Rôma 7
7
1Awarera, aṉwè pa mya, (konde mi kamba gôr’aṉaga wi my’ivanga) inè, ivanga nyi re ni ngulu gôr’ôma ôlingô wi re yè bo? 2Yeṉo, ômwantô are jômbô pa are kôrô pa n’ivanga gôr’ôṉôm̃u wè gô p’are yè bo; ndô j’ôṉôm̃e ajuwa, gambèṉè ômwantô apurunyô avila gw’ivanga ny’agôri yè gôr’ôṉôm̃u wè. 3Sambô, j’ajômb’ôṉôm̃’ômwèṉè, gô p’ar’ôṉôm̃u wè bo, e be fweyô inè, evôvevôve; ndô j’ôṉôm̃e ajuwa, gambèṉè atweṉi yangayanga avila gw’ivanga, e zel’evôvevôve nyèṉè, vang’ajômb’ôṉôm̃’ômwèṉè. 4Yeṉo, awareri yam̃, aṉw’avegagi juwa pa g’ôzamba w’ivanga n’ôkuṽa wi Krist, ko ṉwè dwaṉa gôr’ôm’ômwèṉè, gôre yè y’arôngwi avila gw’ijuwa, ko zwè jaṉ’ilônda gôr’Anyambyè. 5Konde, gw’avegagi zwè g’ôzôṉe inaka s’ibe s’agôṽyo n’ivanga, s’ayanji gô ṉam̃i yazô, ko zwè jaṉ’ilônda gw’ijuwa. 6Ndô vèṉo, azwè juwa pa gw’ivanga mènyoṉo ny’agôti zwè ngwasi, azw’are puruṉô pa avila gw’ivanga; yeṉo azwè janjiṉ’Anyambyè ni njanjiṉi nyoṉa y’iṉiṉa, aranga ni njanjiṉi nungu y’ôrèndo.
7Sambô azwè be bulya sè? Ivanga n’ibe? Alwaṉe yeṉo! Ndô mi pa tô my’ibe kaô n’ivanga. Konde mi pa tô my’itongiṉa, arang’ivanga bulya nè, arongiṉa. 8Ndô ibe, s’agôṽi dèngi mbôra, ayanja g’ôkuṽi wam̃ itongiṉa sôdu n’ivanga; konde ivanga fo ibe si re juwa pa. 9Gw’avegagi myè egômb’elônga ivanga fo, my’alwaṉi bo; ndô gw’aṽyeṉ’ôzômbyô, ibe s’arôli n’ayuwi myè. 10N’ôzômbyô wi kèndya gw’em̃èṉo, w’alwaṉi gôre myè gô kèndya gw’ijuwa. 11Konde ibe s’agôṽi dèngi mbôra n’ôzômbyô, aremiza myè, ayôṉa myè n’ôzômbyô mèwoṉo. 12Sambô ivanga nyi re nkèrè, n’ôzômbyô wi re nkèrè, n’ôgôre, n’ômbya. 13Sambô ezom̃a zi r’eṽya z’atweṉ’ijuwa gôre myè? Alwaṉe yeṉo! Ndô ibe s’atweṉ’ijuwa gôre myè, ko sô tum̃inyô inè, si r’ibe, konde si panga myè juwa v’ezom̃a zi r’eṽya, ko ibe tw’ôgara vyagaṉô v’ôzômbyô.
14Konde azw’avôrô inè, ivanga nyi re swaswo n’Iṉiṉa; ndô my’are gô mpangiṉi y’ôzôṉe, kôlô pa gw’ibe. 15Konde mi pa my’ôsam̃u wi janjô myè: ôsam̃u wi belô myè, mi pa denda wô; ndô ôsam̃u wi bikô myè, wô denda myè. 16Ndô ja my’adend’ôsam̃u wi re myè pa bela, gambèṉè mi jivira nè, ivanga nyi r’iṽya. 17Ndô vèṉo aranga myè yi dend’ôsam̃u, ndô ibe si dwaṉa gô gare ntye yam̃. 18My’avôrô inè, ezom̃a zi r’eṽya zi pa dwaṉa gôre myè, e pivya nè, g’ôzôṉe wam̃: konde gô bela yi re gôre myè, ndô gô dende mbya, ngulu yi zele. 19Konde mi pa dende mbya yi belô myè, ndô mbe yi re mi pa bela yô dendô myè. 20Ndô ja my’adend’ezom̃a zi re mi pa bela, gambèṉè aranga myè e denda zô, ndô ibe si dwaṉa gô gare ntye yam̃. 21Sambô mi dènga gô gare ntye yam̃ ivanga nyiṉo inè, gô bela myè gô dende mbya, gambèṉè mbe yi re na myè bata. 22Konde mi jeṉ’ivanga ny’Anyambyè mbya g’ôrèm̃i wam̃; 23ndô mi jeṉ’ivang’inyèṉè gô ṉam̃i yam̃, nwagaga n’ivanga ny’ôrèm̃i wam̃, arugiza myè gw’ivanga ny’ibe nyi re gô ṉam̃i yam̃. 24Ôma w’azile ne myè! Mande be tômba myè avila g’ôkuṽa wiṉo w’ijuwa? ... . 25Akeṽa gôr’Anyambyè vo Yesu‐Krist, y’Ôvangiṉi wazô.
Yeṉo, myèmè mi janjiṉ’ivanga ny’Anyambyè n’ôgu, ndô g’ôzôṉe mi janjiṉ’ivanga ny’ibe.
Currently Selected:
Rôma 7: MYE
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society in 1927.
