Malk 12
12
Ngana ye bebati be vinyi
(Mat 21.33-46; Luk 20.9-19)
1Yumana vavu, ye Zezu ewowe ne bangu ne milimvɨle ati: «Muutu motu akuna kuba ye vinyi, akuta lɨbakala, apika unsyeli ve melaku me leze, yedzi etunga ndaku ye ikulu se kuba, ye muutu we ibata kuba, ibita ne uwaya. Yumana vavu, yedzi edzika kuba ye vinyi ne bedzanzi, atse uŋdzunga. 2Ndili ye kuba ye vinyi ye yele, wangu aluma uŋdzanzi kwele ye bedzanzi be vinyi ne utse boko yedzi pesi ye vinyi. 3Ni bangu bakwata uŋdzanzi, babuuma luba, bavʉtise wangu meboko sanzile. 4Ye kuŋwu we kuba eluma uŋdzanzi moko, awayu bangu badamaka wangu kule mulu batukene wangu. 5Kuŋwu we kuba avele luma uŋdzanzi we unsatu bangu babuuma ne wayu. Kuŋwu avele luma boko bedzanzi beyitsi, bangu babuumaka ne babu meluba, babuumaka ne boko. 6Muutu we vʉka ne kuŋwu we kuba si ŋwana wedzi we unlima. Wangu aluma ŋwana wedzi limbisa kwele ye bedzanzi be kuba, ni wangu eyiba nati bangu betse kuuna ŋwana wedzi. 7Ni bedzanzi be kuba bawowe tima ye bangu ati: “Yene witse vʉka ne wanda ye kuba ye vinyi! Yakayi bebuuma wangu, yayu kuba ye vinyi ye yikwe ye bebe!” 8Ye bangu bekwata ŋwana we kuŋwu we kuba ye vinyi, ye bangu bebuuma wangu bayisa tsinzi yedzi mbisa ye kuba ye vinyi.»
9Ye Zezu esuŋwule ati: «Ye kuŋwu we kuba we vinyi itse pika niyi? Wangu atse ya, atse buumaka bedzanzi be kuba ye vinyi, yedzi itse kaba kuba ne batu boko. 10Beyi besande tangala iwowe dzi se Bisanguvu bye Umpende ati:
“Imanya dze betungi be mendaku belewe
dza yikwe imanya dzi suka ndaku.
11Kuŋwu ni we mepika vavu,
dzedzi ni dzamvu dzive se mɨsa me bebe!”»
12Bekuŋwu be Bezwifi bedze ne ufumba nda bangu bikwata Zezu ne bangu beyiba ati wangu etanda ngana yayu ni utsɨna ne bangu. Ni bangu bedze ne bongo ve batu, ye bangu bedzika Zezu bangu batse.
Lipo le biwuta Sezali
(Mat 22.15-22; Luk 20.20-26)
13Bekuŋwu be Bezwifi baluma Zezu batu be Falizi ne batu be yimvu ye Elodi. Bangu befumba ni uwowuse Zezu ne udendise wangu unlamvu. 14Ye bangu bekaba wangu uŋdzutsi ati: «Kuŋwu, besu beyiba ati mowe itanda ne mowe ilakɨse medzi ni telee. We nde pama ne mengalu me batu, ni we lakɨse ni mamvu me umbu amene me Nzambi itanda batu ne upika. Tanda besu, se bitsɨla bye bebe bye luma bebe ne uwuta lipo le Sezali? Besu bewuta na nde wuta?» 15Ni Zezu ayiba umpyeli ŋwe bangu yedzi etanda ne bangu ati: «Ye beyi bifumba dendise me unlamvu niyi? Lakayi me dolo.» 16Bangu baya wangu ne dolo, ye Zezu esuŋwule ne bangu ati: «Panza yi ne kumvu yidzi kule dolo yu yangu ni yeza?» Bangu bakalule nedzi ati: «Ye Sezali». 17Ye Zezu etanda ne bangu ati: «kabayi Sezali bye Sezali ne bye Nzambi ne Nzambi.» Bangu besi bakima nda Zezu ekalule bangu.
Batu bewaa betse nyuse?
(Mat 22.23-33; Luk 20.27-40)
18Va batu be yimvu ye kumvu Sadusi baya kone ne Zezu. Bangu ni be nde yakwe ati, bewaa betse nyuse. Bangu basuŋwule ne Zezu ati: 19«Kuŋwu, yene me Moyizi etende besu ati: “Muutu ti awaa adzika ŋwadzi wedzi nde baana, ye ŋwanzi we unlumi ibala uŋkwili ne udziya uŋkulu wedzi wawaa baana.” 20Ni yedze ne baana be mama motu uŋtsami be mebaka. We wika abalive, awaa eke dziya baana. 21We unyole abala uŋkwili, nedzi awaa nde dzika baana. Ne we unsatu si vavu, 22bangu besi uŋtsami bekwele ŋwatu mene, tine motu eke dziya. Yumana bangu besi bawaa, ne ŋwadzi se awaa. 23Ndili ye batu bewaa bitse nyuse, wangu atse dze ni ŋwadzi weza? Ne bangu besi uŋtsami bedze ni belumi bedzi.» 24Zezu akalule ne bangu ati: «Yene utsɨna ve beyi benyongo, beyi nde yiba Bisanguvu bye Umpende ne beyi nde yiba singa ye Nzambi. 25Ndili ye batu bewaa bitse nyuse, baatu ne mebaka nde tse balive ne boko, ni bangu betse dze ni nda betuma be Nzambi bidzi ikulu. 26Ne dze batu bewaa ne bitse nyuse se lɨku, beyi besande tangala se sanguvu ye Moyizi buma ye Nzambi ewowe nedzi kone kaaka ye ŋwunya? Betanda ati, Nzambi atanda ne Moyizi ati: “Me ni Nzambi we Ablaami, we Izaaki ne we Zaakobi.” 27Nzambi adzi ni we batu bemongo, kaka we batu bawaa. Beyi betapa ni kata tapa amene.»
