Rôma 11
11
1Sambô mi bulya inè: Anyambyè are tiga p’iṉongo nyè? Alwaṉe yeṉo! Konde myè kè myè mw’Israèl, my’ayanyô n’awaṉa w’Abraam, gô mbuṽe yi Benyamin. 2Anyambyè e pa tig’iṉongo nyè ny’alônge myenyô yè. Aṉwè pa mya nte buly’irèndo g’ômwanja w’Eliya, nt’azozizi yè Israèl gôr’Anyambyè, inè: 3Rera, wi re jôṉa p’ivogisi yo, wi re jôṉa p’imbôri so si jirô intyagô; my’adèki myè dadyè, wi buta kè gô tômb’em̃èṉo zam̃. 4Ndô Anyambyè awiṉizi yè sè? Inè: My’are piga pa gôre myèmè ntozèny s’aṉag’ôrwageṉô wi re wi pa dôṽiṉe Baal akotolo. 5Yeṉo kè vèṉo gw’egômbe ziṉo atigaṉ’awèwo ga nt’ar’ipinja s’imèpiṉô. 6Ndô j’ipinja s’adwaṉa n’imèpiṉô, gambèṉè si zele nyèṉè gw’ijanja; ja yeṉo, gambèṉè imèpiṉô si zele nyèṉè imèpiṉô.
7Sambô sè? Ezom̃a z’awutyô ne Israèl, wi pa dènga zô, ndô z’alengyô ne mongi wi re pinjô pa, n’am̃ori w’ayolizyô irèm̃a, 8ga nt’are tèndô pa, inè: Anyambyè aveṉi waô iṉiṉa ny’antyôviṉô, n’antyo mi re m’ayeṉa du, n’arôy mi re m’ayogo, kwanga na ṉèṉo wiṉo. 9David kè e bulya nè: Tavulu yaô yi ga lwaṉe gôre waô môndô, n’isinga, n’ibaku, n’ôrevuṉô! 10antyo maô mi ga lwaṉe mpiri ko w’ayeṉa, ko pur’inyum̃i saô mbè pèkèpèkè!
11Sambô, mi bulya inè: W’avôm̃yô n’ibaku ntiṉa gô pôswa? Alwaṉe yeṉo! Ndô isungiṉa s’akôve bya gôr’aṉongo v’ipôswi saô, ko waô jeṉizô ñandi. 12Ndô j’ipôswi saô s’apagize ntye, n’ikugi saô s’apagiz’aṉongo, ko pôrô ibuṉi saô gô be kalwa waô. 13Mi kamba na ṉwè, aṉongo: gô re nè myè erôm̃i gôr’aṉongo, mi pendiz’eṽilô zam̃ z’erôm̃i; 14vendetwa myè ko jeṉize mongi yam̃ ga nt’ar’ôzôṉe ñandi, azungiṉ’awèwo gôre waô. 15Konde j’itigô saô s’akôve ntye imèpaṉa, gambèṉè ibongô saô si be dwaṉ’ande, kaô em̃èṉo avila gw’ijuwa?
16Na j’ilônd’ilônga y’adwaṉ’ôrunda, gambèṉè yôdu y’adwaṉ’ôrunda; na j’ôramba w’adwaṉ’ôrunda, gambèṉè ampare kè m’adwaṉa kè ôrunda. 17Ndô j’ampare am̃èwo m’azèryô nkwe, na j’awè, erere zi yôlivi z’iga, w’awelyô gw’imbôra sa mô, awong’aka m’ôramba n’agali m’erere zi yôlivi, 18gambèṉè azôgwa nsèlyag’ampare. J’aw’asôgwa, mya nè, arang’awè yi simby’ôramba, ndô ôramba wô simbyo. 19Sambô ô be bulya, inè: Ampare m’azèryô nkwe, ko mi fwelô gô mbôra ya mô. 20Are yeṉo rèti; m’azèryô nkwe g’ômwanja w’itwayogiṉô, n’awè, ô kum̃aṉa vo ibekelya. 21Alwaṉ’ekale, ndô rye ntyagaga; konde j’Anyambyè e pa pig’ampare alônga, gambèṉè e ze pige wè kè. 22Sambô, vikilye nkèngo ni njoliṉi y’Anyambyè: gôre waô w’avôswi, njoliṉi, ndô gôre wè, nkèngo y’Anyambyè, j’aw’adwaṉa jola gô nkèngo mè; j’aranga yeṉo, gambèṉè ô be sèrô kè. 23Na waô kè, ja w’alwaṉ’ibekelya fo, wi be tô fwelô gw’erere; konde Anyambyè are ni ngulu gô tô fwela waô. 24J’awè, yi re sèrô pa avila gw’erere zi yôlivi z’aweli gw’iga, awelô gw’erer’eṽya zi yôlivi zi re zi zele mpangiṉi yè, ko pôrô miṉo mi re ni mpangiṉi y’ampare mi be tô fwelô gw’erere zaômè zi yôlivi.
25Konde mi pa bela ṉwè, awarera, gô dwaṉ’amya iyumbuṉô nyiṉo, aṉwè vende dwaṉa n’imya gw’ikuṽi yaṉimè, inè, mbèy y’Israèl yi re joliza p’irèm̃i yaô, kaô ibuṉa s’aṉongo s’abya. 26Yeṉo iṉongo ny’Israèl nyôdu nyi be sungiṉô, ga nt’are tèndô pa, inè: Ôlanduṉi wi be bya avila gô Siyôn, ko wô keguny’ibe avila gôre Yakob; 27na yiṉo ne njeki yam̃ na waô, gô be tômba myè ibe saô. 28G’ôzamba wi Ntyangô Mbya, waô ilôvalôvi g’ômwanji waṉi; ndô g’ôzamba w’ipinja s’Anyambyè, wi tondô g’ômwanja w’ireri saô. 29Konde Anyambyè ayè pa pe mpagaga aweya kè mbeli yè, e pa nige nkôndi. 30Ga nt’avegagi ṉwè ni mori ijogiṉô fo gôr’Anyambyè, ndô vèṉo aṉw’apôgiṉô g’ômwanja w’itwaṽekelyi saô, 31yeṉo kè vèṉo mongi siṉo w’atweṉi wi pa jogiṉô g’ômwanja wi nkèngo yi re waô dendiṉô pa, ko waô pôgiṉô. 32Konde Anyambyè are nunja p’aṉaga waôdu gw’itwayogiṉô, ko yè pôgiṉa waôdu.
33Ôronga nde n’ibuṉa s’imya na s’ikôtiza s’Anyambyè! Iteṉizi sè s’ayolye kèlagelô, n’impoṉo sè s’ayolye myô. 34Konde mande are mya p’ipikilya si Yeôva? Ge mande are pangè pa gô bônde môndo? 35Ge mande are pa p’Anyambyè ezom̃a ko yè tô fwiṉizè? 36Avila gôre yè, na vo yè, na gôre yè e dwaṉe yom̃a yôdu. Gôre yè ga lwaṉ’ivenda gô koṉako! Amèn!
Currently Selected:
Rôma 11: MYE
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society in 1927.
