MATIU 27

I Yesu ndakeni ri Pilatu

27:1-2

(Mrk. 15:1, Luk. 23:1-2, Yoh. 18:28-32)

1Mowuro-wuro mpodago napawaremo waʼa ntadulako ntadu mpanyomba pai waʼa ntadulako nto Yahudi gombo da mampepate i Yesu. 2Napungu ntau seʼe Sira, nepa nakeni napepombaika ri Pilatu sarungkoro i Datu ri Roma.

Kapate i Yudasi

27:3-10

(Pwn. 1:18-19)

3 # Pwn. 1:18-19 Butu nakita i Yudasi anu mampobalu i Yesu, ndapabotusi i Yesu da ndapepate, moncosoimo rayanya. Liu-liu napapewalili doi anu tatogo mpuyu doi salaka setu ri waʼa ntadulako ntadu mpanyomba pai ri waʼa ntadulako nto Yahudi. 4Natoʼo, “Yaku masalamo mampobalu tau anu bereʼe salanya, rantani mabotu hukunya da ndapepate!”

Paikanya mesono tau seʼe, “Incetu bareʼe kaincani kami, siko ngkaliomu anu maincani!”

5Napetasoka i Yudasi doi setu ri raya Banua i mPue nepa malai siʼa meoja.

6Narurusi waʼa ntadulako ntadu mpanyomba doi setu, natoʼo, “Doi seʼi oli daa. Malulu songka agama, bareʼe maya ndawunca ri raya mpeti doi mpanyomba ri Banua i mPue.” 7Naposintuwui ntau seʼe doi setu da ndaolika tana anu ndatoʼo tana i nTopomoncu Kura. Ri tana setu da ndapadayo tau linggona ane reʼe anu mate. 8Inceʼe puʼunya painaka rantani eo-eo seʼi tana setu ndapapotoʼo “Tana Daa”.

9 # Sak. 11:12-13 Pewalinya ewanceʼe, kobanganimo wati i Nabi Yeremia anu mantoʼo, “Tau seʼe mantarima togompuyu doi salaka, inceʼemo oli sambaʼa tau anu ndapakanoto ri to Isaraeli. 10Pai doi setu naolika ntau seʼe tana i nTopomoncu Kura, ewa anu ndapepokauka i mPue ri yaku.”

I Yesu naparesa i mPilatu

27:11-14

(Mrk. 15:2-5, Luk. 23:3-5, Yoh. 18:33-38)

11Ri kajela i Yesu ri suara i mPilatu petoro ri tana setu, meoasi i Pilatu, natoʼo, “Ara siko mokole nto Yahudi?”

Mesono i Yesu ndatoʼo, “Ewanceʼe pantoʼomu.” 12Paikanya ri tempo mpadanda-danda waʼa ntadulako ntadu mpanyomba pai tadulako nto Yahudi waʼa mpetuluri ri Sira, mau sapiu bareʼe liu-liu ndasono.

13Inceʼe painaka natoʼo i mPilatu ri Sira, “Ara bareʼe Nudonge pura-pura petuluri waʼa ntau seʼe ri Siko?”

14Pompeoasi i mPilatu setu, bareʼe liu-liu ndapokono i Yesu mancono, inceʼe painaka maʼai kajingki ndaya i mPilatu.

I Yesu ndabotusi da ndapepate

27:15-26

(Mrk. 15:6-15, Luk. 23:13-25, Yoh. 18:39–19:16)

15Biasanya sangkani-sangkani posusa Pasa, i Pilatu da malapa sambaʼa tau anu ndatarunggu malulu pampilisi ntau sondo. 16Ri tempo setu reʼe sambaʼa tau ri raya ntarunggu i Yesu Baraba toʼonya. 17Mewali ri tempo tepasambakamo tau sondo, mompeoasimo i Pilatu ri tau seʼe, natoʼo, “Malulu pepokonomi isema anu da kulapaka komi? I Yesu Baraba bara i Yesu anu ndatoʼoi Kerisitu?” 18Tangara ndaya i mPilatu pai napantoʼo ewanceʼe, maka lawi naincani, pampepombaika waʼa ntadulako nto Yahudi i Yesu ri siʼa, podo ua kasina ndaya ntau seʼe.

19Sindara i Pilatu njaupa motunda-tunda ri kareʼe mpobotusi, napokau ndongonya, tau mampetumbuka patuu ri siʼa, natoʼo, “Neʼe nubotusi kara-kara ntau mayoa setu, maka majaʼa kojo pangipiku sambengi ngena ua tau setu.” 20Paikanya waʼa ntadulako ntadu mpanyomba pai waʼa ntadulako nto Yahudi bareʼe naowe mampasuaka pau waʼa ntau sondo, da naka naperapi ntau seʼe ri Pilatu, i Baraba da ndalapaka tau seʼe pai i Yesu da ndapepate. 21Meoasi woʼu i Pilatu ri tau seʼe, “Isema kojo anu dakulapaka komi ri oyo ntau radua seʼi?”

