Rôma 15
15
1Azwè yi re jola, azwè ga zindiṉ’indèliṉi sa mongi wi re dèla, ko zw’arondy’ikuṽi yazômè. 2Ôm’edu gôre zwè e ga rondye ôrangaṉô wè g’ôsam̃u wi r’ômbya gô nuginyè. 3Konde Krist e pa tondy’ôkuṽi wèmè, ndô ga nt’are tèndô pa, inè: Iroṽô ya mongi wi toṽô y’avôswi gôre myè. 4Konde isam̃u yôdu y’arèndyô gw’alônga y’arèndyô gô nènja zwè, ko zwè dwaṉa n’igum̃u vo isoliṉa na v’ôzindyô w’irèndo.
5N’Anyambyè y’isoliṉa na y’ôzindyô e ga ve ṉwè gô dwaṉa n’agamba mèmô gôre ṉwè na ṉwè ga nt’ar’inènja si Yesu‐Krist, 6ko ṉwè pendy’Anyambyè ni Rerè y’Ôvangiṉi wazô Yesu‐Krist, n’ôrèm̃’ômô, n’ôgwaṉ’ômô. 7Yeṉo wongaṉaṉi aṉwè, n’aṉwè, ga nt’awongyô ṉwè ne Krist, gô pendy’Anyambyè.
8Konde mi bulya nè, Krist y’avegagi nyôngô ya mongi wi re kèrô pa g’ômwanja w’ôrèti w’Anyambyè, gô dwaṉiz’impangaṉô y’avanganyô gôr’irerè, 9ndô aṉongo pendy’Anyambyè g’ômwanja wi nkèngo yè, ga nt’are tèndô pa, inè: Gô ntiṉa yiṉo mi be sum̃inyo gôr’aṉongo, ko mi jemb’isum̃inya s’ini nyo. 10E tô bulya nè: Aṉongo, yeṉaṉi mbya n’aṉagi wè ta! 11Na inè: Zum̃inyaṉi Yeôva, aṉwè aṉongo môdu, ko sum̃inyaṉi yè, aṉwè aṉaga waôdu! 12Yezaya e tô bulya kè inè: E be kogw’ôramba avila gôre Yisa, wi be kum̃aṉa gô pangiṉ’aṉongo; n’aṉongo mi be dôṽiṉè igum̃u.
13Anyambyè y’igum̃u e ga yônye ṉwè ralye n’igeṽa nyôdu, n’am̃ènjè môdu gw’ibekelya, ko ṉwè buṉizô igum̃u, vo ngulu y’Iṉiṉ’Iṽya.
14Myè kè my’avôrô mbyambye g’ômwanji waṉi, awareri yam̃, inè, aṉwèmè aṉw’are ralye n’ômbya jônya pa n’imya sôdu, kekizô pa kè gô tewaṉa. 15Ndô gw’imbôra sinyèwo my’are tèndiṉa pa ṉwè ni nkagandè vyagaṉô, ga gô jônginya ṉwè g’ômwanja w’imèpiṉô si re myè pô pa n’Anyambyè, 16gô dwaṉe miṉisè yi Yesu‐Krist gôr’aṉongo, njanjag’eṽilô zi miṉisè gô ntyangô mbya y’Anyambyè, ko ntyagô y’aṉongo tondy’Anyambyè, mèpizôgô ne Iṉiṉ’Iṽya.
17Sambô mi sôgwa gôre Yesu‐Krist g’ômwanja w’isam̃u y’Anyambyè. 18Konde my’ayolye tet’ôsam̃u kaô nt’alendi Krist gôre myè gô bag’aṉongo gw’ijogiṉô v’igamba na v’ijanja na vo ngulu yi lemba na y’isam̃u yi mamô, 19na vo ngulu y’Iṉiṉa ny’Anyambyè; yeṉo re nè, my’are kambiṉa pe Ntyangô Mbya yi Krist mbyambye avila gô Yerusalèm, n’intye si re pyèrè na yô kwanga gw’Ilirya. 20Na my’aṽeli pôlô gô kambiṉe Ntyangô Mbya gw’imbôra si re Krist e pa tetô du, ko my’aṉôga du gw’izanga nyi ngaṉi, 21ga nt’are tèndô pa inè: Waô wi re wi pa kambiṉô Ntyangô Mbya g’ômwanji wè wi be jeṉa; na waô wi re wi pa jogo wi be kôtiza.
22Yeṉo re my’azimbyô inyongo sinyenge gô kènda gôre ṉwè. 23Ndô vèṉo my’azele n’ezom̃a zi tô simbya myè gw’intye siṉo; my’are bela pa kè impum̃’imyenge gô kènda gôre ṉwè; 24yeṉo gô be kènda myè gô ntye yi Sipanya, mi deviṉa gô jeṉa ṉwè gô be pyagaṉa myè, ko mi jirô ne ṉwè gô mpoṉo, myè jôra pa ni jeṉa ṉwè.
25Vèṉo mi kènda gô Yerusalèm gô piṉ’iyombwi mpagaga. 26Konde mongi Makedônya n’Akaya w’ayeṉi mbya gô p’aṉiva gô nunguṉ’ikuge gôr’iyombwi yi re gô Yerusalèm. 27W’ayeṉi mbya gôre waô, wi re kè inwaṉisi yaô; konde j’aṉongo m’arweṉ’iwongisi na waô gw’isam̃u yaô y’Iṉiṉa, gambèṉè wi nwaṉa kè waô yom̃a y’ôkuṽa. 28Sambô gô be diwô myè my’am̃az’eṽilô ziṉo, ko mi piṉa waô mpagaga yiṉo, gambèṉè mi be kènda gô ntye yi Sipanya, azimba gôre ṉwè. 29My’avôrô kè inè, gô be bya myè gôre ṉwè, mi be bya ralye n’ôzaviṉô wi Krist.
30Mi kwena ṉwè inkolo, awarera, vo Ôvangiṉi wazô Yesu‐Krist, na v’itonda s’Iṉiṉa, gô nwa na myè gw’ikambiṉa gôr’Anyambyè, 31ko mi sungiṉô avila gôre waô wi re wi pa jivira gô Yuda, ko mpagaga yi piṉô myè gô Yerusalèm tondy’iyombwi, 32ko mi bya gôre ṉwè n’igeṽa vo ntondiṉi y’Anyambyè, ayowa gôre ṉwè. 33Anyambyè y’am̃ènjè e ga lwaṉe na ṉwèdu! Amèn!
Currently Selected:
Rôma 15: MYE
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society in 1927.
