MARAKUSI 13

I Yesu mampau kono da kagero Banua i mPue

13:1-2

(Mat. 24:1-2, Luk. 21:5-6)

1Palai i Yesu ungka ri Banua i mPue, sambaʼa ri oyo waʼa anagurua mantoʼo, “Guru, koisa ndipeole waʼa banua setu. Ndipatomata waʼa mbatunya. Maʼai kadolidinya!”

2Mesono i Yesu ndatoʼo, “Nukitamo kojo waʼa banua anu bangke setu? Bareʼe da reʼe mau saogu watu ungka ri waʼa banua setu anu da totaʼa tepatapi ri kareʼenya. Pura-pura da ndaruasi.”

Kapari pai pejeani

13:3-13

(Mat. 24:3-14, Luk. 21:7-19)

3Ungka lairia malai i Yesu ri Buyu ngKaju Lana, nepa motunda ri kareʼe anu mombesuara pai Banua i mPue. Nepa maʼi ri Sira i Peturu, i Yakobu, i Yohane pai i Andaria, jela da mompasimbaju. 4Natoʼo ntau seʼe ri Sira, “Koisa nditoʼoka kami, impiamo da pewalinya pura-pura setu? Pai nunjaa waʼa mpetondoninya karatamo ntemponya?”

5Mesono i Yesu ndatoʼoka tau seʼe, “Ndipakadago, neʼe boi komi ndatengosi. 6Maria tau da jela mampake toʼo-Ku, da natoʼo, ‘Yakumo Siʼa!’ pai sondo tau natengosi. 7Ane ndidonge waʼa oni mpombetoto pai waʼa bambari mpoʼiwali neʼe maeka. Pura-pura setu sangaya-ngaya da mewali, paikanya incetu banya posokinya jelamo eo kiama. 8Tau salemba da mampoʼiwalika tau anu salembanya. Negara anu sambaʼa da maungku negara anu ntaninya. Ri mbeʼi-mbeʼi da mewali lindugi pai kapari ua oro. Pura-pura setu nepa pontepuʼunya kojo ewa kajuʼa anu naepe ncambaʼa weʼa anu da moana.

9 # Mat. 10:17-20, Luk. 12:11-12 Komi da ndiendo-endo kojo, maka komi da ndasoko pai da ndanoʼo ri pogombo ntopobotusi. Komi da ndabobaki ri raya waʼa banua mpekakai. Komi da ndakeni mancuara waʼa ntau makuasa pai waʼa mokole ua kakominya anaguru-Ku. Pai inceʼemo tempomi da mangawai posabi kakononya yaku ri tau seʼe. 10Nuntu ngKatuwu ungka ri Pue Ala setu sangaya-ngaya da ndapobambarika riunya ri mpengaya-ngaya banca. 11Pai ane komi ndasoko pai ndakeni ri pobotusi, neʼe ndipoʼipu ndaya kono nunjaa anu da nditoʼo. Maka ane ratamo temponya da mompau, nditoʼomo nunjaa anu ndatoʼoka komi ri temponya. Maka waʼa mpau anu ndipasowa setu banya waʼa mpaumi ngkaliomi, paikanya mopuʼu ungka ri Pue Ala. 12Tau da manganawusaka kasangkomponya ngkalionya da ndapampepate. Inceʼe seʼe da tepewali ri oyo mpapa pai ananya. Waʼa ananya da maewa ine-papanya, pai mampepombaika tau seʼe da ndapepate. 13#Mat. 10:22 Komi da napobanciika ntau pura-pura ua kakominya anaguru-Ku. Paikanya tau anu todo rantani ri kapusanya da ndasorepaka.”

Kajaʼa anu mampakagero

13:14-23

(Mat. 24:15-28, Luk. 21:20-24)

14 # Dan. 9:27, 11:31, 12:11 “Komi da mangangkita ‘Kajaʼa anu Mampakagero’ mekakore ri kareʼe anu bareʼe maya napekakore. (Patiendo ri tau anu mabasa: Ndinawa-nawa nunjaa posokinya!) Ri tempo setu tau anu njau ri Yudea sangaya-ngaya da molonco ndeku ri buyu mongkodo. 15#Luk. 17:31 Tau anu ri wawo ata banua neʼe menaʼu pai mesua ri raya banua mantima bara nunjaa-njaa. 16Tau anu njau ri jamaa neʼe mewalili da mantima jubanya. 17Maʼaisa kaparinya ri eo-eo setu naepe mbeʼa anu manee koronya pai ine anu ntongo mampasusu ongaa! 18Ndipekakaimo da naka pura-pura setu neʼe mewali ri tempo mpouja. 19#Dan. 12:1, Pepat. 7:14 Ri waʼa eo anu ndapokaeka setu da reʼe sangaya kapari anu bareʼepa reʼe pewalinya, montepuʼu ungka ri pampapewali i mPue Ala lino rantani wawaseʼi, pai bareʼemo da reʼe woʼu pewalinya. 20Ane rapanya bareʼe ndapakaʼede i mPue Ala tempo setu, manoto bareʼemo da reʼe mau sambaʼa tau anu da tesorepaka. Paikanya ua ntau-A, i Pue Ala mampakaʼede tempo setu.

