MARAKUSI 14

Pogombo da mampepate i Yesu

14:1-2

(Mat. 26:1-5, Luk. 22:1-2, Yoh. 11:45-53)

1 # Pa. 12:1-27 Ntongo radua mbengipa da posusa Pasa pai Posusa Roti Anu Bareʼe Ndaragi. Waʼa ntadulako ntadu mpanyomba pai waʼa guru agama ntongo mampepali jaya da napaleʼo mancoko ngkaroo i Yesu pai da mampepate. 2Maka natoʼo ntau seʼe, “Paikanya neʼe tawianaka ri tempo mposusa, boi mabara tau sondo.”

I Yesu ndabubuka lana wongi

14:3-9

(Mat. 26:6-13, Yoh. 12:1-8)

3 # Luk. 7:37-38 Sindara i Yesu ri lipu Betania, ri banua i Ncimo anu ketangga owi, jelamo weʼa sambaʼa madadu Sira. Siʼa mangkeni sambaʼa butolo watu mabuya buke-buke lana anu maʼai kawonginya pai maʼai woʼu kasulinya, ndapowia ungka ri kale anu mawongi. Sindara mpotunda i Yesu mangkoni, meoko weʼa setu naposoki leʼe butolo watu setu nepa nabubu lana wongi setu ri tanoana i Yesu. 4Bara tesangkuja tau anu njau njairia, majaʼa rayanya mangkita, natoʼoka yununya, “Nunjaa yowenya lana wongi setu podo ndaposebuka ngkabongo? 5Maka lana setu laku ane ndapobalu meruu ri tatogo atu doi salaka olinya, pai olinya ndatilaka waʼa ntau kaasi-asi!” Majaʼa raya ntau seʼe ri weʼa setu.

6Paikanya ndatoʼo i Yesu, “Ndipapaliukamo siʼa! Makuja ndisalempori siʼa? Siʼa mampowia anu madago ri Yaku pai anu ndaunde! 7#Paw. 15:11 Tau kaasi-asi bareʼe tepapalai ungka ri oyomi. Pura-pura tempo ane ndipokono ndikoto da mantulungi tau seʼe. Paikanya Yaku bareʼe da sangkani-ngkani mpaliu pai komi. 8Weʼa seʼi mampowiamo anu nakoto mawianaka, siʼa malanaimo koro-Ku mampatokamo da padayo Yaku ri kabareʼepanya jela temponya. 9Ndipoaya moncomo! Ri mbeʼi-mbeʼi ntano ndapampobambarika Nuntu ngKatuwu ri sambawo lino seʼi, powia mbeʼa seʼi da kono ndapau woʼu da mewali tanda pangaendo siʼa.”

I Yudasi mampobalu i Yesu

14:10-11

(Mat. 26:14-16, Luk. 22:3-6)

10Malaimo i Yudasi to Karioti, siʼa sambaʼa ri anaguru-A anu sampuyu pai radua, njoʼu ri waʼa ntadulako ntadumpanyomba, tinako ndayanya da mampobalu i Yesu ri tau seʼe. 11Padonge ntau seʼe mawongko rayanya, mojanji tau seʼe da mawaika i Yudasi doi. Napepalimo i Yudasi jaya pai tempo anu madago da napampepombaika i Yesu.

I Yesu mangkoni pangkoni Pasa pai waʼa anaguru-A

14:12-21

(Mat. 26:17-25, Luk. 22:7-14,21-23, Yoh. 13:21-30)

12Ri eo kaʼisa mposusa Roti Anu Bareʼe Ndaragi ri eo mpasambale bimba mPasa meoasi anaguru-A ri Sira, “Ri mbeʼi pampokono-Mi da kapampatokaka Komi pangkoni Pasa?”

13Ndapokaumo anaguru-A radua, ndatoʼoka tau seʼe, “Ndikanjoʼumo ri kota, njairia da simpadopa komi pai tuama sambaʼa anu mangkeni gumba mponombu ue. Da ndiluluwakamo siʼa, 14ri banua mbeʼi pesua ntau setu, da nditoʼoka taliwanua, ‘Ndapeoasi i Guru, ri mbeʼi kareʼe da pangkoni-A roti mposusa Pasa pai anaguru-A?’ 15Tau setu da mantujuka komi sambaʼa lincu anu bangke ri wawonya. Lincu setu roomo ndapesoyoki, tikalimo waʼa mparewanya. Ndipatokamo njairia pura-pura anu da tapake.”

