Rôma 9
9
1Mi buly’ôrèti gôre Krist, mi pa nôka du, ôrèm̃i wam̃ wi takilya myè v’Iṉiṉ’Iṽya, inè: 2My’are n’ekèṽ’evôlô ni nkaza g’ôrèm̃i wam̃ pèkèpèkè. 3Konde mi ko bela myèmè gô savô aṽangunyô avila gôre Krist g’ômwanja w’awareri yam̃, n’ayaṉô mam̃ ga nt’ar’ôzôṉe, 4waô ne mongi Israèl, wi re n’inyanga ny’awaṉa, n’ivenda, n’injeka, n’ivanga, n’isaviṉa s’Anyambyè, n’impangaṉô, n’irer’inônga, 5na gôre waô, ga nt’ar’ôzôṉe, avili Krist, yi r’Anyambyè gôre yom̃a yôdu, saviṉô pa gô koṉako. Amèn!
6Ndô e zele mpaṉi ga igamba ny’Anyambyè nyi re twa p’ôsam̃u wa nyawènyawè. Konde aranga waôdu wi pila gôr’Israèl, waô mongi Israèl, 7ge waôdu wi pila gôr’Abraam, waô awaṉi wè; ndô ga nt’are bulyô pa inè: Awaṉi wo wi be pila gôr’Izaak, 8nyi pivya nè, arang’awaṉa w’ôzôṉe, waô n’awaṉa w’Anyambyè, ndô awaṉa w’ômpangaṉô waô be tangô g’awaṉa. 9Konde igamba ny’ômpangaṉô nye nyiṉo, inè: Mi be tô fwinya gw’egômbe mèziṉo, ni Sara e be jaṉ’ômwaṉa. 10N’alwaṉi yeṉo kè gôre Rebeka, avundig’inyem̃e v’Izaak dadyè, ya reri yazô; 11konde vangaṉ’awaṉa wi pa jaṉô, ge waô dende mbya ge mbe, — inè, nkenjiṉi y’Anyambyè, nt’are yè pinja pa, e ga lwaṉe, aranga n’ijanja, ndô vo ntondiṉi y’ôma mè dadyè yi fweya, — 12Rebeka awulinyô inè: Ôṉèro e be janjiṉ’erumbe; 13ga nt’are tèndô pa inè: My’arondi Yakob, ndô my’aṽik’Esau.
14Sambô, azwè be bulya sè? Mbe yi re gôr’Anyambyè? Alwaṉe yeṉo! 15Konde e bulinye Môsès inè: Mi be dende nkèngo gôr’ôma wi dendô myè nkèngo, na mi pôgiṉ’ôma wi pôgiṉô myè. 16Sambô ipinjô si zele gôr’ôma wi bela, ge gôre yè yi pale mangô, ndô si pila gôr’Anyambyè yi jeṉe nkèngo. 17Konde irèndo yi bulinye Faraô, inè: My’aṉongunyi wè gô ntiṉa yiṉo, gô tum̃inye ngulu yam̃ gôre wè, ko ini nyam̃ takilyô gô ntye yôdu. 18Yeṉo, e pôgiṉ’ôma wi belô yè, ayoliza kè ôma wi belô yè.
19Ndô, ô be bulinya myè inè: Ntiṉa nde e tô sèmba? Konde mande e sire ntondiṉi yè? 20Ôm’awè, awè mande sambô gô sir’Anyambyè? Ezom̃a z’avangyô ko buliny’ôvangi nè: Ezom̃a nde z’apangô myè yeṉo? 21Ôvangisi wi ntyuaṉa e zele n’inyanga gw’iwôṉô, gô panga n’imunga mèmô ntyuaṉa mori gô sum̃inyô ni mori gô sèlyô. 22Ndô sè, j’Anyambyè asindiṉa n’isindiṉ’ida intyuaṉa s’eguṉu kekizô pa gw’ijilizô, mbelaga gô tum̃iny’eguṉu zè, na gô myeze ngulu yè? 23Na j’Anyambyè aṽeli gô myez’ibuṉa s’ivendi nyè gô vagô y’ipôgiṉô y’aliwô kekizyô yè gw’ivenda? 24Yeṉo, azwè y’aweyô yè aranga dadyè avila gôr’Iju, ndô avila kè gôr’aṉongo, 25ga nte bulyè gw’ezangô z’Ôzea inè: Mi be fweya waô iṉongo nyam̃, waô wi re wi pa pegag’iṉongo nyam̃, n’ayè yi tondô ayè yi re yi re pegeg’ayè yi tondô; 26e be dwaṉa kè inè, gô mbôra y’awulinyô waô inè, aṉw’arang’iṉongo nyam̃, wi be fweyô vovo inè, awaṉa w’Anyambyè ya bo. 27Na Yezaya e tônga g’ômwanja w’Israèl inè: Vangaṉe ntangô y’awaṉa w’Israèl y’adwaṉa ga ntyèngè yi mbeṉe, wa kwè wi be sungiṉô. 28Konde Yeôva e be dend’igambi nyè gô ntye mazaga ni ntuṉizaga nyô. 29Na ga nt’aliwô bulyi Yezaya, inè: Arwe nè Yeôva y’imbèli e pa diwô dèkize zwè awaṉ’awèwo, gavoṉo azw’arô dwaṉi ga Sôdoma, azw’arô dwaṉi ga Gômora.
30Sambô azwè be bulya sè? Aṉongo mi re mi pa butag’ôgôre w’alèng’ôgôre, ôgôre wi pila gw’ibekelya, 31ndô Israèl w’awutag’ivanga ny’ôgôre wi pa siṽa gw’ivanga ny’ôgôre. 32Konde sè? Konde Israèl w’awuti nyô aranga n’ibekelya, ndô n’ijanja. W’avômyô n’ibaku gw’idô mè, 33ga nt’are tèndô pa inè: Vôna, mi dôṽya gô Siyôn idô ny’abaku, n’idô ny’isogiza, ayè yi bekelya nyô, e ze jeṉe ntyoṉi.
Currently Selected:
Rôma 9: MYE
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society in 1927.
