Malk 14
14
Bekuŋwu be Bezwifi bafumba ne ubuuma Zezu
(Mat 26.1-5; Luk 22.1-2; Zan 11.45-53)
1Se masi mole, bepika itsɨnda dze Paki ne dze pembe ye nde yila yi landise yangu. Bekuŋwu be bekabi be bisemi bye Nzambi ne belakɨsi be bitsɨla bedze ne ufumba nda bangu bikwata Zezu isole ne ubuuma wangu. 2Ye bangu bedze ne utanda ati: «Bebe nde tuka kwata wangu vʉsa ve itsɨnda, toko batu batelime ne dzutsi.»
Ŋwatu motu asuwaka unyombo kule mulu ŋwe Zezu
(Mat 26.6-13; Zan 12.1-8)
3Ndili ye Zezu edze Betani, se ndaku ye Simo muutu widzi ne fima, yedzi edze ne udza bila. Ŋwatu motu anyidzile se ndaku ne mbasi ye unyombo ŋwedzi esumba ne mvunu yineni, ŋwe bepika ne yila ye kumvu nale tselele. Ŋwatu mene abula mbasi, asuwa unyombo kule mulu ŋwe Zezu. 4Batu boko bedze wayu bayene ubi ye bangu bewowe tima ye bangu ati: «Wangu ayabaka unyombo tuu, ni neyi? 5Betuka sumbise unyombo ŋwu ne meku me bepɨtisi mesatu ne ukaba be mimvuvu!» Ye bangu bedze ne upanda ŋwatu mene. 6Ye Zezu etanda ne bangu ati: «Dzikayi wangu too. Ye beyi binyokile wangu niyi? Dzamvu dzedzi me pika kule yami dzedzi ni dzamvu dzive. 7Batu be mimvuvu betse dze si kone beyi. Mendili mesi me beyi bitse tondo, beyi betse tuka pika bangu mamvu meve, ni me, me nde tse dze kone beyi umbu ne umbu. 8Ŋwatu yu ame pika ni medzi me tuka pika. Wangu abanda ne usuwaka unyombo kule nyulu yami, ne uyebise yangu ne utse se mesongo. 9Me tanda beyi, ni umbu amene, bibuma byesi bye bitse tandaka misisili mive, se senze yesi, betse tanda me ŋwatu yu me pika ye bitse yivɨle wangu.»
Zuda amekidze ne usumbise Zezu
(Mat 26.14-16; Luk 22.3-6)
10Zuda Isɨkalyoti, wedze tima ye betuma iku ne bole be Zezu, atse yene bekuŋwu be bekabi be bisemi bye Nzambi. Wangu afumba sumbise bangu Zezu. 11Bekuŋwu batsisa ne me bangu beyuka ye bangu bedzika Zuda ndaka ye ukaba wangu bedolo. Ye Zuda efumba ndili yimve yedzi isumbise bangu Zezu.
Zezu adze bila bye Paki bane bebingi bedzi
(Mat 26.17-25; Luk 22.7-14,21-23; Zan 13.21-30)
12Vʉsa ve wika ve itsɨnda dze pembe ye nde yila yi landise pembe dze kumvu Paki, vʉsa ve bibuuma bindomvene ne ulamba bila bye itsɨnda dzadzu. Bebingi be Zezu basuŋwule ne Zezu ati: «Besu belamba we bila bye Paki niwi?» 13Ye Zezu eluma bebingi bedzi bole ati: «Tsekayi se ngundu, beyi bekwanyele ne muutu abapa mbungu ye mangu, bingayi wangu. 14Wangu anyidzilele se ndaku, yayu beyi betanda ne kuŋwu we ndaku yayu ati: “Kuŋwu asuŋwule we ati, liyi ye ndaku yami idzele bila bye itsɨnda dze Paki, besu ne bebingi bami ni yowi?” 15Yedzi ilakele beyi, liyi ye ndaku yineni yidzi ikulu ye bamana yebise, ne bineni byesi. Ayayu ni buma ye beyi bilambele bila bye itsɨnda.» 16Bebingi be Zezu batse badzanga se ngundu, bangu bakobise mesi nda Zezu etanda bangu, ne bangu balamba bila bye itsɨnda dze Paki.
