JESAYA 50
50
1Nina TUHAN,
“Akapndu kin bangsangKu Kupedauh
bagi sekalak dilaki ngulihken ndeharana?
Adi bage, apai dage surat mulihna?
Akapndu kin kudayaken bangsangKu ku pembuangen
desken sekalak jelma ndayaken anak man perutangenna?
Labo bage! BangsangKu ibaba ku pembuangen
erkiteken dosa ras kejahatenna.
2Tupung Aku reh lako ngkelinisa,
ngkai maka bangsangKu la lit ngalo-ngalosa?
La kin cukup gegeh ras kuasangKu mulahi ia,
maka la ia ngaloi tupung Aku erlebuh man bana?
Lawit pe kerah arah perentahKu,
lau belin pe banci Kusalihken jadi gurun pasir
seh maka nurungna mate perban kurang lau.
3Langit banci Kusalihken jadi mbiring,
bali biringna ras uis kalak si nangisi kalak mate.”
Kepatuhen suruh-suruhen TUHAN
4 TUHAN si Erdolat enggo ngajari aku ngerana,
gelah banci kupegegehi kalak si latih, alu kata-kata.
Tep-tep erpagi-pagi ipekekeNa ukurku,
lako ndengkehken pengajarenNa man bangku.
5Ibereken TUHAN man bangku pengertin
e maka la aku surut i bas IA nari, la aku ngelawan.
6Kutareken gurungku man kalak si mekpek aku,
bage pe isangku man kalak si ngeruah janggutku.
Megombang kalak bangku, icidurina ayongku,
tapi la kulawan, la kutamburi ayongku. #Mat 26:67; Mrk 14:65
7Perban TUHAN si Erdolat penampatku,
icekuraki kalak pe labo gulut ukurku.
Kupepiher ukurku nahankenca,
sabap kueteh labo banci kuakap mela.
8Ndeher kap Dibata ras aku,
icidahkenNa me maka la ersalah aku.
Ise pang nalahken aku?
Ota ras ku pengadilen, bahan pengadunndu. #Rom 8:33-34
9 TUHAN jine kap si ngkapiti aku,
dage ise banci nalahken aku?
Masap me kerina si ngaduken aku,
bali ras uis ipan nget-nget.
10O kam kerina si mehamat man TUHAN,
janah patuh man perkatan suruh-suruhenNa;
dalan si man dalanenndu banci jadi seh gelapna
tapi ernalemlah man TUHAN janah teklah man baNa.
11O kam si erbahan pertakin lako meneken kalak
kam jine nge bene arah pertakinndu e.
TUHAN jine kap si mahanca si enda jadi;
e maka seh kal akapndu suina ibahanNa.
Currently Selected:
JESAYA 50: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
