MARAKUSI 15

I Yesu ri suara i mPilatu

15:1-5

(Mat. 27:1-2,11-14, Luk. 23:1-5, Yoh. 18:28-38)

1Mowuro-wuro mpodago, nadadusi Majalisi Agama tesua waʼa tadulako ntadu mpanyomba, waʼa topombawanaka nto Yahudi pai waʼa guru agama mogombo ncoroba. Napungu ntau seʼe i Yesu nepa nakeni Sira nawaika i Pilatu. 2Meoasi i Pilatu ri Yesu natoʼo, “Bara monco kojo siko. Mokole nto Yahudi?”

Mesono i Yesu ndatoʼo, “Ewancetumo pantoʼomu!”

3Maria pau waʼa ntadulako ntadumpanyomba anu mantuluri Sira. 4Meoasi woʼu i Pilatu ri Sira natoʼo, “Wenu painaka bareʼe nupokono masono? Peole ewambeʼi kasondonya pau ntau seʼe anu mantuluri siko!”

5Paikanya i Yesu bareʼe mo liu-liu mesono, painaka jingki raya i mPilatu.

I Yesu ndabotusi da ndapepate

15:6-15

(Mat. 27:15-26, Luk. 23:13-25, Yoh. 18:39–19:16)

6Sangkani-sangkani posusa Pasa, biasanya i Pilatu da malapa sambaʼa tau anu ndatarunggu malulu perapi ntau sondo. 7Ri raya ntarunggu, ri oyo waʼa ntopeewa anu mepepate sindara ngkaguaga, reʼe tau sambaʼa toʼonya i Baraba. 8Mompasambaka tau sondo mamperapi ri Pilatu da naka ndalapaka tau seʼe sambaʼa tau anu ndatarunggu ewa anu ndapobiasa. 9Meoasi i Pilatu ri tau seʼe, “Bara ndipokono da kulapaka komi Mokole nto Yahudi setu galami?” 10Maka naincani i mPilatu ewambeʼi kasina ndaya waʼa ntadulako ntadu mpanyomba ri Yesu, painaka napepombaika ntau seʼe Sira ri siʼa.

11Paikanya waʼa ntadulako ntadu mpanyomba mampasuaka pau waʼa ntau sondo da naka naperapi ntau seʼe ri Pilatu i Baraba da nalapaka tau seʼe. 12Mompau woʼu i Pilatu ri tau sondo natoʼo, “Ane ewanceʼe da kukuja tau anu nditoʼo mokole nto Yahudi seʼi?”

13Meboo-boomo tau seʼe natoʼo, “Paku ri kaju ndapanggo siʼa!”

14Meoasi i Pilatu natoʼo, “Paikanya nunjaa jaʼa-Nya?”

Jamaʼaimo karimbo mpeboo-boo ntau seʼe mantoʼo, “Paku ri kaju ndapanggo siʼa!” 15Ua daraya i mPilatu mampakawongko raya ntau sondo, nalapakamo tau seʼe i Baraba. Nepa napokau tau mantabasi i Yesu, roo setu napepombaikamo i Yesu da ndapampaku ri kaju ndapanggo.

I Yesu ndapasinggiri

15:16-20

(Mat. 27:27-31, Yoh. 19:2-3)

16Nakenimo waʼa ncurodado i Yesu ri kareʼe mpobotusi anu ri banua i mpetoro nepa napeboo mompasambaka waʼa ncurodado. 17I Yesu napaporengkoka juba makodara, nepa naena ntau seʼe makota ungka ri raʼa anu marui, napaposongkoka Sira. 18Roo setu nepa metabe tau seʼe natoʼo, “Tabe mokole nto Yahudi!” 19Natima ntau seʼe toko nabobakika woʼo i Yesu, natupesi lio-A nepa mombukotu manyomba ri suara-A. 20Ri karoʼonya mampolegaka i Yesu, nayali ntau seʼe juba makodara setu nepa napatakaka muni rengko-A ngkalio-A. Roo setu nakeni mpesuwu ntau seʼe Sira da ndapaku ri kaju ndapanggo.

I Yesu ndapaku ri kaju ndapanggo

15:21-32

(Mat. 27:32-44, Luk. 23:26-43, Yoh. 19:17-27)

21 # Rom. 16:13 Ri yae njaya nariso ntau seʼe tau sambaʼa mampasaʼa kaju ndapanggo i Yesu. Tau setu nepa mewalili ungka ri lipu da mesua ri kota. (Toʼonya i Simo – to Kirene – papa i Alesande pai i Rupu.) 22Ndakenimo i Yesu ri buyu sambaʼa toʼonya, “Gologota”, posokinya “Kareʼe nTakumboʼo”. 23Njairia Sira ndapapainuka anggoro anu ndagaloka mire, paikanya bareʼe ndapokono i Yesu mainu anggoro setu. 24#Pol. 22:19 Roo setu napaku ntau seʼe ri kaju ndapanggo Sira, napotila ntau seʼe rengko-A da nakanoto tila sambaʼa-sambaʼa tau ndatendeka dadu. 25Pampaku ri kaju ndapanggo i Yesu setu mewali ri tinti sasio mowuro. 26Ri tondo powoʼo-A ndaʼuki pau mpetuluri anu mantoʼo, “Mokole nto Yahudi!” 27Reʼe woʼu radua to pojampa anu ndapaku ri kaju ndapanggo sangkani-ngkani pai i Yesu sambaʼa ri tondo mokana sambaʼa ri tondo mokaii-A. [28#Yes. 53:12 Pewalinya ewanceʼe kobanganimo anu natoʼo Ncura Magali, “Siʼa da ndapasiwiamo pai tau majaʼa.”]