16Nepa malai anaguru i Yesu anu radua setu njoʼu ri kota. Njairia napomberataka ntau seʼe pura-puranya silulu pai ndapantoʼo i Yesu. Napatikalimo ntau seʼe pangkoni Pasa.

17Butu mawengi, jelamo i Yesu pai anaguru-A sampuyu pai radua. 18#Pol. 41:10 Sindara potunda ntau seʼe mangkoni, ndatoʼo i Yesu, “Pedongeka: sambaʼa tau ungka ri oyomi, anu motunda mangkoni sangkani-ngkani pai Yaku seʼi da mampobalu Yaku.”

19Padonge ntau seʼe pau setu, mapari raya waʼa anaguru i Yesu. Inceʼe painaka nteasambaʼa tau seʼe montepuʼu mompeoasi ri Yesu natoʼo, “Manoto banya yaku anu nditinakondaya i Guru?”

20Mesono i Yesu ndatoʼo, “Siʼa sambaʼa tau ungka ri oyomi anu sampuyu pai radua seʼi, anu mangkoni mojuyu tabo pai yaku. 21Lawinya i Ana Manusia da mate ewa anu teʼuki ri raya Ncura Magali. Paikanya ara maʼaisa karuginya tau anu mampepombaika i Ana Manusia setu! Moruanapa ri tau setu ane siʼa bareʼe liu-liu ndapoana!”

Pangkoni Magali

14:22-26

(Mat. 26:26-30, Luk. 22:14-20, 1 Kor. 11:23-25)

22Ri pangkoni ntau seʼe, ndatima i Yesu roti, nepa ndapekakaika. Roo setu ndaripu-ripu roti setu nepa ndawaika anaguru-A ndatoʼo, “Nditima pai ndikonimo, inceʼimo koro-Ku.”

23Roo setu ndatima sambaʼa tabo mpanginu anggoro. Mekakai Sira maunde Pue Ala, nepa ndawaika waʼa anaguru-A tabo mpanginu setu. Tau seʼe pura-pura manginu anggoro setu. 24#Pa. 24:8, Yer. 31:31-34 Roo setu ndatoʼo i Yesu, “Inceʼimo daa-Ku anu mampakainti pojanji mPue Ala, daa anu tebubu tila ntau maria. 25Ndipoaya moncomo: Bareʼemo da Kuinu woʼu anggoro seʼi rantani rata ri tempo mpainu-Ku anggoro anu dawoʼu sangkani-ngkani pai komi ri Lino Dawoʼu mPapa-Ku.”

26Ungka lairia napongayuka ntau seʼe ngayu mpeunde. Roo setu malaimo tau seʼe njoʼu ri Buyu ngKaju Lana.

Pampakanoto i Peturu da mampesapuka i Yesu

14:27-31

(Mat. 26:31-35, Luk. 22:31-34, Yoh. 13:36-38)

27 # Sak. 13:7 Ungka lairia ndatoʼo i Yesu ri tau seʼe, “Komi pura-pura da molonco mampalaika Yaku. Maka lau ndaʼuki ri Sura Magali, ‘I Pue Ala da mampepate topongkambinya, pai bimbanya da tewuraga.’ 28#Mat. 28:16 Paikanya ane ndapapembangu muni Yaku, Yaku da mampesindiuka komi njoʼu ri Galilea.”

29Mesono i Peturu, “Bareʼe, mau tau seʼe pura-pura mampalaika Komi Guru, jayaku manoto bareʼe kojo.”

30Ndatoʼo i Yesu, “Neʼe nukalingani, sambengi seʼi seʼe kabareʼepanya mototoroʼo manu karua ngkaninya, tatogo ngkanimo nupesapuka Yaku.”

31Mesono i Peturu mampakaroso paunya natoʼo, “Mau yaku da mate sangkani-ngkani pai Komi, manoto bareʼe kojo da kutoʼo yaku bareʼe kuincani Komi!”

Ewanceʼe seʼe pompau waʼa anaguru anu ntaninya.

I Yesu mekakai ri bonde Jatisemane

14:32-42

(Mat. 26:36-46, Luk. 22:39-46)

32Jela tau seʼe ri sambaka tana toʼonya Jatisemane, nepa ndatoʼo i Yesu ri waʼa anaguru-A, “Ndipotunda-tundamo ireʼi, sindara Yaku njoʼu mekakai.”

33Nepa ndasale i Yesu i Peturu, i Yakobu pai i Yohane njoʼu sangkani-ngkani pai Sira. Montepuʼumo mapari raya-A pai bareʼemo rodo raya-A. 34Ndatoʼo i Yesu ri tau seʼe, “Maʼai kojo kapari ndaya-Ku, ewa da matemo Kuepe. Ndikaroo-roomo ireʼi ndipongkenaasimo!”