17Ne ikolo, Zezu aya bane bebingi bedzi iku ne bole. 18Ndili ye bangu bedze ne udza bila, Zezu atanda ne bangu ati: «Me tanda beyi, ni umbu amene. Muutu motu tima ye beyi, widzi ne udza bila besu nedzi, atse sumbise me.» 19Bebingi badze zunzulu, ye bangu besuŋwule ne Zezu muutu motu motu ati: «Yedzi ni me?» 20Zezu akalule ne bangu ati: «Muutu motu tima ye beyi, se betuma iku ne bole, muutu widza besu nedzi se pele yotu. 21We yikwene Muutu atse waa nda betende se Bisanguvu bye Umpende. Ayi ndoko ne muutu witse sumbise we yikwene Muutu! Muutu wayu tadzi beke dziya wangu.»
Bila bye Kuŋwu
(Mat 26.26-30; Luk 22.14-20; 1 Kol 11.23-25)
22Ndili ye udza, Zezu aboko lipembe, amana vʉtise Nzambi live, atsɨtaka lipembe akabaka bebingi bedzi, Zezu atanda ne bangu ati: «Bokayi, ayi ni nyulu yami.» 23Yumana, Zezu aboko kopi ye melaku, amana vʉtise Nzambi live, akaba bebingi bedzi kopi ye melaku, ye bangu besi benoto. 24Zezu atanda ne bangu ati: «Ayi ni unsu ŋwami, unsu ŋwe umbatsi ve Nzambi, ŋwe tanga utsɨna ne batu beyitsi. 25Me tanda beyi, ni umbu amene, me nde tse vele noto melaku nzii ne vʉsa vami itse noto melaku me tsaŋwe se Ukani ve Nzambi.» 26Ye bangu beyakwe mimvu me itsɨnda dze Paki, midzi se sanguvu ye mimvu, ye bangu betse kule kudzi ye mili mye bibanga Olivye.
Zezu atanda nda Pyeli itse luna wangu
(Mat 26.31-35; Luk 22.31-34; Zan 13.36-38)
27Zezu atanda ne bangu ati: «Beyi besi betse dzika me mene, yayu betangala se Bisanguvu bye Umpende ati: “Me tse buuma umbati we bindomvene, ye bindomvene bitse tsalive me kwele mesi.”» 28Zezu avele tanda ati: «Ndili yami itse nyuse se lɨku, me tse buka beyi Ngalilee.» 29Pyeli atanda nedzi ati: «Dzakene boko besi badzika we we mene, me nde tse tuka dzika we.» 30Ye Zezu ekalule nedzi ati: «Me tanda we, ni umbu amene, miti velolo, pinzi yi, sangwe we susu ne ubanda longo bidzuku byole, we tandele bidzuku bisatu witi we nde yiba me.» 31Ni Pyeli avele tanda ne singa ati: «Me nde tse tuka tanda miti, me nde yiba we, dzakene ti ma waa benu.» Ne bebingi boko batanda dzamvu mene dzotu.
