JESAYA 25
25
Ende-enden pujin
1 TUHAN, Kam kap Dibatangku;
kupehaga Kam janah kupuji gelarNdu.
Enggo ilakokenNdu perbahanen si mbelin;
alu tutus enggo idalankenNdu,
kerina rencana-rencana si ibahanNdu nai-nai nari.
2Kuta-kuta enggo runtuh ibahanNdu;
janah bentengna irontaskenNdu.
Istana-istana si ipajekken imbang-imbang kami,
enggo masap seh rasa lalap.
3Rayat negeri-negeri si megegeh ipujina Kam,
i bas kuta-kuta si merawa, mbiar kalak ngenehen Kam.
4Kalak musil ras si la ergegeh enggo reh ku Kam,
e maka terkawal geluhna i bas paksa kepiceten.
IberekenNdu ingan cio tupung udan ras angin meter,
janah ingan cilinggem paksa las matawari.
Kalak merawa ngayak-ngayak desken angin kaba-kaba tupung perudan,
5desken las matawari marpari taneh kerah.
Tapi Kam TUHAN, enggo ipesinikNdu imbang-imbang kami
enggo isompelNdu babah kalak merawa,
bali ras embun mahanca mbergeh wari si ngisah.
Dibata nikapken kerja man-man
6I datas Deleng Sion enda isikapken TUHAN si Mada Kuasa kerja man-man guna kerina bangsa-bangsa i doni. I bas kerja e iidangkenNa pagi pangan si seh kal tabehna ras anggur si mehulina. 7I je iagui TUHAN embun ate ceda si gelgel nari ngelumlumi kerina bangsa-bangsa. 8Kematen imasapken TUHAN si Erdolat seh rasa lalap. IapusiNa iluh i bas mata kerina jelma nari, janah adi gelgel nari mela iakap bangsaNa i belang-belang doni enda, genduari masap ibahanNa kerina. TUHAN jine si ngatakenca. #1Kor 15:54 #Ket 7:17; 21:4
9Tupung e ikataken kalak me, “Enda me Dibatanta! Enggo kita ernalem man baNa, janah enggo ipulahiNa kita. IA kap TUHAN! Enggo kita ernalem man baNa. Janah genduari malem ateta, meriah siakap erkiteken ikeliniNa kita.”
Dibata ngukum Moap
10Ikawali TUHAN me pagi Deleng Sion, tapi kalak Moap iperjakiNa, desken nggala iperjaki i bas kubang asuh-asuhen. #Jes 15:1–16:14; Jer 48:1-47; Esek 25:8-11; Amos 2:1-3; Sep 2:8-11 11Aminna ipegesteng kalak e gia tanna desken kalak si erlangi, tapi ipeteruk Dibata nge ia, seh maka tanna e kote jenari gedap. 12Benteng-benteng Moap icedakenNa rikut ras tembok-tembokna si meganjang ibulakkenna seh ampar i babo taneh.
Currently Selected:
JESAYA 25: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
