Rôma 8
8
1Sambô vèṉo e zel’ôgara gôre waô wi re gôre Yesu‐Krist.
2Konde ivanga ny’Iṉiṉa ny’em̃èṉo gôre Yesu‐Krist nyi re myè panga pa yangayanga avila gw’ivanga ny’ibe na ny’ijuwa. 3Konde ôsam̃u wi re w’ayolyô n’ivanga konde ny’avegagi dèla n’ôzôṉe, Anyambyè alwaṉiz’ibe ôgara g’ôzôṉe, g’ômwanja w’ibe, arôm̃i Ômwaṉi wèmè n’egolaṉi z’ôzôṉe w’ibe, 4ko ôgôre w’ivanga dendô gôre zwè yi dwaṉa ga nt’ar’iṉiṉa, ndô aranga ga nt’ar’ôzôṉe.
5Konde waô wi dwaṉa ga nt’ar’ôzôṉe wi nak’isam̃u y’ôzôṉe; ndô waô wi dwaṉa ga nt’ar’Iṉiṉa wi nak’isam̃u y’iṉiṉa. 6Ni nakiṉi y’ôzôṉe yô n’ijuwa, ndô nakiṉi y’Iṉiṉa yô n’em̃èṉo n’am̃ènjè; 7konde nakiṉi y’ôzôṉe yi re ndôṽa gôr’Anyambyè, konde yi pa jogiṉô ivanga ny’Anyambyè, ge jolye jogiṉô nyô kè. 8Yeṉo waô wi dwaṉa ga nt’ar’ôzôṉe w’ayolye tondy’Anyambyè.
9Ndô aṉwè, aṉwè pa dwaṉa ga nt’ar’ôzôṉe, ndô ga nt’ar’Iṉiṉa, mpag’Iṉiṉa ny’Anyambyè ny’adwaṉa gôre ṉwè. Ndô jog’ôm’edu e ze n’Iṉiṉa nyi Krist, ayè arang’ômi wè. 10Na ja Krist adwaṉa gôre ṉwè, ôkuṽa rèti wi re juwa pa g’ômwanja w’ibe; ndô iṉiṉa nyi dwaṉa bo g’ômwanja w’ôgôre. 11Na j’Iṉiṉa ny’ôma w’arôngunyi Yesu avila gw’ijuwa ny’adwaṉa gôre ṉwè, ayè y’arôngunyi Krist avila gw’ijuwa e be dwaṉiz’ikuṽi yaṉi yi juwe njuwaga bo kè n’Iṉiṉi nyè nyi dwaṉa gôre ṉwè.
12Yeṉo, awarera, azw’arang’iṉwaṉisi y’ôzôṉe, gô dwaṉa ga nt’ar’ôzôṉe. 13J’aṉw’adwaṉa ga nt’ar’ôzôṉe, aṉwè be juwa; ndô j’aṉw’ajôṉ’ijanja s’ôkuṽa v’Iṉiṉa, gambèṉè aṉwè be dwaṉa bo, 14konde waôdu wi kèndyô n’Iṉiṉa ny’Anyambyè, waô awaṉa w’Anyambyè. 15N’aṉwè pa pô iṉiṉa nyi panga ṉwè asaka gô tô tya; ndô aṉw’are pô p’iṉiṉa nyi panga ṉwè awaṉa, ko nyô panga zwè gô tônga inè, Aba! Rera! 16Iṉiṉa nyômè nyi takilya mpo mô n’irèm̃i yazô, inè, azwè awaṉa w’Anyambyè. 17Na j’azw’awaṉa, gambèṉè azwè kè iyigisi, iyigisi y’Anyambyè n’iyigisi ta ni Krist, mpag’azw’asindiṉa na yè, ko zwè pendyô kè na yè.