Bakwata Zezu Zetsemani
(Mat 26.36-46; Luk 22.39-46)
32Yumana, bangu batse se buma ye kumvu Zetsemani, ye Zezu etanda ne bebingi bedzi ati: «Sundayi untsitsi wa, ndili yami itse bondo.» 33Yedzi eboko Pyeli, Zaaki ne Zan. Yedzi ebanda ne uyene bongo ne bayi yesi, 34yedzi etanda ne bangu ati: «Unlima ŋwami ŋwedzi se bayi, nami iyene miti, ma kitse waa. Dzayi wa, beyi nde nanga bembula.» 35Yedzi elanda va ite, alekise nyulu anaŋwe sɨna ne ubondo Nzambi ati, Nzambi ti atondo, alawuse mendili me membaba ma nami. 36Yedzi etanda ati: «Aba, Aa Tata wami, we nde wata dzamvu tine dzotu. Ti wa tondo lawuse me mebamba mami inotele nda binoto mangu. Ni we nde pika nda me itondo, ni pika nda we itondo.» 37Ye Zezu eye vʉtse kwele ye bebingi bedzi besatu akobise bangu bedzi bembula. Yedzi etanda ne Pyeli ati: «Simo wa nanga bembula? We nde tuka dze mongo dzakene ndili tine mbotu? 38Beyi nde nanga bembula bondayi, ne ubomo singa ndili ye Sata imaama beyi. Beyi befumba pika mamvu meve, ni beyi nde singa ye udze nde pika mamvu mebi.»
39Zezu avele lawe, yedzi evele pika umbondu mene wangu ŋwotu. 40Yedzi evʉtse kone bebingi bedzi wangu akobise bangu bembula, bangu nde tuka bata mɨsa me bangu wususu. Bangu nde yiba me bangu bituka tanda wangu. 41Ndili yedzi evʉtse dzuku ye unsatu, Zezu atanda ne bangu ati: «Beyi basaka ni bembula ye beyi bidzunda? Dzasiya! Ndili ya dzanga! we yikwene Muutu besumbisele wangu se meboko me batu bidzi ne mesumu. 42Telimayi, yakayi betse, yenayi, muutu we isumbise me ne bangu aya!»
Bakwata Zezu
(Mat 26.47-56; Luk 22.47-53; Zan 18.3-12)
43Ndili mene mbotu, ye Zezu etanda vavu, Zuda wedze tima ye betuma iku ne bole, aya ne uŋkuka ŋwe batu ne bitswaki, ne bipanda. Beluma bangu ni bekuŋwu be bekabi be bisemi bye Nzambi ne belakɨsi be bitsɨla bye Nzambi, ne bibutu Bezwifi. 44Zuda wedze ne usumbise bangu Zezu, amana tanda ne bangu ndimvu yedzi ipikele. Yedzi etanda ne bangu ati: «Muutu wami ikapitele, ni wangu, kwatayi wangu, bapayi wangu beyi bebata wangu uve.» 45Ye Zuda edzanga, wangu atsindene kone Zezu yedzi etanda nedzi ati: «Kuŋwu!» Yedzi ikapite wangu. 46Ye batu bekwata Zezu ne utse nedzi. 47Ni umbingi we Zezu motu apusa pusezulu, adama uŋdzanzi motu we kuŋwu we uneni we bekabi be bisemi bye Nzambi atsɨta wangu iluyi. 48Zezu atanda ne bangu ati: «Beyi beya boko me ne bepusezulu ne bipanda nda biya kwata umpɨta? 49Masi mesi medze kone beyi se ndaku ye Nzambi ma lakɨse, beyi beke kwata me. Ni mamvu ma meya ne ulaka me betende.» 50Ye bebingi besi betanga badzika Zezu wangu mene. 51Ŋwana we ibaka motu edze ne ubinga Zezu, aswa lembe. Bawasa kwata nedzi, 52ni ŋwana we ibaka mene ayisa lembe atanga untaba.
Zezu busu ve bepami be Bezwifi
(Mat 26.57-68; Luk 22.54-55,63-71; Zan 18.13-14,19-24)
53Bangu babapa Zezu pesi ye kuŋwu we uneni we bekabi be bisemi bye Nzambi. Awawu bekuŋwu besi be bekabi be bisemi bye Nzambi ne bibutu ne belakɨsi be bitsɨla bakukene. 54Pyeli abinga Zezu ne ulayi anyidzile se lipangu le ndaku ye kuŋwu we uneni we bekabi be bisemi bye Nzambi. Awawu, wangu asunda untsitsi bane bedzanzi, bangu bedze ne unyolo ŋwunya.
