JESAYA 27
27
1Tupung e ipake TUHAN pedangNa si megegeh dingen entelap lako ngukum Lewiatan, nipe naga si ngelilet ras erpangpang e, ras munuh rubia-rubia si mejin si ringan i bas lawit. #Jop 41:1; Msm 74:14; 104:26
2I bas wari si e ikataken TUHAN me kerna peken anggurNa si mehuli nina, 3“Kuperdiateken ras Kusiram rusur peken anggurKu. Kujaga suari ras berngi, e maka la lit ise pe encedaisa. 4Lanai ateKu nembeh man peken anggur e. Adi lit denga kin dukut ras rambah duri i je, Kubabat minter, jenari Kusuluhi seh keri. 5Tapi adi musuh bangsaKu mesikel ia pengkawalingKu, erdamelah ia ras Aku. Tuhu, erdamelah ia ras Aku.”
6I bas paksa si reh e, bangsa Israel kesusuren Jakup, rurat me desken batang kayu; erbunga janah ertunas me ia, janah doni enda idemina alu buahna.
7Ukumen si ibahan TUHAN man Israel, langa bali kelekna ras ukumen man musuh-musuhna. Tenterana pe langa bali teremna mate ras tentera musuhna e. 8TUHAN ngukum bangsaNa alu mbuang ia ku negeri si deban. IangkutNa ia ku ingan si ndauh alu angin jahat i Timur nari. 9Tapi dosa-dosa Israel banci ialemi adi batu batar-batar kalak perbegu enggo igilingna melumat bagi kapur, janah batar-batar ingan mpersembahken kumenen bage pe tanda Dewi Asera lanai lit si tading.
10Kuta si erbenteng e enggo runtuh, janah enggo itadingken desken gurun pasir si lume. Lembu nggagat ras gempang i je, janahna engkeriken bulung-bulung si lit i das dahan-dahan. 11Dahan-dahan batang kayu melus janah penggel, jenari ipepulung diberu-diberu man ranting. Erkiteken bangsa e la lit pengertinna, e maka la mekuah ate Dibata si nepasa, janah la icidahkenNa lias ateNa man bana.
12I bas wari e, mulai i Lau Eprat nari terus ku perbalangen ras Mesir, ipepulung TUHAN me bangsaNa sada sadai, bali ras kalak si peserap gandum i bas nggala nari.
13Adi wari si e enggo seh, iembus me terompet si galang, gelah mulih kerina kalak Israel si terbuang subuk i Assur bage pe i Mesir nari. E maka mulih me ia kerina, jenari nembah man TUHAN i kuta Jerusalem, i datas delengNa si Badia.
Currently Selected:
JESAYA 27: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