Mesono tau seʼe, “I Baraba!”

22Natoʼo i mPilatu, “Ane ewanceʼe, da kukuja i Yesu anu ndatoʼo i Kerisitu?”

Mesono tau seʼe pura-pura, “Da ndapaku ri kaju ndapanggo!”

23Napeoasi i mPilatu ri tau seʼe natoʼo, “Paikanya nunjaa salanya?” Janaʼaiwaka ntau seʼe meboo-boo, “Paku siʼa ri kaju ndapanggo!”

24 # Paw. 21:6-9 Kapusanya, narata ndayamo i mPilatu kabareʼenyamo reʼe jaya narata pai da monjaʼatimo waʼa ntau sondo. Ungka lairia natima i mPilatu ue nawusoʼi palenya ri suara ntau sondo, natoʼo, “Yaku bareʼe tesua mampepate tau seʼi! Inceʼi komi da mangkoyo!”

25Mesono tau seʼe pura-pura, “Io, mbolimo kami pai waʼa muli mami anu da mangkoyo huku ngkapatenya!”

26Roo setu nalapakamo i mPilatu tau seʼe i Baraba, napokau tau mantabasi i Yesu, nepa napepombaika ri tau seʼe da napampaku ri kaju ndapanggo.

I Yesu napolegaka waʼa ncurodado

27:27-31

(Mrk. 15:16-20, Yoh. 19:2-3)

27Ungka lairia nakenimo waʼa ncurodado i mPilatu i Yesu mesua ri banua i petoro, njairia Sira nalimbu ncurodado anu sondo. 28Naosu ntau seʼe rengko i Yesu, nepa napaporengkoka Sira juba makodara. 29Naena ntau seʼe wayaa marui napowia ewa makota nepa napaposongkoka Sira. Nepa napapotokoka woyo, roo setu mombukotu tau seʼe manyomba, napasinggiri, natoʼo, “Tabe Mokole nto Yahudi!” 30Natupesi ntau seʼe lio-A, natima ntau seʼe toko woyo setu nabobakika woʼo-A. 31Osamo raya ntau seʼe mampolegaka pai mampasinggiri Sira, nayali muni ntau seʼe juba anu makodara, napatakaka muni rengko-A. Roo setu nakeni mpesuwu ntau seʼe Sira da ndapaku ri kaju ndapanggo.

I Yesu ndapaku ri kaju ndapanggo

27:32-44

(Mrk. 15:21-32, Luk. 23:26-43, Yoh. 19:17-27)

32Ri yae njaya, simpadopa tau seʼe pai i Simo to Kirene. Nariso ntau seʼe tau setu da mampasaʼa kaju ndapanggo i Yesu. 33Ungka lairia jelamo tau seʼe ri buyu Gologota, anu posokinya “Kareʼe nTakumboʼo”. 34#Pol. 69:22 Njairia i Yesu nawaika ntau seʼe anggoro ndagaloka apoju. Paikanya butu ndapenyami anggoro setu, bareʼe ndapokono mainu.

35 # Pol. 22:19 Roo setu napakumo ntau seʼe Sira, rengko-A napotila ntau seʼe malulu pampakanoto mata dadu. 36Ungka lairia motundamo tau seʼe njairia majagai Sira. 37Ri tondo powoʼo-A napataka ntau seʼe dopi anu ndaʼukika pau mpetuluri ewaseʼi kateʼukinya, “Seʼimo Yesu Mokole nto Yahudi”. 38Reʼe radua to pojampa anu napaku ntau seʼe sangkani-ngkani pai Sira; sambaʼa ri tondo mokana, sambaʼa ri tondo mokaii.

39 # Pol. 22:8, 109:25 Waʼa ntau anu moliu iretu montala-ntalambibi pai mampetikodi i Yesu. 40#Mat. 26:61, Yoh. 2:19 Natoʼo ntau seʼe, “Sikomo anu da magero Banua i mPue Pue Ala, pai da nuwali wangu muni ri tempo anu tatogo ndeme! Ane monco siko Ana i mPue Ala, penaʼumo ungka ri kaju ndapanggo setu, pai lapasakamo koro-Mu!”

41Ewanceʼe seʼe waʼa ntadulako ntadu mpanyomba pai waʼa guru agama sangkani pai waʼa ntadulako nto Yahudi mampasinggiri i Yesu. Natoʼo ntau seʼe, 42“Tau ntaninya nasorepaka, ntanoka koronya ngkalionya bareʼe nakoto mancorepaka! Ane siʼa mokole nto Isaraeli, napenaʼumo ungka ri kaju ndapanggo setu, nepa da kaaya siʼa. 43#Pol. 22:9 Siʼa maaya i Pue Ala, pai natoʼo siʼa Ana i mPue Ala. Io jamo tapampepeole bara da ndalapasaka i mPue Ala siʼa.”

44Sako tau anu ndapaku sangkani-ngkani pai Sira, jajinya woʼu mampasinggiri Sira.

