Rôma 14
14
1Wongaṉ’ôma wi re dèla gw’ibekelya, ko azozaṉi na yè g’ômwanja w’ipikilyi sè.
2Ôm̃ori e bekelya nè, ayè ko ny’ezom̃’edu, ndô ôm̃ori are dèla, e nya kaô ôwongo dadyè. 3Ayè yi ny’ezom̃’edu, e ga rige pèdye ôma are e pa ny’ezom̃’edu; n’ayè yi re e pa ny’ezom̃’edu, ayèkèly’ôma wi ny’ezom̃’edu, konde Anyambyè are yè bonga pa. 4Awè mande, awè yi jèkèlye nyôngô yi ngaṉi? J’akum̃aṉa gôre, ge j’apôswa, gambèṉè igamba nya reri yè. Ndô e be kum̃aṉa gôre, konde Rerè are ni ngulu yi jolizè.
5Ôm̃ori e banguny’intyugu; ôm̃ori e jeṉ’intyugu sôdu egolaṉi emô. Ôm’edu e ga lwaṉe mpaga fo g’ôrèm̃i wèmè.
6Ayè yi banguny’intyugu e denda yeṉo g’ômwanja wa Rerè. N’ayè yi nya, e nya g’ômwanja wa Rerè, konde e p’akeṽa gôr’Anyambyè; ayè yi re e pa nya, e pa nya g’ômwanja wa Rerè, av’akeṽa gôr’Anyambyè. 7Konde e zel’ôma gôre zwè e dwaṉa bo gô ntiṉi yèmè, e zele kè ôma wi juwa gô ntiṉi yèmè. 8Konde j’azw’adwaṉa bo, azwè dwaṉa bo gôre Rerè; na j’azw’ajuwa, azwè juwa gôre Rerè. Sambô j’azw’adwaṉa bo, ge zwè juwa, azwè mongi wa Rerè. 9Konde Krist ayuwi, arôngwa kè, gô ntiṉa yiṉo inè, e ga vangiṉe mongi wi re juwa pa na mongi wi re bo. 10Ndô awè, ntiṉa nde yi jèkèlyo ’mwareri yo? ge awè, ntiṉa nde yi pèdyo ’mwareri yo? gô re nè azwèdu azwè be bôm̃unya gw’eka z’ijèkèlya z’Anyambyè. 11Konde re tèndô pa inè: Ga nt’are myè bo, bulye Yeôva, ivuvy’edu nyi be dôṽiṉa myè akotolo, n’ôṉèm̃y’edu wi be sum̃iny’Anyambyè. 12Yeṉo r’ôm’edu gôre zwè, e be p’Anyambyè ntangô g’ômwanja w’ôkuṽi wèmè.
13Sambô azw’ayèkèlyaṉaṉi nyèṉè; ndô rô kenjeṉ’igamba nyiṉo, inè, ôm’edu awel’ibaku g’ezom̃a zi pôsunya gô mpoṉo ya ’mwareri yè. 14My’avôrô, amyezô mbyambye ne Rerè Yesu, inè, e zel’ezom̃a z’isèkè zômè, ndô jog’ôma ajeṉ’ezom̃a, inè, zi r’isèkè, gambèṉè zi r’isèkè gôre yè. 15Ndô j’aw’ajeṉize ’mwareri yo ekèṽa g’ômwanja w’inyi so, gambèṉè ô pa dwaṉa nyèṉè n’itonda: ayôṉ’ôma w’ayuṉô ne Krist g’ômwanji wè, vo inyi so. 16Sambô mbyi yaṉi y’agambô mbe. 17Konde iṉongo ny’Anyambyè arang’inya n’ijonga, ndô ôgôre n’am̃ènjè n’igeṽa vo Iṉiṉ’Iṽya. 18Ayè yi janjiṉe Krist g’ôsam̃u wiṉo e tondy’Anyambyè, azum̃inyô kè n’aṉaga. 19Sambô azwè ga gombiz’isam̃u y’am̃ènjè, n’isam̃u yi re zwè ko nungwaṉa. 20Ayiliz’eṽilô z’Anyambyè g’ômwanja w’inya. Yom̃a yôdu yi re nkèrè; ndô re mbe j’ôma apang’am̃ori gô pôswa v’inyi sè. 21Are mbya gô dwaṉa any’eṽèrè, ge gô jong’ivè, ge gô dend’ôsam̃u edu wi re ’mwareri yo ko pôm̃ô na wô ibaku, ge gô pôsunyè, ge gô dèlizè. 22Awè ô re n’ibekelya, ṽandam̃iṉa sô g’ôkuṽi wo g’ôzô w’Anyambyè. Ôzaviṉô gôre yè yi re e pa p’ôkuṽi wè ôgara gw’ezom̃’edu zi jeṉô yè mbya! 23Ndô ayè yi dôṽe mpaga g’ômwanja w’ezom̃a zi nyô yè ar’ôgara, konde e pa nya n’ibekelya. Ezom̃’edu zi re zi pa dendô n’ibekelya, zô ibe.
Currently Selected:
Rôma 14: MYE
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society in 1927.