Tsɨla yi takwe bitsɨla byesi
(Mat 22.34-40; Luk 10.25-28)
28Ndili ye unlakɨsi we bitsɨla motu eyuka bangu bewowe. Yedzi eyene ati, Zezu eyiba kalule ne batu be yimvu ye Sadusi, atsindene kone Zezu asuŋwule nedzi ati: «Tsɨla yi takwe bitsɨla byesi ni yowi?» 29Zezu akalule nedzi ati: «Yene tsɨla yi takwe bitsɨla byesi: “Yuka, Izayeli, Kuŋwu, Nzambi we bebe, wangu ni Kuŋwu, nde Kuŋwu moko. 30Uve wa tondo Kuŋwu wowe Nzambi ne unlima ŋwowe ŋwesi, ne nyulu yowe yesi, ne metsimini mowe mesi ne singa yowe yesi.” 31Yene tsɨla ye unyole: “Uve wa tondo moko nowe nda we itondo we mene.” Nde tsɨla yi takwe bitsɨla bye byole bi.» 32Unlakɨsi we bitsɨla mene atanda ne Zezu ati: «Ee Kuŋwu! We metanda wawu si telee, Mowe metanda ni umbu. Kuŋwu ni Nzambi, nde Nzambi moko mbisa yedzi. 33Uve bebe batondo Nzambi ne unlima ŋwe bebe ŋwesi, ne metsimini me bebe mesi, ne singa ye bebe yesi, uve bebe batondo boko nda bebe bitondo menyulu me bebe. Avavu ya takwe bisemi bye benyama bye bikaba Nzambi, ne bisemi byoko bye bikaba wangu.» 34Zezu ayene ati wangu akalule ne utsengu vesi, yedzi etanda nedzi ati: «We nde ulayi ne Ukani ve Nzambi.» Bemana vavu, nde muutu we vele kaba wangu midzutsi.
Kɨlisɨti ne Davidi
(Mat 22.41-46; Luk 20.41-44)
35Ye Zezu edze ne ulakɨse se ndaku ye Nzambi, Zezu akaba uŋdzutsi ati: «Belakɨsi be bitsɨla betanda ati Kɨlisɨti ni ŋwana we Davidi. Ni bangu betanda vavu ni neyi? 36Davidi wangu mene, ne singa ye Fudzu ye Umpende atanda nedzi mene ati:
“Kuŋwu Nzambi atanda ne kuŋwu wami ati,
Yaka sunda untsitsi kwele ye boko yami ye sangwe,
Me tse somo biwunda we sɨna mekulu mowe.”
37Davidi wangu mene abanga Mesiya ni “Kuŋwu”: ni Kɨlisɨti atuka dze we imbisa dze Davidi nivi?»
Zezu atsengumɨse batu kule belakɨsi be bitsɨla
(Mat 23.1-36; Luk 20.45-47)
Uŋkuka uneni ŋwedze ne uyuka Zezu ne uve vesi. 38Yene me Zezu elakɨse batu besi, Zezu ne bangu ati: «Pikayi utsengu ne belakɨsi be bitsɨla bitondo dzunga ne mengoyi meneni, bitondo nda binyusɨle bangu ne uŋkuuna ŋwesi se bibuma bye mikuka, 39Bangu betobo bibuma bye libusu se mendaku me umbondu ne bibuma bye libusu se metsɨnda. 40Bangu beboko mikwili byesi bye bangu bidzi ne byangu, yumana ye bangu bipika mibondu milayi ati, beyene bangu uve. Utsɨna ne vavu, umpami ŋwe Nzambi kule bangu ŋwetse takwe ŋwe boko besi.»
Uŋkwili ŋwe umvuvu
(Luk 21.1-4)
41Ye Zezu esunda untsitsi busu ve buma ye bikaba bisemi bye Nzambi, yedzi edze ne uwaya nda batu bedze ne usomo bedolo. Batu beyitsi bidzi ne Untamvu ni bedze ne ukaba bedolo beyitsi. 42Ŋwatu we uŋkwili we umvuvu yu aya somo bepɨtisi bole be nde usika. 43Ye Zezu ebanga bebingi bedzi atanda ne bangu ati: «Me tanda beyi, ni umbu amene, ŋwatu we uŋkwili we umvuvu yu bedolo bedzi me kaba batakwe be batu besi. 44Ni batu besi beme kaba ni bedolo betsalala, ni wangu se umvuvu ŋwedzi akaba bedolo besi, bedzi biki dza bila ne bangu.»
Currently Selected:
Malk 12: WUM
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
