende.
Keriahen si rasa lalap ndemi pusuhna,
suhsah ras ndele ate, rasa lalap lanai inanamina.
12Bagenda nina TUHAN,
“Aku, Aku nge si ngapuli kam.
Engkai maka kam mbiar man manusia si ermasap-masap,
si bali saja nge ras dukut-dukut?
13Enggo kin kam lupa man TUHAN si Nepa kam,
si ngkimbangken langit,
ras si namaken palas doni enda?
Engkai maka kam mbiar la erngadi-ngadi,
nandangi kalak merawa si nindas kam
ras kalak si atena ngkernepken kam?
Situhuna keganasen e lanai banci ngkenai kam.
14Kalak si tertaban pedas me ipulahi;
la ia mate, janah la ia kurang nakan.
15Aku kap TUHAN Dibatandu;
Kugawer lau lawit,
e maka ergeruhguh sora galumbang.
GelarKu e me TUHAN si Mada Kuasa!
16Kukimbangken langit,
janah Kupajekken palas doni.
Kukataken man Jerusalem, ‘Kam kap bangsangKu!
Enggo Kubereken bandu pengajarenKu,
janah Kukawali kam alu tanKu.’ ”
Enggo bias kiniseran Jerusalem
17O Jerusalem, kekeken, tediskenlah.
Ukumen pernembeh ate TUHAN enggo inemndu
tare calung si iberekenNa man bandu.
Enggo inemndu seh keri,
e maka enggo mbewat-mbewat kam ibahanna. #Ket 14:10; 16:19
18Anak si ipupusndu la lit sada pe si mabai kam,
i bas anak si ipebelin-belinndu la lit sada pe si negu-negu kam.
19Kam enggo kedabuhen dua erbage mara:
La lit ise pe si ngapuli kam;
negerindu enggo radas ibahan perang,
janah bangsandu kelihen mesangat.
20I bas serpang dalan,
anak-anakndu guling perban kotena
bali ras belkih kena banto perburu.
Enggo igejapna uga sangatna pernembeh ate Dibata.
21O kam anak kuta Jerusalem si i bas kiniseran si mberat,
seh maka kam mbewat-mbewat bagi kalak mabuk!
22Bagenda nina TUHAN Dibata sikapitndu,
“Calung pernembeh ateKu si Kubereken bandu
Kubuat me genduari.
Anggur si erbahanca kam mbewat-mbewat,
lanai pada inemndu.
23Kubereken me calung e man kalak si nindas kam mbarenda,
kalak si mahan kam ampar i bas dalan,
si ndedehi kam bali ras kubang.”
Currently Selected:
JESAYA 51: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