21Ri tempo setu ane reʼe tau mangantoʼoka komi, ‘Peole, Mokole Tadungkadago setu reʼe ireʼi!’ bara ‘Peole, Sira reʼe ri njau!’ – neʼe boi ndiaya tau setu. 22Maka da rata waʼa ntoponcorepaka anu kambamba-mbamba pai waʼa nabi anu kambamba-mbamba. Tau seʼe da mawianaka waʼa mpowia anu ndapojingki, pai waʼa tanda ngkuasa da napetengosika, sako waʼa ntau i mPue Ala seʼe da natengosi. 23Mewali da ndisoro-soro! Pura-pura setu roomo Kutoʼoka komi ri kabareʼepanya inceʼe mewali.”

Karata i Ana Manusia

13:24-27

(Mat. 24:29-31, Luk. 21:25-28)

24 # Yes. 13:10, Yeh. 32:7, Yo. 2:10,31, 3:15, Pepat. 6:12 “Butu liumo tempo ngkaparinya setu, ogu eo bareʼemo merara, pai wuya woʼu bareʼemo da mesindi. 25#Yes. 34:4, Yo. 2:10, Pepat. 6:13 Waʼa betuʼe da manawu ungka ri yangi, pai waʼa anu makuasa ri tongo ndaoa da mewali sigaliganggomo. 26#Dan. 7:13, Pepat. 1:7 Sindara setu da ndakita i Ana Manusia maʼi meyapi-yapi limu ri kuasa anu bangke pai peawa-Nya. 27Siʼa da mampokau waʼa malaʼeka da mampasambaka waʼa ntau anu roo napilisi ungka ri aopo ncuno lino, ungka ri waʼa ntando lino pai waʼa ntando yangi.”

Totoraka ewa katuwu ngkaju ara

13:28-31

(Mat. 24:32-35, Luk. 21:29-33)

28“Ndipegurumo ri katedikanaka ngkaju ara. Ane waʼa raʼanya damata pai mayuʼu, pai montepuʼu molonde, ndiincani mosumo tempo mporeme. 29Ewanceʼe seʼe ane ndikita pura-pura setu mewali, ndiincani mosumo mpodago temponya. 30Da ndipaincani! Bareʼepa pura mate tau anu tuwu salapi seʼi da mewalimo pura-puranya setu. 31Yangi pai lino da paya, paikanya nuntu-Ku bareʼe da paya rantani masae-sae.”

Bereʼe tau anu maincani eo pai jaanya

13:32-37

(Mat. 24:36-44)

32 # Mat. 24:36 “Paikanya mau ewanceʼemo bereʼe tau anu maincani kaʼimpianya eonya pai jaanya. Waʼa kerubio ri suruga pai i Ana seʼe bareʼe naincani, podo i Papa anu maincani. 33Mewali komi da moncoro-ncoro pai da mojaga-jaga maka bareʼe ndiincani kaʼimpianya tempo setu. 34#Luk. 12:36-38 Katedikanakanya ndapaporapaka ewa sambaʼa tau anu mampalaika banuanya njoʼu ri tana ntau lawa. Napokau waʼa ntoporiokonya da majagai pai da mampasilolongani banuanya, pai natilaka tetalanya sambaʼa-sambaʼa. Reʼe anu majaga boboka, natotoraka da naka najaga mpodago. 35Maka komi pura-pura paka da mojaga-jaga maka bareʼe ndiincani impia tempo da pewalili tumpu banua bara ngkinowia, bara ri ntongo mbengi, bara ri mosu reme bara ri ngkina reme. 36Da naka ane jela ncoroba, neʼe boi ndarata komi ntongo lintu ngkayore. 37Nunjaa anu Kutoʼoka komi seʼi, Kutoʼoka woʼu waʼa ntau pura-pura da naka mojaga-jaga!”

Currently Selected:

MARAKUSI 13: LAIPMF

Highlight

Copy