JESAYA 52
52
Ipulahi Dibata Jerusalem
1Kekeken, o Jerusalem, kekeken!
Pakekenlah gegehndu.
O Jerusalem kuta si Badia, pakekenlah uis kehaganndu,
kalak si la bersih lanai banci mengketi kam. #Ket 21:2,27
2Kuisken abu si leket i bas dagingndu;
kekeken, tangtangi rante si ngiket kerahungndu
o anak kuta Sion si tertaban.
3Nina TUHAN kempak bangsaNa, “Tupung kam idayaken jadi budak labo lit ise pe si nggalarisa. Erkiteken si e guna mulahi kam, la ka bo perlu itebusi. 4Tupung kam jadi kalak pertandang i Mesir si e ilakokenndu arah ukurndu ersuruh. Tapi Assur mabaken kam alu paksa janah la lit sitik pe igalarina kerna kam. 5Janah genduari bage ka nge jadi i Babilon. Kam itabanna, janah la lit sitik pe igalarina. Kalak si merentah kam, meganjang cakapna, janah la erngadi-ngadi megombang ia man bangKu. #Rom 2:24 6Seh me pagi paksana maka iakuindu Aku Dibata, janah maka Aku enggo ngerana man bandu.”
7Seh kal riahna ukur ngidahsa;
persuruhen reh ngepari deleng-deleng,
maba berita si mehuli, berita perdamen.
Imomokenna kemenangen, janah nina man Sion,
“Dibatandu raja kap.” #Nah 1:15; Rom 10:15; Ep 6:15
8Megi si e pengawal kuta ersurak,
ersurak ras-ras alu meriah!
Alu matana jine idahna
TUHAN mulih ku Sion.
9O runtuh-runtuhen Jerusalem,
ersuraklah alu meriah,
sabap ipulahi TUHAN me Jerusalem
iapuliNa me bangsaNa.
10Icidahken TUHAN me kuasaNa,
i lebe-lebe mata kerina bangsa.
Kerina doni pagi ngidahsa,
TUHAN ngkelini bangsaNa.
11Tadingkenlah kuta Babil
o kam kerina si maba perkakas rumah pertoton.
Ola jemak barang si pantang
pebadiaken bandu, jenari berkatlah. #2Kor 6:17
12Sekali enda la perlu merudu-rudu kam lawes,
sabap labo kam lompat.
TUHAN Dibatandu kap si naruhken kam,
i pudi dingen i lebe nari ikawaliNa kam.
Suruh-suruhen si ngenanami kiniseran
13Bagenda nina TUHAN,
“La kap sia-sia suruh-suruhenKu ndahiken dahinna;
ipehaga dingen ipeganjang kal ia.
14Mbarenda nterem kal kalak sengget ngidah ia;
sabap enggo ceda kal tempasna seh maka lanai tempa ia manusia.
15Tapi genduari melala bangsa jengang ngidahsa,
janah raja-raja la ngasup ngerana perban mamangna atena.
Kai si la pernah itehna mbarenda
idahna me pagi janah iantusina.” #Rom 15:21
Currently Selected:
JESAYA 52: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