55Bekuŋwu be bekabi be bisemi bye Nzambi ne yimvu ye bepami ye Bezwifi befumba dzamvu dze bangu bipama ne ubuuma Zezu, ni bangu nde yene. 56Batu beyitsi, bedze ne utanda mamvu me uŋdzuma kule Zezu, ni bangu beke dze dzamvu dzotu. 57Va batu boko batelime ne upɨta Zezu mamvu me uŋdzuma ati: 58«Besu beme yuka wangu awowe ati: “Me tse tsala ndaku ye Nzambi yi, ye batu betunga ne meboko me bangu, yayu se masi mesatu me tse tunga mboko ye batu beke tunga ne meboko me bangu.”» 59Ni dzakene se dzamvu dzadzu, bangu beke mekidze me boko bedze ne utanda. 60Ye Unkabi we uneni we bisemi bye Nzambi etelime se uŋkuka asuŋwule ne Zezu ati: «We nde kalule ne me bitanda kule yowe ma?» 61Ni Zezu aloŋwe, eke kalule. Uŋkabi we bisemi bye Nzambi avele suŋwule wangu ati: «We ni Mesiya, Ŋwana we Nzambi we besu bikʉmise?» 62Zezu akalule ati: «Ee, me ni Ŋwana we Nzambi, beyi betse yene me untsitsi kwele ye boko ye sangwe ye Nzambi we kate singa, beyi betse yene wangu aya tima lingutsu ikulu.» 63Ye uŋkabi we uneni we bisemi bye Nzambi enyasule mikanda, yedzi etanda ati: «Bebe baya nde dzamvu ne betotsi! 64Beyi bayuka itutsi dzedzi me tukene Nzambi. Beyi bati yi?» Batu besi bakwise Zezu uŋkwaka ati uve wangu awaa. 65Batu boko batsutsule Zezu meteyi, ye bangu bedzuba wangu panza, bandamaka wangu bekutupa ye bangu besuŋwule nedzi ati: «Ke tanda, we me damaka we niza?» Ye bedzanzi beboko Zezu badamaka wangu membataka.
Pyeli aluna Zezu
(Mat 26.69-75; Luk 22.56-62; Zan 18.15-18,25-27)
66Pyeli edze asaka sɨna se lipangu, ndili ye uŋdzanzi motu we ŋwatu we uŋkabi we uneni we bisemi bye Nzambi eya. 67Wangu ayene Pyeli anyole ŋwunya, awaya wangu too atanda nedzi ati: «Nowe se, wedze bene Zezu we Nazaleti.» 68Ni wangu aluna atanda ati: «Me nde yiba mowe ifumba tanda, me nde yuka.» Yedzi eteme se lipangu atse umbele.Ye sangwe we susu eloongo. 69Ni uŋdzanzi we ŋwatu ayene Pyeli avele tanda busu ve batu bedze wayu ati: «Muutu yu ni umbingi wedzi!» 70Ni ye Pyeli evele atanda ati: «Nyee uŋdzuma!» Nde ne nyuŋwe, bedze wayu bavele tanda ne Pyeli ati: «Umbu amene nowe ni umbingi wedzi, nowe ni muutu we Ngalilee.» 71Ye Pyeli ewowe yanga yanga ati: «Ti ma tanda me udzuma Nzambi abuuma me! Me nde yiba muutu we beyi bitanda wayu.» 72Ndili mene mbotu wayu, sangwe we susu aloongo dzuku ye unyole. Ye Pyeli eyivɨle me Zezu etanda wangu ati: «Susu ne uloongo bidzuku byole, we tse luna me bidzuku bisatu witi we nde yiba me.» Ye Pyeli elila.
Currently Selected:
Malk 14: WUM
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