18Mi tanga nè, injuke s’egômbe za tè ziṉo s’ayolye kèṉizô n’ônjèlènjèlè wi bya wi be tum̃inyô gôre zwè. 19Konde ijônguṉ’ipôlô s’eliṽa zôdu si pengiṉ’ibôm̃unya s’awaṉa w’Anyambyè. 20Konde eliṽa z’arugizô gô yom̃a y’enyale, aranga nè z’ayiviri, ndô g’ômwanja w’ôma w’arugizi zô, 21n’igum̃u nè, eliṽa zômè zi be tômbô avila gw’itugizô s’ifweva gô dwaṉa yangayanga g’ônjèlènjèlè w’awaṉa w’Anyambyè. 22Konde azw’avôrô, inè, eliṽa zôdu zi sim̃iṉa azuṉ’izongo y’ijaṉa kwanga gw’egômbe ziṉo. 23N’aranga zô dadyè, ndô azwè kè, yi re n’ilônd’ilônga y’Iṉiṉa, azwè sim̃iṉa gw’ikuṽi yazô, mpengiṉag’inyanga ny’awaṉa, inè, ôlanduṉô w’ikuṽi yazô. 24Konde azwè sungiṉô gw’igum̃u. Ndô igum̃u nyi jeṉô, arang’igum̃u: mande e dôṽiṉ’ezom̃a zi jeṉô yè igum̃u? 25Ndô j’azw’adôṽiṉ’ezom̃a igum̃u zi re zwè pa jeṉa, gambèṉè azw’abônda zô n’isindiṉa.
26Yeṉo kè Iṉiṉa nyi nunguṉa zwè gô ndèliṉi yazô, konde azwè pa mya ezom̃a zi re zwè gô bambya gw’inkolo sazô ga nt’are kwèkwè. Ndô Iṉiṉa nyômè nyi kwen’inkolo g’ômwanji wazô n’isim̃iṉa si re s’ayolye kambô; 27n’ayè yi kèlagèl’irèm̃a avôrô nt’are mpinkilyi y’Iṉiṉa, konde nyi kambiṉa g’ômwanja w’iyombwi ga nt’are ntondiṉi y’Anyambyè.
28Azw’avôrô kè inè, isam̃u yôdu yi janja ta gô mbya gôre waô wi tond’Anyambyè, waô wi re fweyô pa ga nt’are nkenjiṉi yè. 29Konde waô w’aliwô myenyô yè, waô kè w’alôṽyô yè, egômbe ṽyagaga ro, gô dwaṉa n’egolaṉi z’Ômwaṉi wè, ko Ômwaṉi wè dwaṉe njalyè gôr’awarerè awenge. 30Na waô w’alôṽyô yè, waô kè w’aweyô yè; na waô w’aweyô yè, waô kè w’alwaṉizô yè agôre; na waô w’alwaṉizô yè agôre, waô kè w’avendizyô yè.
31Sambô azwè be bulya sè g’ômwanja w’isam̃u yiṉo?
J’Anyambyè adwaṉa g’ôzambi wazô, mande be sira zwè? 32Ayè yi re e pa simbya Ômwaṉi wèmè, ndô aveṉi yè g’ômwanji wazô azwèdu, ave zwè kè isam̃u yôdu na yè? 33Mande be sozize mongi pinjô w’Anyambyè? Ne Anyambyè yi dwaṉiza waô agôre! 34Mande e be pa waô ôgara? Ne Krist y’ayuwi; na vyagaṉô kè arôngunyô, are g’ôg’ôṉôm̃yè w’Anyambyè, n’ayè e kambiṉa g’ômwanji wazô. 35Mande be bangunya zwè avila gw’itonda si Krist, injuke, mbè azingô, mbè ikombizô, mbè njaṉa, mbè ôtele, mbè ererya, mbè ôkwara? 36ga nt’are tèndô pa, inè: Azwè jôṉô g’ômwanji wo egômbe zôdu; azwè pônô g’adombè mi bazô. 37Ndô gw’isam̃u yiṉo yôdu azw’ar’igevisi, na vyagaṉô, vo yè y’arondi zwè. 38Konde my’avôrô mbyambye inè, arang’ijuwa, g’em̃èṉo, ge iyenjèl, ge ampenda, ge isam̃u ya tè, ge isam̃u yi bya, ge anyanga, 39ge idôndwa, ge ôronga, g’ezom̃’edu ezèṉè z’avangyô ko jolye bangunya zwè avila gw’itonda s’Anyambyè si re tum̃inyô pa gôre Yesu‐Krist, y’Ôvangiṉi wazô.
Currently Selected:
Rôma 8: MYE
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society in 1927.
