Rôma 13
13
1Ôm’edu e ga rugiz’ôkuṽi wè gw’ampenda mi pangiṉa; konde e zel’ivenda kaô ny’apila gôr’Anyambyè, n’ampenda mi dwaṉa mi dôṽyô n’Anyambyè. 2Yeṉo, ayè yi joliṉ’ivenda, e joliṉ’ôzômbyô w’Anyambyè, na waô wi joliṉa wi be bag’ikuṽi yaô ôgara. 3Ivangiṉi yi pa fangô g’ômwanja w’ijanj’ibya, ndô g’ômwanja w’ijanj’ibe. Ô bela gô dwaṉa ary’ivenda? Lende mbya, gambèṉè ô be sum̃inyô ne nyô. 4Ôvangiṉi ne nyôngô y’Anyambyè gô mbyi yo. Ndô j’aw’adende mbe, rye ntyagaga; konde e pa twaṉ’ôkwari wè gô nyawènyawè, konde ayè ne nyôngô y’Anyambyè gô fwiṉiz’ekôlè na gô sôny’ôma wi dende mbe ôgôm̃a. 5Sambô are kwèkwè gô tugiz’ikuṽa, aranga dadyè g’ômwanja wi ty’ôgôm̃a, ndô g’ômwanja w’ôrèm̃a kè.
6Gô ntiṉa yiṉo pa ṉwè ntyagô kè. Konde ivangiṉi yô ne inyôngô s’Anyambyè njanjag’eṽilô mèziṉo. 7Vaṉi gôre waôdu nte nwaṉô waô: ntyagô gôre yè yi nwaṉô ṉwè ntyagô; lèmpô gôre yè yi nwaṉô ṉwè lèmpô; itya gôre yè yi nwaṉô ṉwè itya; ôlubô gôre yè yi nwaṉô ṉwè ôlubô.
8Anwaṉaṉ’ôm’edu ezom̃a, kaô du gô tondaṉa, konde ayè yi tond’ôm̃ori are denda p’ivanga. 9Konde agamba miṉo inè, alèwa na wi ngaṉi, ayôṉa, ayufa, arongiṉa, na j’adwaṉ’ôzômby’ômwèṉè kè, môdu mi datizô gw’igamba nyiṉo inè: Rond’ôrangaṉô wo ga ôkuṽi womè. 10Itonda si pa dendiṉ’ôrangaṉô mbe; sambô itonda si dend’ivanga nyôdu.
11Yeṉo, aṉw’avôrô egômbe ziṉo, inè, igwèra ny’asiṽi nyi re zwè gô nongwa avila gw’antyôviṉô, konde vèṉo isungiṉô s’atweṉi pyèrè na zwè vyagaṉô n’egômbe z’aṽekelyi zwè. 12Ôgwèra w’atweṉi daṽa, ôm̃anda w’atweṉi pyèrè. Sambô azwè ga wal’ijanja si mpiri, awor’imyanga y’ôzange. 13Azwè ga lwaṉe ndwaṉi mbya yi keka n’ôm̃anda, arange mpiṉag’ôkuṽa gw’ibe ni mbongôgô alugu, ni nsôngag’antô, ni ndwaṉage vôvevôve, n’anyôm̃aṉô ni ñandi. 14Ndô woraṉi Rerè Yesu‐Krist, ko aṉakaṉ’ôzôṉe gô jôriz’ideviṉa sa wô.
Currently Selected:
Rôma 13: MYE
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society in 1927.