35Malai i Yesu lawa sakodi nepa mombukotu metutu tudu ri tana nepa mekakai. Ri pekakaia seʼe Sira merapi ane maya Sira bareʼemo da maepe tempo ngkapari setu. 36Ndatoʼo, “Papa, boo Papa, bereʼe mau sangaya anu bareʼe ndikoto Komi Papa. Ndiwawence ungka ri Yaku kapari seʼi. Paikanya neʼe ndiluluka pepokono-Ku paikanya pepokono-Mi Papa.”

37Roo setu mewalili i Yesu, ndaratasaka waʼa anaguru-A ntongo ngkayore. Mompau Sira ri Peturu ndatoʼo, “Simo, ara jayore siko? Podo sajaa woʼu, bareʼe nukoto mongkenaasi?” 38Nepa ndatoʼo i Yesu ri tau seʼe, “Ndipongkenaasimo, pai ndipekakaimo da naka komi bareʼe mampomberataka pompebutuka. Lawi nawa-nawami da rayanya mawianaka anu monco, paikanya bareʼe ndikoto ua katolino setu malente.”

39Sangkani woʼu i Yesu njoʼu mekakai pai masowanaka waʼa mpau anu siwia. 40Roo setu mewalili woʼu Sira ri waʼa anaguru-A pai ndarata woʼu tau seʼe ntongo ngkayore, maka maʼai kojo kayuru mata ntau seʼe. Bareʼe naincani ntau seʼe nunjaa anu sangaya-ngaya da natoʼo ntau seʼe ri Yesu.

41Karata woʼu i Yesu katatogo ngkaninya ri tau seʼe, meoasi Sira ndatoʼo, “Bara ntongo da yorepa pai da meosa komi? Ganamo! Jelamo temponya i Ana Manusia ndapepombaika ri pale waʼa ntau masalaa. 42Ndipembangumo, maʼi tapalai. Peole! Tau anu mampobalu Yaku jelamo!”

I Yesu ndasoko

14:43-52

(Mat. 26:47-56, Luk. 22:47-53, Yoh. 18:3-12)

43Ntongo mompaupa i Yesu, jelamo i Yudasi, siʼa sambaʼa ungka ri anaguru-A anu sampuyu pai radua setu. Maria tau anu sangkani-ngkani pai siʼa anu mangkeni penai pai tarasulu. Tau seʼe napokau waʼa ntadulako ntadumpanyomba, waʼa guru agama pai waʼa ntopombawanaka nto Yahudi. 44I Toponggoli-nggoli setu roomo mampakanotoka tau seʼe sangaya petondoni. Natoʼoka tau seʼe, “Tau anu kueki, inceʼemo tau-Nya. Ndisokomo Sira pai ndikeni Sira pai da ndijagai maroso-roso.”

45Kajela i Yudasi, liu-liu nadadu i Yesu natoʼo, “Guru!” nepa naeki i Yesu. 46Nepa waʼa ntau anu rata sangkani-ngkani pai Yudasi setu mancoko i Yesu nepa napungu Sira. 47Paikanya reʼe sambaʼa tau ri oyo ntau anu njau njairia mawutu penainya nepa napomai anamayunu i ntadu mpanyomba bangke rantani mapupu talinganya. 48Nepa ndatoʼo i Yesu ri tau seʼe, “Ara Yaku seʼi tau majaʼa, painaka komi rata mangkeni penai pai tarasulu da mancoko Yaku? 49#Luk. 19:47, 21:37 Saeo-saeo Yaku mompaguru ri Banua i mPue ri suarami, pai bareʼe ndisoko Yaku. Paikanya lawi da ewanceʼemo da naka kobanganimo nunjaa anu ndaʼuki ri raya Ncura Magali.”

50Pura-pura anaguru-A molonco mampalaika i Yesu.

51Reʼe sambaʼa ngalitau, anu podo mampowewe pauba, malulu i Yesu. Waʼa ntau setu da mangasoko siʼa, 52paikanya narengkasaka paubanya setu, nepa molonco siʼa melambe-lambe.

