Popular Bible Verses from Malk 13

Share

Batu besi betse wunda beyi utsɨna nami. Ni muutu witse tsɨla nzii ne dzangu dzitse siya awayu Nzambi atse lungise wangu.»

Pikayi utsengu beyi nde nanga bembula, ne beyi nde yiba ndili ye mamvu mamu mitse ya.

Ndili ye bitse kwata beyi ne ubapa beyi busu ve bepami, beyi nde yene bayi ne me beyi bitse tanda, ni beyi betse tanda ni me bitse tanda beyi ndili yayu, beyi kaka bitse wowe, witse wowe ni Fudzu ye Umpende.

Ikulu ne senze byetse nyongo, ni mami iwowe nde tse tuka nyongo.»

«Nde muutu we iyiba vʉsa ne ndili ye mamvu mamu mitse ya, ne betuma be Nzambi, nami we Ŋwana wedzi me nde yiba. We iyiba si Tata wangu mene.

Ndili ye beyi bitse yuka mebadzi bakaka ne misisile mye biwowe dze mebadzi me ulayi, beyi nde yene bongo, uve mamvu mamu maya, ni nde tse dze bisiyili bye tumba.

Beyi nde nanga bembula, ne beyi nde yiba ndili ye kuŋwu we ndaku itse ya. Yetse dze toko ne ikolo, toko ne tima ye pinzi, na ndili ye susu we wika ilongo, na ne suka. Wangu ti aya palikɨse, wangu nde kobise beyi bedzi bembula. Mami itanda beyi ma, me tanda ne batu besi miti: Beyi badze mongo!»

Ilongo dzotu dzetse lwana ne ilongo dzoko, ne kani, atse lwana ne kani moko, senze yetse anyingene se melongo moko, yetse dze ne pinga. Yetse dze ni nda ŋwatu we isaba ne ŋwunyu ŋwe wika.

Ni uve babanda ne utandaka misisili mive se melongo mesi.

Batu beyitsi betse ya ne kumvu yami ye bangu bitse tanda ati: “Me ni we Nzambi etobo!” Ndili ya kalwe, beyi nde binga bangu.

Ni beyi, pikayi utsengu ne beyi mene. Batu betse bapa beyi busu ve bepami, betse damaka beyi se mendaku me umbondu. Betse bapa beyi busu ve mepatima ne bekani utsɨna nami, yayu beyi betse dze ni betotsi bami busu ve bangu.

Ni be Kɨlisɨti be uŋdzuma ne Batu be Nzambi be uŋdzuma betse ya, bangu betse pika mamvu me likimiyinda ne me bimaka ne ukʉta batu, ti bangu batuka, ye bangu bikʉta ne Batu be Nzambi etobo.

«Ni se masi mamu, batu betse yene membaba meyitsi, yumana vavu, musa ŋwetse yinda, ne sundzi nde tse vele kaba ukwalala. Myatsitsi myetse yinga ikulu mya naŋwe, bisinga bidzi ikulu byetse tsɨkite.