29 # Pol. 22:8, 109:25, Mrk. 14:58, Yoh. 2:19 Waʼa ntau anu moliu njairia montala-ntalambibi seʼi mantusaki i Yesu, natoʼo ntau seʼe, “Sikomo anu da magero Banua i mPue pai da nuwali wangu muni ri raya anu tatogo ndeme? 30Koisa penaʼu ungka ri kaju ndapanggo setu pai lapasakamo koro-Mu!”

31Ewanceʼe seʼe pompasinggiri waʼa ntadulako ntadu mpanyomba pai waʼa guru agama. Napombepau-pauka ntau seʼe natoʼo, “Tau ntaninya nasorepaka, paikanya koro-Nya ngkalio-Nya bareʼe nakoto mancorepaka! 32Ane siʼa mokole nto Isaraeli, Mokole Tadungkadago napenaʼumo ungka ri kaju ndapanggo setu da kapangkita pai da kapaaya siʼa!”

Waʼa ntau anu ndapaku ri kaju ndapanggo sangkani-ngkani pai Sira seʼe woʼu jajinya mampasinggiri i Yesu.

Kapate i Yesu

15:33-41

(Mat. 27:45-46, Luk. 23:44-49, Yoh. 19:28-30)

33Ri kasawi-sawi eo, mawengimo sambawo ntana, tatogo jaa kasaenya. 34#Pol. 22:2 Ri tinti tatogo lauka eo, meboo i Yesu marimbo oni nganga-A ndatoʼo, “Eloi, Eloi, Lama Sabatani?” anu posokinya “Pue Ala-Ku, Pue Ala-Ku makuja ndipalaika Yaku?”

35Bara tesangkuja tau anu njau njairia madonge peboo-A setu natoʼo, “Pedongeka, i Elia napeboo!” 36#Pol. 69:22 Sambaʼa ri oyo ntau seʼe molonco mantima yuro ri watu naome ri anggoro, mapodi. Nepa nabasula ri wuntu ngkaju sampole pai natora napapaisuka wiwi Yesu, natoʼo, “Popea, taole-oleka bara maʼi kojo i Elia mantaunaka siʼa ungka ri kaju ndapanggo setu.”

37Meboo i Yesu marimbo oninganga-A, puramo inosa-A.

38 # Pa. 26:31-33 Ayapa anu ndadindi ri raya Banua i mPue masia ungka ri wawonya tudu-tudu ri joenya. 39Tadulako ncurodado anu mekakore mosu ri puʼu ngkaju ndapanggo, mangkita ewambeʼi kapura inosa i Yesu, natoʼo, “Lawi monco kojo tau seʼi Ana mPue Ala!”

40 # Luk. 8:2-3 Njau woʼu bara tesangkuja weʼa anu mampepeoleka pura-pura setu, metada-tada lawa, mangkita pura-pura anu mewali setu. Njau i Salome, i Maria Madalena, pai i Maria ine i Yakobu anu mangura pai i Yose.

41Tau seʼemo waʼa mbeʼa anu malulu i Yesu pai anu mamporiokoi Sira sindara ri Galilea. Pai maria woʼu waʼa mbeʼa ntaninya anu malulu i Yesu jela ri Yerusale.

Pangadayo i Yesu

15:42-47

(Mat. 27:57-61, Luk. 23:50-56, Yoh. 19:38-42)

42-43Ngkinowiamo sindara ngkarata i Yusu to Arimatea. Siʼa sambaʼa anggota Majalisi Agama anu ndatubunaka. Siʼa woʼu sambaʼa tau anu mampopea da pontepuʼu i mPue Ala momparenta ewa sambaʼa Mokole. Eo setu eo pompatoka inceʼemo eo kabareʼepanya eo Umapo. Inceʼe painaka bareʼe maekanya njoʼu siʼa ri Pilatu, mamperapi watangkoro i Yesu. 44Jingki raya i mPilatu madonge kapatemo i Yesu. Napeboo waʼa ncurodado napeoasi bara masaemo kapate i Yesu. 45Butu nadonge pompetumbu ntadulako ncurodado setu, naʼiokamo i mPilatu perapi i Yusu da mantima watangkoro i Yesu. 46Naolimo i Yusu, ayapa lena anu maʼalusu. Roo setu njoʼumo siʼa mantudumaka watangkoro i Yesu ungka ri kaju ndapanggo, nepa nasompunika ayapa anu naoli setu. Timamamo pura-pura nepa nadika watangkoro i Yesu ri raya dayo. Dayo setu inceʼemo kumapa anu ndapaʼati. Roo setu naduli ntau seʼe watu bangke ndadampoka wobo dayo setu. 47Sindara setu njau i Maria Madalena pai i Maria ine i Yose mampepeole ri mbeʼi padika i Yesu.

Currently Selected:

MARAKUSI 15: LAIPMF

Highlight

Copy