I Yesu ri suara Majalisi Agama

14:53-65

(Mat. 26:57-68, Luk. 22:54-55,63-71, Yoh. 18:13-14,19-24)

53Nakeni ntau seʼe i Yesu ri banua i nTadu mPanyomba Bangke; njairia tepasambakamo waʼa ntadulako ntadu panyomba, pai waʼa ntadulako nto Isaraeli pai waʼa guru agama. 54I Peturu maluluwaka pangkeni i Yesu paikanya metondaraka lawa-lawa, rantani tepesua ri soma banua i nTadu mPanyomba Bangke. Njairia siʼa motunda maneru sangkani-ngkani pai waʼa ntopojaga. 55Waʼa ntadu mpanyomba pai pura-pura Majalisi Agama mampari-mpari mampepali sabi da napaleʼo mampetisala i Yesu, da napangkoto mampepate Sira, paikanya bareʼe narata ntau seʼe. 56Mariamo sabi kambamba-mbamba ndapeboo da mawai posabi mbamba kono i Yesu, paikanya posabi ntau seʼe paka mombetalikusi.

57Nepa mekakore bara tesangkuja sabi anu mawai posabi mbamba kono i Yesu, natoʼo, 58#Yoh. 2:19 “Kami madonge pompau ntau seʼi natoʼo, ‘Yaku da marongkasi Banua mPue Ala seʼi anu podo powia mpale ntolino, pai pura tatogo ndeme nepa da kuwali wangu muni anu banya powia mpale ntolino.’ ” 59Paikanya waʼa mposabi ntau setu paka mombetalikusi sambaʼa pai sambaʼa.

60Mekakoremo i Tadu mPanyomba Bangke ri oyo ntau seʼe, meoasi siʼa ri Yesu natoʼo, “Ara bareʼe da nusono waʼa mpetuluri anu ndatudoka ri siko setu?”

61Paikanya janjii i Yesu, bareʼe liu-liu mesono. Meoasi woʼu i Tadu mPanyomba Bangke ri Sira, “Ara sikomo i Mokole Tadungkadago, Ana i mPue Ala Anu Magali?”

62 # Dan. 7:13 Ndatoʼo i Yesu, “Yakumo Siʼa! Da ndikita i Ana Manusia motunda ri tondo mokana i mPue Ala Anu Makuasa da maʼi meyapi-yapi limu ungka ri yangi.”

63Nasiati i nTadu mPanyomba Bangke rengkonya nepa natoʼo, “Nunjaa woʼu da ndapepalika sabi? 64#Tad. 24:16 Ndidongemo ngkaliomi pompaunya mamposari i Pue Ala, nunjaa botusinya ungka ri komi?”

Nabotusi ntau seʼe pura-pura natoʼo, “I Yesu masala hukunya da ndapepate!”

65Reʼe bara tesangkuja tau montepuʼu mantupesi i Yesu, nakaʼuwi nta seʼe lio-A nepa nabobaki Sira natoʼo, “Koisa toʼoka, kami isema anu mabobaki siko?” Waʼa ntopojaga woʼu mantoposaka i Yesu.

I Peturu mampesapuka i Yesu

14:66-72

(Mat. 26:69-75, Luk. 22:56-62, Yoh. 18:15-18,25-27)

66Sindara i Peturu njaupa ri soma, maʼimo anamayunu i ntadu mpanyomba Bangke anu weʼa. 67Pangkitanya i Peturu maneru, nakomatasi mpodago lio i mPeturu natoʼo, “Ara banya siko sambaʼa yunu i Yesu to Nasare setu?”

68Mesapu i Peturu natoʼoka anamayunu setu, “Bareʼe kuincani, pai bareʼe kurata ndaya anu nutoʼo setu.” Malaimo i Peturu njoʼu maroo-roo ri boboka ncoma i ntadu mpanyomba bangke. [Sindara setu mototoroʼomo manu.]

69Nakita woʼu mbeʼa setu i Peturu pai napantoʼoka waʼa ntau njairia, “Manoto siʼa sambaʼa yunu ntau setu!” 70Paikanya mesapu woʼu i Peturu.

Bareʼe masae oyonya, mompau waʼa ntau njairia natoʼoka wou i Peturu, “Bareʼemo da nukoto mesapu kasikonya sambaʼa yunu ntau setu, maka siko to Galilea!” 71Natepuʼumo i mPeturu montusaki natoʼo, “Bareʼe kuincani tau anu nditoʼo setu!” 72Ri tempo setu seʼe mototoroʼomo manu karadua ngkaninya. Tekaendomo i Peturu ri pau i Yesu anu mantoʼoka siʼa, “Kabareʼepanya mototoroʼo manu radua ngkani, tatogo ngkanimo nupampesapuka yaku.” Painaka tumangimo i Peturu kancodu-ncodu.

Currently Selected:

MARAKUSI 14: LAIPMF

Highlight

Copy