JESAYA 26

Ibereken Dibata kemenangen man bangsaNa

1Reh me paksana maka bangsa e ngendeken ende-enden enda i negeri Juda:

Nteguh kal kutanta enda;

Dibata jine ngkawali tembok-tembokna!

2Talangilah pintu gerbang kuta

suruh bengket bangsa si setia,

bangsa si tutus ngelakoken sura-sura Dibata.

3O TUHAN, iberekenNdu kap dame si tuhu-tuhu

man kalak si tetap ukurna,

dingen si ernalem man baNdu.

4Ernalemlah man TUHAN seh rasa lalap,

tentu ikawaliNa kita tetap.

5Enggo ipeterukNa kalak si rukur meganjang;

icedakenNa kuta si nteguh inganna tading

janah iperperkenNa tembokNa si meganjang.

6Kalak si nai itindas genduari erdalan i babona,

iperjakina alu nahena.

7O TUHAN, dalan kalak benar mesai ibahanNdu;

dalan si man bentasenna kendit tuhu-tuhu.

8PeratenNdu ikutken kami,

Kam ngenca pengarapen kami.

Kam ngenca sura-sura pusuh kami.

9I bas berngi si mbages tedeh ateku Kam,

alu ate tutus tendingku tetap terdaram-daram.

Adi irungguiNdu pagi doni ras manusia si ngianisa,

kebujuren si tuhu-tuhu, i je me pagi maka iantusina.

10Aminna mehuli pe perbahanenNdu man kalak jahat,

la pernah ia erlajar ngelakoken si patut.

I bas negeri bangsa si bujur enda pe jahat perbahanenna;

kemulianNdu si mbelin la sitik pe iperdiatekenna.

11O TUHAN, Kam enggo sikap ngukum imbangNdu, tapi si e la ietehna.

Dage cidahkenlah keleng ateNdu man bangsaNdu,

maka mela iakap imbangNdu ngidahsa.

Bahanlah maka mesui ate imbangNdu,

ngenanami ukumen si isikapkenNdu man bana. #Heb 10:27

12O TUHAN, iberekenNdu me kesenangen man kami;

si nasa ulih pendahin kami,

bekas pendahinndu kap kerina.

13O TUHAN Dibata kami, kami enggo iperentah tuan-tuan si deban,

tapi kam kap ngenca TUHAN kami.

14Genduari enggo mate ia kerina, lanai ndigan pe nggeluh ka.

Beguna pe lanai keke lalap,

sabap enggo iukumNdu ia seh kernep.

Lanai ise pe ngingetsa seh rasa lalap.

15O TUHAN, bangsaNdu ertambah-tambah ibahanNdu teremna,

ku kerina dampar ipebelangNdu negerina,

erkiteken si e Kam tuhu-tuhu ipehaga.

16 TUHAN, tupung iukumNdu bangsaNdu,

alu kelsehen ertoto ia baNdu.

17 TUHAN, ibahanNdu maka kami serko kerina,

bali ras diberu si sangana mupus, nderkuh ban suina.

18Mberat daging kami, janah mesui kal iakap kami,

tapi kepeken kai pe la lit ipupus kami.

Kemenangen man negeri kami la dat kami,

janah jelmana pe labo tambah beliganna.

19Bangsa kami si enggo mate nggeluh ka mulihi,

maitna keke ka mulihi.

Kerina kalak si medem i bas kuburenna,

keke pagi, jenari rende ban riahna.

Desken embun si erndilap ngelitapi taneh kerah-kerah,

bage me TUHAN pegeluh kalak si enggo mate.

Ukumen ras pengalemi dosa

20O bangsangKu, bengketlah ku rumahndu, janah erukilah man bandu. Cebuni kam lebe kentisik seh pernembeh ate TUHAN enggo ngadi. 21Reh me TUHAN i bas inganNa nari i Surga lako ngukum manusia i doni erkiteken dosa-dosana. Pembunuhen si ilakoken manusia alu erbuni-buni ipetangkas janah taneh pe lanai muniken kalak si enggo terbunuh.

Currently Selected:

JESAYA 26: BTX

Highlight

Copy

Compare