Rôma 12
12
1Sambô, mi kwena ṉwè nkolo, awarera, g’ômwanja w’ipôgiṉa s’Anyambyè, inè, yiraṉ’ikuṽi yaṉi gôre yè ga ntyagô ya bo, na yi nkèrè, na yi tondô n’Anyambyè, inè, njanjiṉi y’irèm̃i yaṉi. 2Ko agolaṉaṉ’ikuṽi yaṉi gô ntye yiṉo, ndô galunyôṉi gô mèpy’irèm̃i yaṉi, ko ṉwè mye ntondiṉi y’Anyambyè inè, yi re mbya, yi tondô, yi re kè mèpa pa.
3V’imèpiṉô si re pô pa myè, mi buliny’ôm’edu gôre ṉwè, inè, avikilya g’ômwanja w’ôkuṽi wèmè vyagaṉô ni nt’are kwèkwè gôre yè gô pikilya, ndô ga vikilye n’ôzim̃a ga nt’ar’egèṉizô z’ibekelya si r’Anyambyè keriṉa p’ôm’edu. 4Konde ga nt’are zwè ṉam̃a yenge g’ôkuṽ’ôm̃ori, ni ṉam̃a yôdu yi zele n’eṽilô emô, 5yeṉo kè azw’ar’awenge, azw’ar’ôkuṽ’ôm̃ori gôre Krist, n’azwèdu azw’are ṉam̃a y’ôkuṽa mè. 6Na gôre zwè pô p’igôṉô yi bangwaṉa ga nt’ar’imèpiṉô si re pô pa zwè: j’adwaṉ’ôgôṉô wi poga, azwè ga voge ga nt’ar’evendiṉi z’ibekelya; 7ge eṽilô zi miṉisè, azwè ga lwaṉe gw’eṽilô zazô; ge ayè yi nènja, e ga lwaṉe gw’inènji sè; 8ge ayè yi kambiṉa, e ga lwaṉe gw’ikambiṉa. Ayè yi pe mpagaga, e ga ve n’ôyôgô; ayè yi pangiṉa, e ga vangiṉe ni mpyô; ayè yi pôgiṉa, e ga vôgiṉe n’igeṽa.
9Itonda si ga lwaṉ’ipondya fo. Ṽikaṉi mbe; livaṉi ta gô mbya. 10G’ômwanja w’itonda s’awarerè, lwaṉaṉi ralye n’itonda gôre ṉwè na ṉwè; g’ômwanja w’iduba, lônge dubeṉ’am̃ori. 11Lwaṉaṉi ni mpyô gô ṽilô yaṉi, arang’agera. Lwaṉaṉi ni mpyô g’ôrèm̃a. Yanjiṉaṉi Rerè. 12Yeṉaṉ’igeṽa gw’igum̃u. Zindiṉaṉi gw’injuke. Zoliṉaṉi gw’ikambiṉa. 13Vaṉ’iyombwi yom̃a yi re na waô isolo. Lwaṉaṉi n’ôyôgô.
14Zaviṉaṉi waô wi kombiza ṉwè, zaviṉaṉi ko alogaṉi.
15Yeṉaṉi mbya na waô wi jeṉe mbya; leṉaṉi na waô wi deṉa. 16Lwaṉaṉi n’ôrèm̃’ôm̃ô aṉwè na ṉwè. Aṉakaṉ’isam̃u impôlô, ndô gèndyôṉi n’isam̃u y’ôkendekende. Alwaṉaṉi n’imya gw’ikuṽi yaṉimè.
17Awizaṉi mbe gô mbe. Gombizaṉ’isam̃u yi r’imbya gw’antyo m’aṉaga waôdu. 18Ja y’ajolyô, g’ôzambi waṉi, lwaṉaṉi n’am̃ènjè n’aṉaga waôdu. 19Awiṉizaṉ’ekôlè, mongi tondô, ndô vaṉ’eguṉu z’Anyambyè mbôra; konde re tèndô pa inè: Ekôlè izam̃, myèmè mi be fwiza zô, bulye Rerè. 20Ndô j’ôlôvalôvi wo ajogo njaṉa, nyezè inya; j’akôtô n’esôve, yonjè; konde gô dendo yeṉo ô be kenj’anyingilya m’ôgôṉi gw’ewônjô zè. 21Agevô ne mbe, ndô geve mbe ni dende mbya.
Currently Selected:
Rôma 12: MYE
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society in 1927.
