Malk 13
13
Zezu atanda itsala dze ndaku ye Nzambi
(Mat 24.1-2; Luk 21.5-6)
1Ndili ye Zezu epula se ndaku ye Nzambi, umbingi wedzi nedzi ati: «Kuŋwu, waya! Memanya me betunga ndaku yi, me botee, ayi ni ndaku amene yineni!» 2Zezu akalule nedzi ati: «Ndili yetse ya, ye byesi bye beyi bikakise bi, byetse tsalive, nde imanya tine dzotu dzitse vʉka kule dzoko.»
Mitse banda ya ubusu ve misiyili mye ilongo
(Mat 24.3-14; Luk 21.7-19)
3Zezu untsitsi sɨna kudzi ye kumvu Olivye, busu ve ndaku ye Nzambi. Pyeli, Zaaki, Zan ne Andeli, basuŋwule nedzi ati: 4«Tanda besu, mamvu mamu metse ya ni ndili yowi? Ni ndimvu ye bitse yiba mitse ya niza?»
5Ye Zezu etanda ne bangu ati: «Dzayi ne utsengu, toko bakʉta beyi. 6Batu beyitsi betse ya ne kumvu yami ye bangu bitse tanda ati: “Me ni we Nzambi etobo!” Ndili ya kalwe, beyi nde binga bangu. 7Ndili ye beyi bitse yuka mebadzi bakaka ne misisile mye biwowe dze mebadzi me ulayi, beyi nde yene bongo, uve mamvu mamu maya, ni nde tse dze bisiyili bye tumba. 8Ilongo dzotu dzetse lwana ne ilongo dzoko, ne kani, atse lwana ne kani moko, senze yetse anyingene se melongo moko, yetse dze ne pinga. Yetse dze ni nda ŋwatu we isaba ne ŋwunyu ŋwe wika. 9Ni beyi, pikayi utsengu ne beyi mene. Batu betse bapa beyi busu ve bepami, betse damaka beyi se mendaku me umbondu. Betse bapa beyi busu ve mepatima ne bekani utsɨna nami, yayu beyi betse dze ni betotsi bami busu ve bangu. 10Ni uve babanda ne utandaka misisili mive se melongo mesi. 11Ndili ye bitse kwata beyi ne ubapa beyi busu ve bepami, beyi nde yene bayi ne me beyi bitse tanda, ni beyi betse tanda ni me bitse tanda beyi ndili yayu, beyi kaka bitse wowe, witse wowe ni Fudzu ye Umpende. 12Ŋwana mama atse sumbise moko ne ubuuma wangu ne tata atse pika ŋwana wedzi mene si vavu, baana betse wunda yali ye bangu, betse tanda ne ubuuma yali ye bangu. 13Batu besi betse wunda beyi utsɨna nami. Ni muutu witse tsɨla nzii ne dzangu dzitse siya awayu Nzambi atse lungise wangu.»
Batu betse yene membaba amene
(Mat 24.15-28; Luk 21.20-24)
14«Beyi betse yene umbiwisi we umbi amene wiluma batu ne ulewe ndaku ye Nzambi, wangu atse dze se buma ye bengani. Yayu muutu witangala mamvu mamu, uve wangu ayebise yuka mamvu medzi itangala mamu, yayu batu bitse dze se Zudee betse tanga kwele ye bikudzi. 15Muutu witse dze se melebe me ndaku nde tse nyidzile ne uboko yila se ndaku. 16Ne witse dze se kuba wangu nde tse tuka vʉtse mbuka ne utse boko ingoyi dzedzi. 17Avavu vʉsa vetse dze ni ubi ne baatu bitse dze ne mimi ne bitse nyangise baana mebele! 18Bondayi Nzambi, yayu mamvu mamu medze nde ya se ndili yibi. 19Ni, vʉsa vavu, batu betse yene membaba meyitsi, me muutu tine motu asande yene ne kala, ulave mebandu me senze, ndili ye Nzambi ewanga, nzii ne velolo, nde tse vele dze ne membaba nda mamu. 20Kuŋwu abiki dze nde kudzumise masi mamu, nde muutu we biki lunga. Ni wangu ekudzumise mangu ni utsɨna ne batu bedzi etobo ati beyikwe bedzi. 21Ti muutu atanda beyi ati: Mesiya adzi wa! Na wangu adzi wu, beyi nde mekidze. 22Ni be Kɨlisɨti be uŋdzuma ne Batu be Nzambi be uŋdzuma betse ya, bangu betse pika mamvu me likimiyinda ne me bimaka ne ukʉta batu, ti bangu batuka, ye bangu bikʉta ne Batu be Nzambi etobo. 23Ni beyi, pikayi utsengu ma banda tanda beyi mitse ya, mamvu mamu ne uya.»
We yikwene Muutu atse ya
(Mat 24.29-31; Luk 21.25-28)
24«Ni se masi mamu, batu betse yene membaba meyitsi, yumana vavu, musa ŋwetse yinda, ne sundzi nde tse vele kaba ukwalala. 25Myatsitsi myetse yinga ikulu mya naŋwe, bisinga bidzi ikulu byetse tsɨkite. 26Yayu betse yene we yikwene Muutu aya se lingutsu ne singa yedzi yesi ne likʉma ledzi lesi. 27Wangu atse luma betuma be Nzambi se mesungulu mesi menayi me senze ne ukukuse bedzi etobo, kwele ye senze ye banda nzii ne kwele ye senze ye sele.»
Ngana ye Figye
(Mat 24.32-35; Luk 21.29-33)
28«Yukayi ngana ye ŋwili ŋwe kumvu figye itanda. Ndili ye bitatsi bye tsaŋwe bimene ye kayi yedzi yimenze, ye beyi beyiba ati mvula akɨtse no. 29Dzangu dzotu, ndili ye beyi bitse yene mamvu mamu meya, uve beyi bayiba ati, we yikwene Muutu akɨtse ya, adzi umbele ŋwe ndaku. 30Me tanda beyi, ni umbu amene miti, ndili ye mamvu mamu mitse ya. Batu belolo ba besi nde tse waa. 31Ikulu ne senze byetse nyongo, ni mami iwowe nde tse tuka nyongo.»
Nde muutu we iyiba ndili ye Kuŋwu itse ya
(Mat 24.36-44)
32«Nde muutu we iyiba vʉsa ne ndili ye mamvu mamu mitse ya, ne betuma be Nzambi, nami we Ŋwana wedzi me nde yiba. We iyiba si Tata wangu mene. 33Pikayi utsengu beyi nde nanga bembula, ne beyi nde yiba ndili ye mamvu mamu mitse ya. 34Yetse dze ni nda muutu witse uŋdzunga, wangu ateme ndaku yedzi adzika ne bedzanzi bedzi. Wangu akaba muutu ne muutu dzedzi dzanza dze upika, yedzi itanda ne muutu we ibata umbele ati, we nde nanga bembula. 35Beyi nde nanga bembula, ne beyi nde yiba ndili ye kuŋwu we ndaku itse ya. Yetse dze toko ne ikolo, toko ne tima ye pinzi, na ndili ye susu we wika ilongo, na ne suka. 36Wangu ti aya palikɨse, wangu nde kobise beyi bedzi bembula. 37Mami itanda beyi ma, me tanda ne batu besi miti: Beyi badze mongo!»
Currently Selected:
Malk 13: WUM
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