Kapate i Yesu

27:45-56

(Mrk. 15:33-41, Luk. 23:44-49, Yoh. 19:28-30)

45Ri kasawi-sawi eo, mawengimo sambawo ntana tatogo jaa kasaenya. 46#Pol. 22:2 Ri tinti tatogo lauka eo, meboo i Yesu marimbo oni nganga-A ndatoʼo, “Eli, Eli, Lama Sabatani!” anu posokinya, “Pue Ala-Ku, Pue Ala-Ku, makuja ndipalaika Yaku?”

47Bara tesangkuja tau anu njau njairia madonge peboo-A setu, natoʼo ntau seʼe, “I Elia napeboo!” 48#Pol. 69:22 Sambaʼa ri oyo ntau seʼe molonco mantima yuro ri watu naome ri anggoro mapodi. Nepa nabasula ri wuntu ngkaju sampole, nepa natora napapaisuka wiwi i Yesu.

49Santila tau mantoʼo, “Tapopeamo, tapampeole boi maʼi kojo i Elia da malapasaka siʼa!”

50Bareʼe masae meboo woʼu i Yesu marimbo oni nganga-A, roo setu puramo inosa-A.

51 # Pa. 26:31-33 Ayapa makumba anu ndadindi ri raya Banua i mPue masia ungka ri wawonya tudu-tudu ri joenya, tetila radua; nakeni ngkaʼai mpolinduginya maponga waʼa mbatu ri buyu. 52Waʼa dayo teloka, pai maria tau anu meaya ri Pue Ala, anu matemo ndapatuwu muni. 53Tau seʼe mesuwu ungka raya dayo, ri pembangu muni i Yesu ungka ri kapatea. Tau seʼe mesua ri kota Yerusale. Njairia maria tau anu mangkita tau seʼe.

54Tadulako ncurodado sangkani pai waʼa ncurodado anu majaga i Yesu, maʼai kojo kaeka ndayanya ri paepe ntau seʼe lindugi pai pura-pura anu mewali setu. Natoʼo ntau seʼe, “Monco kojo, siʼa seʼi Ana i mPue Ala!”

55 # Luk. 8:2-3 Njairia njau woʼu maria waʼa mbeʼa anu mampepeoleka ungka ri kalawanya. Tau seʼemo anu malulu i Yesu ungka ri Galilea pai anu mamporiokoi Sira. 56Tau seʼe anu ndaincani toʼonya inceʼemo, I Maria Madalena, i Maria ine i Yakobu pai i Yusupu, pai ine waʼa ana i Ncebedeu.

Pangadayo i Yesu

27:57-61

(Mrk. 15:42-47, Luk. 23:50-56, Yoh. 19:38-42)

57Mawengi setu jelamo sambaʼa tau koreʼe ungka ri Arimatea i Yusu toʼonya. Siʼa seʼe sambaʼa anaguru i Yesu. 58Njoʼu siʼa ri Pilatu mamperapi watangkoro i Yesu. Nasongka i mPilatu tau da mawaika i Yusu watangkoro i Yesu. 59Natima i Yusu watangkoro i Yesu, nasompunika ayapa lena mabuya anu dawoʼu. 60Watangkoro i Yesu nadika ri dayonya ngkalionya anu ndapowia ri raya sambaʼa buyu mbatu. Roo setu nadampoka watu bangke wobo dayo nepa napalaika. 61I Maria Madalena pai i Maria anu ntaninya, lau motunda-tunda mancuaraki wobo dayo setu.

Waʼa nto pajaga dayo

27:62-66

62Ri kabangke ndeme, ri eo Umapo, njoʼumo waʼa ntadulako ntadu mpanyomba pai waʼa nto Parisi madadu i Pilatu, 63#Mat. 16:21, 17:23, 20:19, Mrk. 8:31, 9:31, 10:33-34, Luk. 9:22, 18:31-33 natoʼo, “Tua, kono kaendo ri sindara ntongo tuwupa i kalopu-lopu setu, reʼe natoʼo, ‘Pusa tatogo ndeme yaku da membangu.’ 64Inceʼe painaka ane ndipomadago, da ndisongka tau majaga dayonya rantani rata ri eo anu katatogo, naka neʼe naleʼo waʼa anagurunya mampelima watangkoronya, nepa da natoʼoka waʼa ntau siʼa membangumo ungka ri kapate. Pai polopu anu kapusanya seʼi inceʼe anu da maʼai ngkajaʼanya painaka anu riunya.”

65Natoʼo i mPilatu ri tau seʼe, “Komi seʼe reʼe surodadomi anu da majaga, ndipokaumo napajaga maroso-rosonya.”

66Malaimo tau seʼe njoʼu ri dayo, napakainti ntau seʼe watu anu ndadampoka dayo, nadika petondoni, pai nadika woʼu tau anu mojaga ri suaranya, da naka neʼe naleʼo ntau maloka dayo setu.

Currently Selected:

MATIU 27: LAIPMF

Highlight

Copy